رەسپۋبليكا سارايىنىڭ ساحناسىندا جامبىل اتىنداعى قازاق مەملەكەتتىك اكادەميالىق فيلارمونياسىنىڭ 90 جىلدىعى اتالىپ ءوتتى.
سالتاناتتى گالا-كونسەرتتە مەملەكەت باسشىسى قاسىم-جومارت توقايەۆتىڭ قۇتتىقتاۋ حاتى وقىلدى. پرەزيدەنتىمىزدىڭ جىلى لەبىزىن الماتى قالاسى اكىمىنىڭ ورىنباسارى ابزال نۇكەنوۆ وقىپ بەردى.
“بۇل - ۇلتتىق مۋزىكا ونەرىنىڭ مەرەيلى بەلەسى. ايگىلى احمەت جۇبانوۆ نەگىزىن قالاعان فيلارمونيانىڭ عاسىرعا جۋىق ۋاقىت ىشىندە حالقىمىزدىڭ رۋحاني مۇراسىن جاڭعىرتۋعا، وركەنيەتىمىزدىڭ ءورىسىن كەڭەيتىپ، قازاقتىڭ ان-كۇيىن الەمگە تانىتۋعا زور ۇلەس قوستى. ۇلت رۋحانياتىندا ايرىقشا ءىز قالدىرعان كوپتەگەن تۇلعالارىمىز وسى كيەلى ساحنادا ونەر كورسەتتى. ونەگەلى ۇجىم بۇگىندە كاسىبي شەبەرلىگىن شىڭداپ، اعا بۋىننىڭ تاعىلىمدى جولىن جالعاستىرىپ كەلەدى. ءتول مادەنيەتىمىزدى پاش ەتىپ، قالىڭ كورەرمەننىڭ ىستىق ىقىلاسىنا بولەنىپ جۇرگەن فيلارمونيا قىزمەتكەرلەرىنە شىنايى ريزاشىلىعىمدى بىلدىرەمىن. بارشاڭىزعا اماندىق، شىعارماشىلىق شابىت تىلەيمىن. قۇرمەتپەن قاسىم-جومارت توقايەۆ”، - دەلىنگەن قۇتتىقتاۋ حاتتا.
ءىس-شارا باستالار الدىندا فيلارمونيا ارداگەرلەرى قىزىل كىلەممەن سان-سالتاناتپەن ءجۇرىپ ءوتتى. بۇل ءسات ايتۋلى كەشكە جينالعان، وسىناۋ بەكزات ونەردى باعىندىرعان تالانت يەلەرىنە ەرەكشە مەرەكەلىك كوڭىل-كۇي سىيلاعانى انىق.
سونداي-اق، الماتى قالاسى مۋزەيلەرىنىڭ بىرلەستىگى مەن قازاقستان رەسپۋبليكاسىنىڭ ۇلتتىق ورتالىق مۋزەيى فيلارمونيا تاريحى مەن نۇرعيسا تىلەندييەۆتىڭ شىعارماشىلىق مۇراسىنا ارنالعان كورمە ۇسىندى. الماتىلىقتار مەن قالا مەيماندارى ەلىمىزدەگى ەڭ بايىرعى مۋزىكالىق مەكەمەلەردىڭ بىرەگەيى سانالاتىن فيلارمونيانىڭ 90 جىلدا ءجۇرىپ وتكەن جولىنان سىر شەرتەتىن، ءۇنسىز سويلەيتىن، سيرەك كەزدەسەتىن مۇراعاتتىق فوتوسۋرەتتەر مەن ماتەريالداردى تاماشالادى.
ساراي ساحناسىندا ن.تىلەندييەۆ اتىنداعى «وتىرار سازى» مەملەكەتتىك فولكلورلىق-ەتنوگرافيالىق اكادەميالىق وركەسترى، ت.ابدىراشيەۆ اتىنداعى مەملەكەتتىك اكادەميالىق سيمفونيالىق وركەسترى، قازاقستان رەسپۋبليكاسىنىڭ مەملەكەتتىك ۇرمەلى وركەسترى، ب.بايقاداموۆ اتىنداعى مەملەكەتتىك حور كاپەللاسى، كلاسسيكالىق گيتاريستەردىڭ مەملەكەتتىك كۆينتەتى، عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتى، مەملەكەتتىك ۇرمەلى كۆينتەت، سونداي-اق تانىمال سوليستەر، دومبىراشىلار جانە پيانيستەر ونەر كورسەتتى.
“وسىناۋ عاجاپ ونەردى دارىپتەپ جۇرگەن ارىپتەستەرىمدى شىن جۇرەكتەن قۇتتىقتايمىن. احمەت جۇبانوۆتان باستاۋ العان مادەنيەت وشاعىنىڭ بۇگىنگىدەي ۇلكەن دەڭگەيگە جەتۋىندە ءارقايسىسىڭىزدىڭ ۇلەسىڭىز بار. كلاسسيكالىق جانە ءداستۇرلى قازاق ونەرىنە ولشەۋسىز ۇلەس قوسىپ جۇرگەن سىزدەرمەن ماقتانامىن!” - دەدى قازاقتىڭ بۇلبۇل ءانشىسى، كسرو-نىڭ جانە قازاقستاننىڭ حالىق ءارتيسى بيبىگۇل تولەگەنوۆا ونلاين-قۇتتىقتاۋىندا.
كونسەرت باعدارلاماسى ۇلتتىق جانە الەمدىك مۋزىكالىق كلاسسيكانىڭ اسىل جاۋھارلارىن ۇسىندى. كورەرمەندەر كورنەكتى قازاقستاندىق كومپوزيتورلار – نۇرعيسا تىلەندييەۆ، مۇقان تولەبايەۆ، ەركەعالي راحمادييەۆ، تىلەس قاجىعالييەۆ، اسقار بەستىبايەۆ، سونداي-اق ۇلى كلاسسيكتەر – ليۋدۆيگ ۆان بەتحوۆەن، نيكولاي ريمسكيي-كورساكوۆ، انتونيو ۆيۆالدي جانە پابلو ساراساتتىڭ شىعارمالارىن تىڭدادى.
بۇل كەشتە ن.تىلەندييەۆتىڭ «ماحامبەت» كۇيى، «ءوز ەلىم»، «قۇستار ءانى»، "و، تۋعان جەر"اندەرى، اڭىزعا اينالعان «اققۋ» كۇيى، ابايدىڭ «ايتىم سالەم، قالامقاسى»، م.تولەبايەۆتىڭ «ءبىرجان – سارا» وپەراسىنان مەرەكەلىك بي، سونداي-اق ليۋدۆيگ ۆان بەتحوۆەننىڭ 9-شى سيمفونياسىنان فراگمەنت ورىندالدى.
سونىمەن قاتار، ەكى فورتەپيانوعا ارنالعان شىعارمالار دا بەكزات ونەردىڭ ادەمى الەمىن پاش ەتتى.
گالا-كونسەرت قازاقستاندىق مۋزىكا مەكتەبىنىڭ داستۇرلەرىن، شەبەرلىگىن جانە 90 جىلدىق تاريحىن بىرىكتىرە وتىرىپ، ەلىمىزدىڭ مادەني ومىرىندەگى ەڭ جارقىن وقيعالاردىڭ ءبىرى بولىپ جازىلدى تاريح پاراعىنا.
ايتا كەتەيىك، 90 جىلدان بەرى تاريح تۇزگەن حالىقتىق مۇرامىزعا ادال بولىپ، كلاسسيكالىق زاماناۋي مۋزىكا ونەرىنىڭ دە كوشىن سۇيرەپ كەلە جاتقان جامبىل اتىنداعى قازاق مەملەكەتتىك اكادەميالىق فيلارمونياسى – الماتىنىڭ كونسەرتتىك-ساحنالىق مادەني وشاعى. ول 1935 جىلعى قاڭتاردا قۇرىلعان. باستاپقىدا قازاق مۋزىكاتانۋشىسى، اكادەميك احمەت جۇبانوۆ ولكەلىك كوركەمدىك-كونسەرتتىك ۇيىم رەتىندە ۇيىمداستىرعان. ال جىر الىبى جامبىل جابايەۆتىڭ ەسىمى فيلارمونياعا 1938 جىلى بەرىلگەن.