الماتىنىڭ ەكى اۋدانىندا 3300 ورىندىق جاڭا مەكتەپتەر اشىلدى.
قالا اكىمى باقىتجان ساعىنتايەۆ جۇمىس ساپارى كەزىندە مەگاپوليستىڭ الاتاۋ جانە ناۋرىزباي اۋداندارىندا سالىنعان جاڭا وقۋ ورىندارىن ارالاپ كوردى، دەپ حابارلايدى Almaty-akshamy.kz
ب. ساعىنتايەۆ ناۋرىزباي اۋدانىنىڭ "قالقامان-2" شاعىناۋدانداعى 1800 ورىندىق №206 مەكتەپتى ارالاپ كوردى. مەكتەپتەر زاماناۋي جيھازدارمەن، قاجەتتى وقۋ قۇرىلعىلارىمەن جابدىقتالعان.
الماتى اكىمى ب. ساعىنتايەۆ الاتاۋ اۋدانىنىڭ "توميريس" شاعىناۋدانىندا سالىنعان №205 مەكتەپتە دە بولدى. وسى زاماناۋي مەكتەپتىڭ ىسكە قوسىلۋى 1500 وقۋشى ورنىنىڭ تاپشىلىعىن ازايتۋعا مۇمكىندىك بەردى.
وقۋ ورنى جيھازبەن جانە وقۋ تەحنيكاسىمەن تولىق جابدىقتالعان ءارى ءوزىنىڭ العاشقى وقۋشىلارىن كەلەسى توقساننان باستاپ قابىلداۋعا دايىن. قازىرگى كەزدە وقۋشىلاردىڭ ءتىزىمى جاسالۋدا.
ايتا كەتەرلىگى، جاڭا مەكتەپتەر تيپتىك جوبالار بويىنشا سالىنباعان. جوبالاۋ كەزىندە وقۋ ورىندارىنا قويىلاتىن جاڭا ستاندارتتار ارنايى ازىرلەنىپ، قابىلداندى. ولار زاماناۋي ساۋلەت، ويلاستىرىلعان كەڭىستىكتىك ديزاين، كەڭ سىنىپتار مەن قوعامدىق كەڭىستىكتەرى بار ەرگونوميكالىق ينتەرەرمەن ەرەكشەلەنەدى.
جوبا اۆتورلارى ءار ورىننىڭ اۋقىمدىلىعىنا قولجەتكىزۋدى ماقسات ەتتى. بۇعان بال ۇياسى ءتارىزدى كابينەتتەر ەسەبىنەن قول جەتكىزىلدى. بۇل نىسان ءۇي-جايلاردىڭ بارىنشا تابيعي جارىقتاندىرىلۋىن قامتاماسىز ەتۋگە مۇمكىندىك بەردى. كەڭ دالىزدەر مەكتەپ ىشىندە ەركىن جۇرۋگە مۇمكىندىك بەرەدى.
مۇندا بالالار مەن مۇعالىمدەردىڭ جايلىلىعى ءۇشىن بارلىعى جاسالعان. مەكتەپتەردە سپورت زالدارى، اسحانا، زەرتحانا جانە باسقا دا سىنىپتار قاراستىرىلعان. اۋماقتاردا ستاديوندار ورنالاسقان، بارلىق كەڭىستىكتەر بارىنشا كوگالداندىرىلعان.
مەكتەپتەر زاماناۋي Face ID قاۋىپسىزدىك جۇيەسىمەن جابدىقتالعان. اتا-انالار بالالاردىڭ كىرۋى مەن شىعۋى تۋرالى حابارلامالار الادى. ءۇش جاعىنان كىرەتىن جەكە توپتار ءقاۋىپسىز سانيتارلىق-ەپيدەميولوگيالىق رەجيمدى قامتاماسىز ەتۋگە مۇمكىندىك بەرەدى.
ەسكە سالساق، بۇرىندارى ناۋرىزباي اۋدانىننىڭ "اقجار" شاعىناۋدانىندا №186 مەكتەپتىڭ جاڭا كورپۋسى اشىلعان بولاتىن. كەلەسى جىلى "قالقامان" شاعىناۋداندا 1500 ورىندىق مەكتەپتىڭ، "قارعالى" شاعىناۋدانىنداعى «زەردە» جەكە مەنشىك مەكتەبىنىڭ، "شۇعىلا" شاعىناۋدانىندا 1200 جانە 1500 ورىندىق ەكى مەكتەپتىڭ، "قۇرامىس" شاعىناۋدانىندا 1200 ورىندىق مەكتەپتىڭ قۇرىلىستارىن اياقتاۋ، №15 ساناتورلىق-مەكتەپ ينتەرناتتى رەكونسترۋكسيالاۋ جوسپارلانعان.
سونىمەن قاتار، الاتاۋ اۋدانىندا بيىل 125 ورىندىق №166 مەكتەپتىڭ جاڭا كورپۋسى پايدالانۋعا بەرىلدى. "سايالى"، "نۇركەنت"، "دارحان" جانە "راحات-مادەنيەت" شاعىناۋداندارىندا 6300 ورىندىق 4 مەكتەپتىڭ قۇرىلىسى جۇرگىزىلۋدە. ولاردى 2022 جىلى تاپسىرۋ جوسپارلانعان.
سونىمەن قاتار، "سايالى-2" شاعىناۋدانىندا 550 ورىندىق جانە "زەردەلى" شاعىناۋدانىندا 600 ورىندىق مەكتەپ قۇرىلىستارىنىڭ جسق ازىرلەنۋدە. "شاپاعات" شاعىناۋدانىندا 600 ورىندىق مەكتەپ قۇرىلىسى ءۇشىن №150 مەكتەپكە ىرگەلەس جەر ۋچاسكەلەرىن ساتىپ الۋ بويىنشا جۇمىستار جۇرگىزىلۋدە.
جالپى، الماتىدا اعىمداعى جىلى قالالىق بيۋدجەت ەسەبىنەن 18 وقۋ ورنى سالىندى، وندا 11 563 وقۋشى ورنى قۇرىلدى.