عالىم ۇندەۋ تاستادى.
تاۋەلسىزدىكتىڭ 30 جىلدىعى – ەلەۋلى بەلەس، ءبىراق قوعامنىڭ ساناسى ءالى دە ترانسفورماسيالانىپ جاتىر. بابالارىمىز «قاسقىر ءوز جاراسىن جالاپ جازادى» دەپ بەكەر ايتپاعان، ءبىز قاتەلىكتەن ساباق الا ءبىلۋىمىز قاجەت. مەملەكەت باسشىسىنىڭ توراعالىعىمەن وتكەن قازاقستان حالقى اسسامبلەياسىنىڭ «ەل بىرلىگى – جاڭارعان قازاقستاننىڭ تىرەگى» سەسسياسىندا ەۋرازيا ۇلتتىق ۋنيۆەرسيتەتىنىڭ پرورەكتورى، عالىم ديحان قامزابەك ۇلى وسىنداي ويلارىن ءبىلدىردى، دەپ حابارلايدى Almaty-akshamy.kz.
قازىرگى جۇمىسسىزدىقتىڭ كوزى مامانعا دەگەن قيسىندى مونيتورينگ پەن تاپسىرىستىڭ جوقتىعىندا ەكەنىنە توقتالعان عالىم الەمدە گۋبەرناتور، پرەفەكت، اكىم ءوز اۋماعىنا قانداي مامان كەرەك ەكەنىن ۋنيۆەرسيتەتپەن بىرىگىپ شەشەتىن يگى تاجىريبە بارىن ايتتى.
«مەن جوعارى وقۋ ورنىندا 30 جىلداي قىزمەت ىستەيمىن. ءدال وسى ماسەلەمەن ۋنيۆەرسيتەتكە كەلگەن بىردە-بىر اكىمدى كورگەن جوقپىن. مىنە، ماسەلەنىڭ ءبىر كىلتيپانى»، – دەپ قازىرگى تاڭداعى وزەكتى ماسەلەنى قوزعادى ول.
وسى ماسەلەنى شەشۋ ءۇشىن ديحان قامزابەك ۇلى جاستاردىڭ بويىندا «قوعامعا دەگەن جاۋاپكەرشىلىك يممۋنيتەتىن» قالىپتاستىرۋدى ءبىلىم سالاسى ماماندارى كاسىبي بورىشى رەتىندە ساناۋى كەرەك ەكەنىن ايتتى. سونىمەن قاتار، ەڭبەك كۇشىن الەۋمەتتىك تۇرعىدان قولداۋ ارقىلى يكەمدى ەل ەكونوميكاسىنىڭ دامۋىنا قاجەتتى جۇمىستارعا تارتۋدى كوزدەيتىن «فلەكسيكيۋريتي» (flexicurity) پرينسيپىنە سۇيەنگەن ەڭبەك نارىعى رەفورماسىن جۇرگىزۋ قاجەت.
جاستاردى جاڭا ىستەرگە جىگەرلەندىرۋ ءۇشىن ءبىلىم، مادەنيەت، بيلىك ورىندارى بىرلەسىپ قوعامدا ەلشىل اتا-انا قالىپتاستىرۋعا ايرىقشا ءمان بەرۋى ماڭىزدى. مىسالى، ەلورداداعى مۋزەيلەرگە، قازاق، ورىس تەاترىنا بىردە-بىر رەت بارماعان اتا-انالار از ەمەس. اتا-انانىڭ جۇرەك كوزى اشىلماسا، بالانىڭ جۇرەك كوزى قالاي اشىلادى؟
«ءقازىر ەلدەگى ەتنوستاردىڭ سانىن ايتۋ، جارنامالاۋ كوكەيكەستى ەمەس، «قازاقستان ءبىرتۇتاس!» دەگەن ۇعىمدى، تۇسىنىكتى ورنىقتىرۋ كوكەيكەستى. «قازاقستاندا ەشكىم تەگىنە، جىنىسىنا، ۇلتىنا، ناسىلىنە، تىلىنە، دىنىنە قاراپ بولىنبەيدى!» دەگەن شىنايى تەزيس ءماندى. ۇلتىمىزدىڭ ءبىر داناسى ءماشھۇر-جۇسىپ كوپەي ۇلى «كۇللى دەنەگە كۇش بەرىپ تۇراتۇعىن – جۇرەك» دەگەن ەكەن. الاش لەكسيكونىندا دا «اقجۇرەك» ءسوزى ءجيى كەزدەسەدى. مۇنىڭ ءبارى - قاسىم-جومارت كەمەل ۇلى كۇن تارتىبىنە قويعان ادىلەتتىلىك، ساباقتاستىق، ورلەۋ ۇعىمىنىڭ ارقاۋى»، – دەدى ول.
"ەندەشە شىنايىلىققا قۇشتار، اسىرەماقتاننان ادا، ءسوزى مەن ءىسى ءبىر جەردەن شىعاتىن قوعام بولۋدان جاڭىلمايىق!" - دەگەن ۇندەۋ تاستادى عالىم.