QazaqGaz الداعى ۋاقىتقا بولجام جاسادى.
ۇلتتىق كومپانيا كەيبىر تۇتىنۋشىلار ءۇشىن ءتاريفتى كوتەرۋ قاجەتتىگىن مالىمدەدى، دەپ حابارلايدى Almaty-akshamy.kz
ونسىز بولاشاقتا گاز باعاسى كۇرت كوتەرىلەدى.
كومپانيا ءتوراعاسىنىڭ ماركەتينگ جونىندەگى ورىنباسارى ارمان قاسەنوۆتىڭ ايتۋىنشا، سوڭعى جەتى جىلدىڭ ىشىندە ىشكى نارىقتا گاز تۇتىنۋ كولەمى ەكى ەسەگە ءوستى. بولجامعا سايكەس، 2030 جىلعا قاراي بۇل كورسەتكىش 40 ملرد تەكشەگە جەتەدى. ال QazaqGaz ودان تابىس كورىپ وتىرعان جوق، كەرىسىنشە، شىعىنعا جۇمىس ىستەپ جاتىر. قازىرگى كەزدە ىشكى نارىقتىڭ شىعىنى ەكسپورتپەن وتەلەدى.
"مىسالى، ءقازىر بىلاي بولىپ تۇر. گازدىڭ ءبىر تونناسىن ورتاشا ەسەپپەن 13 750 تەڭگەگە ساتىپ الادى. تاسىمالداۋ شىعىنى – 11 459 تەڭگە. سوندا گازدىڭ كوتەرمە باعاسى 25 209 بولۋى كەرەك. ءبىراق ءقازىر ءبىر تونناسى 15 419 تەڭگەدەن ساتىلادى. وسىلايشا ءاربىر تەكشەدەن 10 تەڭگە شىعىن كەلەدى"، - دەدى قاسەنوۆ قوعامدىق كەڭەستىڭ بۇگىنگى وتىرىسىندا.
ونىڭ سوزىنە قاراعاندا، كومپانياعا تابىس تۇسسە، قوسىمشا گاز كولەمىن وندىرۋگە مۇمكىندىك بولادى.
"ولاي ىستەمەسەك، جاقىن ارادا ىشكى نارىقتا گازدىڭ باعاسى ءبىر ۋاقىتتا كۇرت كوتەرىلەدى. باسقا جول جوق"، - دەپ اتاپ ءوتتى قاسەنوۆ.
وسىعان بايلانىستى QazaqGaz ءىرى كوممەرسيالىق تۇتىنۋشىلار مەن سيفرلىق ماينينگپەن اينالىساتىندار ءۇشىن بولەك تاريف ەنگىزۋدى ۇسىنىپ وتىر. سەبەبى ولار ارزان گازدىڭ ەسەبىنەن ءبىراز اقشاسىن ۇنەمدەيدى.
"ەگەر وسىنى ىسكە اسىرماساق، وندا تۇتىنۋشىلاردىڭ بارلىق ساناتىنا سالماق تۇسەدى. ولاردىڭ ىشىندە قاراپايىم حالىق، جىلۋ ەلەكتر ستانسيالارى بار"، - دەيدى قاسەنوۆ.
بۇعان دەيىن "QazaqGaz" ۇلتتىق كومپانياسى گازدى تۇتىنۋدىڭ "الەۋمەتتىك مينيمۋمىن" ەنگىزۋ باستاماسىن كوتەردى.