ەكو-بەلسەندىلەردىڭ باستاماسىمەن الماتىدا «جاڭا قازاقستان.تازا تابيعات» اتتى جالپىقالالىق سەنبىلىك ءوتتى، دەپ حابارلايدى Almaty-akshamy.kz
21 قازان كۇنى الماتىدا «جاڭا قازاقستان. تازا تابيعات» اتتى كەڭ اۋقىمدى قالالىق سەنبىلىك ءوتتى. الماتى قالاسى ءماسليحاتىنىڭ دەپۋتاتتارى مەن ەكوبەلسەندىلەر باستاماشى بولعان اكسيا رەسپۋبليكا كۇنىن تويلاۋعا ورايلاستىرىلعان.
سەنبىلىك بارىسىندا دەمالىس ايماقتارى، ساياباقتار، سكۆەرلەر، اۋلا اۋماقتارى تازارتىلدى، 5 مىڭ تەكشە مەترگە جۋىق قوقىس جينالدى، 9 مىڭنان استام اعاش وتىرعىزىلدى. ەكولوگيالىق ناۋقانعا 34 مىڭنان استام قالا تۇرعىنى قاتىسىپ، 239 تەحنيكا جۇمىلدىرىلدى.
نەگىزگى ءىس-شارالار «كوك-توبە» تاۋىنىڭ باۋرايىندا، ALA ساياباعىندا، الماتى يندۋستريالىق ايماعى مەن «باتىس» زيراتىنىڭ سانيتارلىق-قورعاۋ ايماعى اراسىنداعى ۋچاسكەدە جانە كوكقاينار شاعىن اۋدانىنداعى بورالداي وزەنىنىڭ جاعاسىنداعى ءوتتى.
الماتى اكىمدىگى كوشەت ەگۋ مەن تازالاۋعا قاجەتتى قۇرال-جابدىق (قولعاپ، قاپ، كۇرەك، تىرما) ۇسىنىپ، ناۋقان قاتىسۋشىلارىن اۋىز سۋمەن جانە تاماقپەن قامتاماسىز ەتىپ، جينالعان قوقىستى پوليگونعا شىعاردى. اۋماقتا مادەني-ويىن-ساۋىق باعدارلاماسى ۇيىمداستىرىلدى.
جالپىقالالىق ناۋقانعا اۋدان اكىمدىكتەرى دە اتسالىستى، ولار ءوز اۋماقتارىندا كوممۋنالدىق قىزمەتتەرمەن بىرىگىپ تۇركسىب اۋدانىندا ءۇاا بويىنداعى باۋم توعايىندا، جاس قانات شاعىن اۋدانىندا، جەتىسۋ اۋدانىنداعى اينابۇلاق-4 شاعىن اۋدانىندا، مەدەۋ اۋدانىنداعى «كوك-توبە» باۋرايىندا، المالى اۋدانىنداعى سايران كولىنىڭ شىعىس جاعالاۋىندا، اۋەزوۆ اۋدانىندا سايران كولىنىڭ باتىس جاعالاۋىندا، الاتاۋ اۋدانىندا بورالداي وزەنىنىڭ جاعاسىندا، بوستاندىق اۋدانىندا «دوستىق» ساياباعىنىڭ اۋماعىندا، ناۋرىزباي اۋدانىنداعى شۇعىلا شاعىن اۋدانىندا جەرگىلىكتى سەنبىلىكتەر وتكىزدى.