الماتىدا جاڭا بالەت تەاترىنىڭ قۇرىلىسى اياقتالدى

جالپى اۋماعى 14 مىڭ شارشى مەتردى قۇرايدى.

الماتىدا جاڭا بالەت تەاترىنىڭ قۇرىلىسى اياقتالىپ، پايدالانۋعا بەرىلدى، دەپ حابارلادى Almaty-akshamy.kz Almaty.tv سىلتەمە جاساپ.

مادەني عيماراتتىڭ جالپى اۋدانى 14 مىڭ شارشى مەتردى قۇراسا، كورەرمەن زالى 700 ادامعا ەسەپتەلگەن. «الماتى تەاترى» كلاسسيكالىق بالەت قويىلىمدارىنان بولەك، باسقا دا ءىس-شارالار وتكىزۋگە قاۋقارلى. «الماتى تەاترى» الەمدە ۇزدىك سانالاتىن بالەت ساحنالارىنان كەم تۇسپەيدى.

مۇندا ءتۇرلى فورماتتاعى پرەزەنتاسيالار مەن اۋقىمدى قويىلىمداردان باستاپ، تاڭعاجايىپ شوۋلارعا دەيىن ۇيىمداستىرۋعا بولادى. بەلگىلى ساراپشىلار مادەني عيماراتتىڭ وتە ساپالى سالىنعانىن ءارى زاماناۋي تالاپتارعا ساي ەكەنىن ايتادى.

«مۇندا ەدەن ارلەكيننەن جاسالعان، وتە ساپالى. ونى تەك بالەتتە قولدانادى. ساحناداعى ارتىستەردىڭ كەرەمەت سەزىمدى باستان كەشەرى ءسوزسىز. مۇنداعى جارىق تا بارلىق تەحنيكالىق تالاپقا ساي»،– دەدى قازاقستان حورەوگرافتار وداعى ءتوراعاسىنىڭ ءبىرىنش ورىنباسارى نۇرلان قوناقبايەۆ.

عيمارات الداعى ۋاقىتتا قالاداعى ءىرى ورتالىقتاردىڭ بىرىنە اينالارى ءسوزسىز. «الماتى تەاترىنىڭ» جالپى اۋماعى 14 مىڭ شارشى مەتردى قۇرايدى، 4 قاباتتان تۇرادى. زالعا 700 ادام ەركىن سىيىپ كەتەدى. ودان بولەك، ىشىندە مەيرامحانالار مەن ارنايى تاماقتاناتىن ورىندارعا دەيىن بار. ال مادەني ورتالىقتىڭ قاسبەتى تابيعي تاستارمەن قاپتالىپ، ساندىك ورنەكتەرمەن بەزەندىرىلگەن.