الماتىدا جانارماي قۇيۋ بەكەتىنە شابۋىل جاساعان كۇدىكتىلەر قولعا ءتۇستى

قاسكويلەر 100 مىڭ تەڭگە مەن ەكى تەلەفوندى ولجالاعان.

جانارماي قۇيۋ بەكەتىنە جاسالعان قاراقشىلىق شابۋىل تۇنگى ساعات ەكى كەزىندە بولعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

«بەتپەردە كيگەن ەكى ادام قولدارىندا شەگە سۋىرعىش جانە بالتامەن جانار-جاعارماي قۇيۋ بەكەتىنە كىرىپ، كاسسير مەن كۇزەتشىنى ارتقى بولمەگە قاماپ، قىزمەتكەرلەردىڭ تەلەفوندارى مەن كاسساداعى اقشانى ۇرلاپ كەتكەن. شابۋىلداۋشىلاردىڭ بارلىق ارەكەتى بەينەباقىلاۋ كامەرالارىنا جازىلىپ قالعان. كۇدىكتىلەر سول كۇنى انىقتالىپ، قاماۋعا الىندى. بۇل – 23 جاستاعى ت. ەسىمدى ازامات جانە 22 جاستاعى م. ەسىمدى ازامات. بۇل دەرەك سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 191-بابى 2-بولىگى بويىنشا تىركەلدى»، – دەدى مەدەۋ اۋداندىق پب-عا قاراستى پوليسيا ءبولىمىنىڭ باستىعى ەلنۇر قۇدرەتبايەۆ.

قاسكويلەر – باسقا جاقتان كەلگەندەر. ولار الماتىعا جۇمىسقا ورنالاسۋ ءۇشىن كەلگەن، ءبىراق اقشا تابۋدىڭ بۇدان باسقا وڭاي جولىن ويلاپ تاپپاعان. شابۋىلداۋشىلار ۋاقىتشا ۇستاۋ يزولياتورىنا قامالدى. پوليسيا قىزمەتكەرلەرى ولاردىڭ جەكە باسىن بۇرىن جاسالعان قىلمىستارعا قاتىسى بار-جوعىنا تەكسەرىپ جاتىر.