الماتىدا جاستار ساياساتى باسقارماسىنىڭ قولداۋىمەن ىسكە اسىرىلىپ جاتقان «جاستارعا ارنالعان جالپىقالالىق مانساپ كۇندەرى» اۋقىمدى جوباسى باستالدى، دەپ حابارلايدى aqshamnews.kz.
باستامانىڭ ماقساتى - جاس ماماندارعا جۇمىس تابۋعا، كاسىبي داعدىلارىن دامىتۋعا جانە الەۋەتتى جۇمىس بەرۋشىلەرمەن بايلانىس ورناتۋعا كومەكتەسۋ. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا قالالىق مانساپ ورتالىعىنىڭ جۇمىس بەرۋشىلەرمەن جانە ارىپتەستەرمەن جۇمىس ءبولىمىنىڭ باسشىسى اقارىس تورەبەكوۆ حابارلادى.
«قازاقستان حالقىنىڭ 27%-ىن جاستار قۇرايدى – بۇل 5،3 ميلليون ادام. جىل سايىن ەڭبەك نارىعىنا 250 مىڭعا جۋىق جاس مامان شىعادى، الايدا ولاردىڭ بارلىعى بىردەن ءوز ماماندىعى بويىنشا جۇمىس تابا بەرمەيدى. ءبىز بۇل جاعدايدى وزگەرتكىمىز كەلەدى»، – دەدى سپيكەر.
ونىڭ ايتۋىنشا، العاشقى بوس ورىندار جارمەڭكەسى 31 ناۋرىزدا المالى اۋدانىندا، الماتى تەحنولوگيالىق ۋنيۆەرسيتەتىنىڭ بازاسىندا ءوتتى. ءىس-شاراعا 50-دەن استام جۇمىس بەرۋشى مەن 500-دەن اسا جۇمىس ىزدەۋشى قاتىستى.
«ءبىز جاستارعا جۇمىس تابۋمەن قاتار، ءوز داعدىلارىن دامىتۋعا، نارىق تالاپتارىن تۇسىنۋگە جانە موتيۆاسيا الۋعا مۇمكىندىك بەرەتىن ءبىرىڭعاي الاڭ قۇرىپ جاتىرمىز»، – دەپ اتاپ ءوتتى اقارىس تورەبەكوۆ.
ول جاقىن ارادا جوبا قالانىڭ بارلىق اۋداندارىن قامتيتىنىن ايتتى. 14 ساۋىردە بوس ورىندار جارمەڭكەسى مەدەۋ اۋدانىندا قازاق ۇلتتىق اگرارلىق زەرتتەۋ ۋنيۆەرسيتەتىنىڭ بازاسىندا، ال 24 ساۋىردە بوستاندىق اۋدانىندا Satbayev University بازاسىندا وتەدى. كوكتەمنىڭ سوڭىنا دەيىن تاعى بەس، ال كۇزدە ءۇش ءىس-شارا وتەدى.
ۇيىمداستىرۋشىلار 8 مىڭنان استام جاستاردى قامتۋدى جانە كەمىندە 500 ادامدى جۇمىسقا ورنالاستىرۋعا جاردەمدەسۋدى جوسپارلاپ وتىر. جارمەڭكەلەردەن باسقا، كاسىپورىندارعا ەكسكۋرسيالار جانە ب ا ق پەن الەۋمەتتىك جەلىلەردە بەلسەندى اقپاراتتىق قولداۋ قاراستىرىلعان.
«جالپىقالالىق مانساپ كۇندەرى» جوباسى جاستار اراسىنداعى جۇمىسسىزدىقتى تومەندەتۋدەگى ماڭىزدى قادام بولادى جانە الماتىلىق جاستار اراسىندا كاسىبي دامۋعا تۇراقتى ىنتالاندىرۋدى قالىپتاستىرۋعا كومەكتەسەدى»، - دەپ قورتىندىلادى سپيكەر.