2024 جىلدىڭ قورىتىندىسى بويىنشا الماتى قازاقستانداعى IT-سەكتوردىڭ دامۋى بويىنشا كوشباسشى بولىپ قالا بەرەدى.
قالا ەلدەگى بارلىق IT-قىزمەتتەردىڭ 52%-ىن قامتاماسىز ەتەدى، دەپ حابارلايدى aqshamnews.kz.
جالپى IT-نارىقتىڭ كولەمى 3089 ملرد تەڭگەنى قۇراسا، ونىڭ 1592 ملرد تەڭگەسى الماتىعا تيەسىلى. بۇل تۋرالى الماتى قالاسى سيفرلاندىرۋ باسقارماسى باسشىسىنىڭ ورىنباسارى مەيرام ديۋسيۋكوۆ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مالىمدەدى.
2022 جىلى «الماتى قالاسىنىڭ 2025 جىلعا دەيىنگى دامۋ باعدارلاماسى» بەكىتىلگەن بولاتىن. ونىڭ نەگىزگى باعىتتارىنىڭ ءبىرى – “Smart City” (اقىلدى قالا) كونسەپسياسى. وسى باعدارلامانىڭ اياسىندا ستارتاپتار مەن تەحنولوگيالىق جوبالار بەلسەندى تۇردە قولداۋ تابۋدا.
«ءبىز بۇگىنگە دەيىن ۇلكەن ناتيجەلەرگە قول جەتكىزدىك. 2024 جىلى 7 مىڭنان استام ادام اكسەلەراسيالىق باعدارلامالارعا قاتىستى، 2 مىڭنان استام جاڭا جۇمىس ورنى اشىلدى، ال تارتىلعان ينۆەستيسيا كولەمى 13،2 ميلليون اقش دوللارىن قۇرادى»– دەپ اتاپ ءوتتى ديۋسيۋكوۆ.
الماتىدا تەحنولوگيالىق كاسىپكەرلىك ەكوجۇيەسىن دامىتۋ جۇمىستارى جالعاسۋدا. قالادا يننوۆاسيالىق يدەيالاردى قولداۋ مەن ينۆەستورلاردى تارتۋعا باعىتتالعان “Smart City Accelerator”، “Almaty Innovation Challenge Hackathon” جانە “Startup Weekend” سىندى جوبالار ىسكە اسىرىلۋدا.
سونىمەن قاتار، قالادا جاساندى ينتەللەكت (AI) تەحنولوگيالارى ەنگىزىلۋدە. يي (AI) قالانىڭ جول قوزعالىسىن تالداۋعا، ازاماتتاردىڭ وتىنىشتەرىن وڭدەۋگە جانە قالالىق ينفراقۇرىلىمدى باسقارۋعا كومەكتەسەدى.