قالالىق جۇمىسپەن قامتۋ ورتالىعى جاقىندا جاستارعا ارنالعان 3 جارمەڭكە وتكىزۋدى جوسپارلاپ وتىر
الماتىدا بيىل 240 مامان جاستار ىس-تاجىريبەسىنەن ءوتىپ جاتىر. ولاردىڭ بەسەۋى تۇراقتى جۇمىسقا كىرىپ تە ۇلگەرگەن، دەپ حابارلايدى Almaty-akshamy.kz Almaty.tv-گە سىلتەمە جاساپ.
25 جاستاعى نارگيز حاليلوۆا – «جاستار ىس-تاجىريبەسى» باعدارلاماسىنىڭ جەمىسىن كورگەن مامان. ءتىس دارىگەرىنىڭ بۇگىندە تۇراقتى جۇمىسى، ءوز ەمدەلۋشىلەرى بار. ول وقۋ بىتىرە سالا، ەكى قولعا ءبىر كۇرەك ىزدەپ، بولاشاعىنا الاڭداي باستاعان. ءتىپتى باستاپقىدا تاجىريبە جيناۋ ءۇشىن بىرنەشە جەردە تەگىن ەڭبەك ەتكەنىن ايتادى. ءبىراق جاستارعا ارنالعان باعدارلامانى ەستىگەندە، مامان بولىپ قالىپتاسۋعا زور مۇمكىندىك اشىلعانىن تۇسىنگەن. ونىڭ ۇستىنە، كاسىپتىڭ قىر-سىرىن ۇيرەنىپ ءجۇرىپ، جالاقى الۋ ۇلكەن موتيۆاسيا، – دەيدى جاس مامان.
«جاستار ىس-تاجىريبەسىنە» قۇجاتتارىمدى تاپسىردىم. مەنىڭ ۇسىنىسىمدى قالاداعى ءتىس ەمدەيتىن بەلدى ەمحانالاردىڭ ءبىرى قابىل الدى. ءبىر جىل بويى كوپ نارسە ۇيرەنىپ، كەيىن وسىندا تۇراقتى جۇمىسقا ورنالاستىم. باعدارلاما مامان رەتىندە قالىپتاسۋىما زور مۇمكىندىك بەردى. ايتارىم، قۇجاتتاردى تاپسىرۋ قيىن ەمەس. ونى بار بولعانى ءبىر كۇندە تاپسىردىم. ەگەر نيەت بولسا، الىنبايتىن قامال، باعىنبايتىن بەلەس جوق»، – دەدى ستوماتولوگ دارىگەر نارگيز حاليلوۆا.
«جاستار ىس-تاجىريبەسى» باعدارلاماسى 35 جاسقا دەيىنگى، ديپلوم العاندارىنا ءۇش جىلدان اسپاعانداردى جۇمىسپەن قامتۋعا كومەكتەسەدى. وعان قوسا، 1 جىل كولەمىندە اي سايىن 40 ايلىق ەسەپتىك كورسەتكىش كولەمىندە، ياعني، 138 مىڭ تەڭگە جالاقى تولەنەدى. ياعني، جاس ماماندار تاجىريبە جيناۋمەن قاتار، ايلىق الىپ وتىرادى. ەگەر ول ءوزىن جاقسى جاعىنان كورسەتسە، تاجىريبە اياقتالماستان جۇمىسقا ورنالاسۋىنا ابدەن بولادى.
«جاستار تاجىريبەسىنە قاتىسۋ ءۇشىن ەڭ الدىمەن enbek.kz پورتالى ارقىلى جۇمىس ىزدەۋشى رەتىندە تىركەلەدى. ءۇش جۇمىس كۇنى وتكەن سوڭ جۇمىسسىز دەگەن ستاتۋس الادى. پورتالعا ءوز تۇيىندەمەسىن تىركەپ، ءوز ماماندىعى بويىنشا پورتالدان جۇمىس ورىندارىن ونلاين ىزدەپ، تۇيىندەمەسىن سايكەس كەلگەن مەكەمەگە جىبەرەدى. جۇمىس بەرۋشى ەنبەك پورتالى ارقىلى تۇيىندەمەنى كورىپ، جۇمىسقا شاقىرتادى. سۇحباتتاسىپ بولعان سوڭ، جۇمىسقا قابىلدانادى»، – دەيدى جۇمىسپەن قامتۋ ورتالىعىنىڭ ءبولىم مامانى اقبوتا رىسقۇلوۆا.
ءتىپتى بولماسا، قۇجاتتاردى قالالىق جۇمىسپەن قامتۋ ورتالىعىنىڭ ماماندارى ارقىلى دا تىركەتۋگە مۇمكىندىك بار. ودان بولەك، وقۋعا تۇسە الماي قالعان جاستار ءۇشىن دە باعدارلاما قاراستىرىلعان. ماسەلەن، الماتىدا جىل باسىنان بەرى «العاشقى جۇمىس ورنى» بويىنشا 20 ادام جۇمىس تاپسا، «ۇرپاقتار كەلىسىمشارتى» اياسىندا 10 قاتىسۋشى تاجىريبەدەن ءوتىپ جاتىر.
«العاشقى جۇمىس ورىندارى» دەگەن باعدارلاما بار. ول باعدارلاماعا 16 جاستان 35 جاسقا دەيىنگى، ەش جەردە ەڭبەك ءوتىلى جوق ازاماتتار قاتىسا الادى. ال «ۇرپاقتار كەلىسىمشارتى» دەگەن باعدارلاما بويىنشا بەلگىلى ءبىر ۇيىمدا زەينەتكە شىعۋعا 6 اي قالعان قىزمەتكەردىڭ قاسىنا جۇمىسقا جىبەرىلەدى. جاستارعا قويىلاتىن تالاپتار - ديپلوم العانىنا 2 جىلدان اسپاۋ كەرەك»، – دەدى جۇمىسپەن قامتۋ ورتالىعىنىڭ ءبولىم مامانى اقبوتا رىسقۇلوۆا.
قالالىق جۇمىسپەن قامتۋ ورتالىعى جاقىندا جاستارعا ارنالعان ءۇش جارمەڭكە وتكىزۋدى جوسپارلاپ وتىر. بىلتىر وسىنداي 15 شارا وتكەن ەكەن. بوس جۇمىس ورىندارى تۋرالى اقپاراتتى ورتالىقتىڭ ينستاگرامداعى پاراقشاسىنان كورۋگە بولادى. وعان قوسا، جاستاردى جۇمىسپەن قامتيتىن ماماندار جوعارى وقۋ ورىندارىن ارالاپ، باعدارلامالار جايلى ءتۇسىندىرىپ تە ءجۇر.