الماتىدا «ايبىن» X حالىقارالىق اسكەري-پاتريوتتىق جاستار جيىنى باستالدى
وعان قاتىسۋ ءۇشىن الماتىعا ازەربايجان، بەلارۋس، قازاقستان، قىرعىزستان، رەسەي جانە وزبەكستاننان جاس پاتريوتتار كوماندالارى كەلدى. سايىستا 14 پەن 17 جاس ارالىعىنداعى بارلىعى 750 ۇل مەن قىز باعىن سىناۋدا.
اسكەري-پاتريوتتىق جيىن كەڭەس وداعىنىڭ باتىرى، № 1 حالىق قاھارمانى، تاۋەلسىز قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆتىڭ تۋعانىنا 100 جىل تولۋىنا ورايلاستىرىلدى. جيىننىڭ سالتاناتتى اشىلۋى كورنەكتى اسكەري قولباسشىنىڭ ەسىمىمەن اتالاتىن قۇرلىق اسكەرلەرىنىڭ اسكەري ينستيتۋتىندا ءوتتى.
ءىس-شارا ساعادات نۇرماعامبەتوۆ ەسكەرتكىشىنە گۇل شوقتارىن قويۋدان باستالدى. ق ر قاۋىپسىزدىك كەڭەسىنىڭ حاتشىسى عيزات نۇرداۋلەتوۆ، قورعانىس ءمينيسترى گەنەرال-پولكوۆنيك رۋسلان جاقسىلىقوۆ، حالىق باتىرىنىڭ قىزى ايسۇلۋ نۇرماعامبەتوۆا جانە شەتەلدىك دەلەگاسيالاردىڭ وكىلدەرى قۇرمەت قاراۋىل روتاسىنىڭ سۇيەمەلدەۋىمەن قازاقستان قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق اسكەري وركەسترىنىڭ سالتاناتتى اۋەنىمەن داڭقتى مايدانگەردى ەسكە الدى.
ەل پرەزيدەنتى قاسىم-جومارت توقايەۆتىڭ قازاقستاننىڭ جاس پاتريوتتارىنا جولداۋىن ق ر قاۋىپسىزدىك كەڭەسىنىڭ حاتشىسى عيزات نۇرداۋلەتوۆ وقىدى. وندا جيىننىڭ اسكەري قىزمەتتەگى ءتارتىپ پەن جاۋاپكەرشىلىك، ءوزارا كومەك پەن ۇيىمشىلدىق جوعارى ناتيجەلەرگە قول جەتكىزۋ مۇمكىندىگىنىڭ كەپىلى ەكەنى ايتىلعان.
«كەز كەلگەن ەلدىڭ بولاشاعى جاستاردىڭ قولىندا. سوندىقتان سەندەرگە ۇلكەن جاۋاپكەرشىلىك جۇكتەلىپ وتىر. سەندەر ادال جانە ەڭبەكقور، اقىلدى ءارى باتىل، وتانىمىزدىڭ لايىقتى ازاماتتارى جانە ناعىز پاتريوتتارى بولۋلارىڭ كەرەك. بارلىعىڭ جيىنعا مۇقيات دايىندالىپ، جەڭىسكە جەتەم دەگەن نيەتپەن كەلدىڭدەر. مۇنداي جارىسقا قاتىسۋدىڭ ءوزى ءارقايسىڭ ءۇشىن ماڭىزدى جەتىستىك جانە ەستە قالارلىق وقيعا»، – دەلىنگەن.
قازاقستان قورعانىس ءمينيسترى گەنەرال-پولكوۆنيك رۋسلان جاقسىلىقوۆ ءوز سوزىندە حالىقتار اراسىنداعى بۇرىننان كەلە جاتقان بەرىك بايلانىس قاشاندا ءوزارا سەنىم مەن قولداۋعا نەگىزدەلگەن دوستىق قارىم-قاتىناستا بولعانىن اتاپ ءوتتى.
– قانشاما سىننان وتسەك ءبىز اتا-بابالارىمىزدىڭ داستۇرلەرىن، قۇندىلىقتارى مەن مادەني-رۋحاني مۇرالارىن ساقتاي الدىق. بۇگىنگى حالىقارالىق اسكەري-پاتريوتتىق جيىن – حالىقتار اراسىنداعى دوستىق پەن كورشى ەلدەرمەن تاتۋلىققا دەگەن ۇمتىلىستىڭ جارقىن دالەلى، – دەپ اتاپ ءوتتى ول.
گەنەرال-پولكوۆنيك رۋسلان جاقسىلىقوۆ جيىنعا قاتىسۋشىلارعا ءوز كۇشتەرىنە سەنىپ، ماقساتقا جەتۋدە تاباندىلىق تىلەدى.
ولار ءۇشىن كاسكادەرلەر شوۋى، باتىرلار ءبيى، «جاسا، ساعادات» مۋزىكالىق ءنومىرى، ورتالىق اسكەري وركەستر مەن قۇرمەت قاراۋىل روتاسىنىڭ دەفيلەسى بار مەرەكەلىك باعدارلاما دايىندالدى.
ارميا گەنەرالى ساعادات نۇرماعامبەتوۆكە ارنالعان «حالىق جۇرەگىندەگى قاھارمان» ەكسپوزيسياسى تۋرالى ق ر قارۋلى كۇشتەرى مەملەكەتتىك اسكەري-تاريحي مۋزەيى الماتى فيليالىنىڭ باستىعى الۋا بايقاداموۆا ايتىپ بەردى.
ءىس-شارادا قورعانىس ءمينيسترى گەنەرال-پولكوۆنيك رۋسلان جاقسىلىقوۆ «گەنەرال س.ق. نۇرماعامبەتوۆتىڭ اسكەري مۇراسى جانە ونىڭ قازىرگى زامانعى ماڭىزى» اتتى جاڭا كىتاپتى تانىستىردى.
ول 1ء-شى تۇركىستان پۋلەمەتشىلەر اسكەري ۋچيليششەسىنىڭ كۋرسانتىنان ارميا گەنەرالىنا دەيىنگى جاۋىنگەرلىك جولدان ءجۇرىپ وتكەن سوعىس باتىرىنىڭ تاۋەلسىز قازاقستان ارمياسىنىڭ قالىپتاسۋى مەن دامۋىنا قوسقان زور ۇلەسىن اتاپ ءوتتى.
– سول ءبىر قيىن ۋاقىتتارداعى ونىڭ جاۋىنگەرلىك تاجىريبەسى، اسكەريلەر اراسىنداعى جوعارى بەدەلى مەن وتانعا ءمىنسىز قىزمەت ەتۋدەگى ونەگەسى قارۋلى كۇشتەردى قۇرۋ مەن دەربەس دامىتۋدىڭ كەپىلى بولدى، – دەدى ول. – ارميا گەنەرالى ساعادات نۇرماعامبەتوۆتىڭ ەسىمى ەلىمىزدىڭ تاريحىنا التىن ارىپتەرمەن جازىلعان.
ءىس-شارا بارىسىندا «بىرلىك ورداسى» موبيلدى-ينتەراكتيۆتى ەكسپوزيسياسى كورسەتىلدى. وندا جيىنعا قاتىسۋشى ەلدەر مادەنيەتىنىڭ، داستۇرلەرى مەن ادەت-عۇرىپتارىنىڭ ەرەكشەلىكتەرىمەن تانىسۋعا بولادى. سونىمەن قاتار «جاس سارباز» رەسپۋبليكالىق اسكەري-پاتريوتتىق قوزعالىسىنىڭ ءتوراعاسى مايور مەيىربەك مەڭدىعالييەۆ «ساعادات» كوۆوركينگ-ايماعىن تانىستىردى.
جيىننىڭ بۇرناعى جىلدارداعى جەڭىمپازدارىمەن جانە جۇلدەگەرلەرىمەن بولعان كەزدەسۋدە «جاس سارباز» قوزعالىسىنىڭ قازىرگى تاربيەلەنۋشىلەرى ولاردىڭ ءومىر جولى قالاي ورىلگەنىن ەستىپ ءبىلدى. بۇگىندە ولاردىڭ كوپشىلىگى ەلىمىزدىڭ اسكەري وقۋ ورىندارىن ءبىتىرىپ ۇلگەرسە، ەندى ءبىرى كۋرسانت.
جيىننىڭ سالتاناتتى اشىلۋىنا دەيىن «ءالي» وقۋ-جاتتىعۋ ورتالىعىندا ۇلتتىق سپورت تۇرلەرىنەن، اك-74ء-تى تولىق بولشەكتەۋ مەن قۇراستىرۋدان ءبىرقاتار جارىستار ۇيىمداستىرىلدى. وعان قوسا جاس ونەرتاپقىشتار اراسىندا Smart Sarbaz بايقاۋى مەن «ايبىن دارىنى» زياتكەرلىك ويىنى ءوتتى.
جارىستار جالعاسۋدا. بۇل اپتا قارقىندى بولماق. اسكەري تەحنيكانىڭ، جابدىقتاردىڭ، سپورتتىق جابدىقتاردىڭ كورمەسى، كلۋبتاردىڭ قىزمەتى تۋرالى ستەندتەردىڭ ءبارىن 18–22 ماۋسىم ارالىعىندا قۇرلىق اسكەرلەرى اسكەري ينستيتۋتىنىڭ «ءالي» وقۋ-جاتتىعۋ ورتالىعىنان كورۋگە بولادى. سونداي-اق كونسەرتتەر، دارىستەر، سپورتتىق ويىندار، وت جاعۋ كەشتەرى جانە حالىق قاھارمانى تۋرالى فيلمدەر كورسەتۋ جوسپارلانعان.