قازان ايىنان باستاپ ەلىمىزدىڭ كەيبىر ايماقتارىندا اۋا رايى كۇرت وزگەرەدى. ءىىم وسىعان بايلانىستى جۇرگىزۋشىلەرگە ۇندەۋ جاسادى، دەپ حابارلايدى almaty-akshamy.kz.
"قىس مەزگىلىنىڭ باستالۋىمەن جولداعى كولىك ءجۇرىسى دە ەرەكشە نازار اۋدارۋدى قاجەت ەتەدى. جىلدامدىقتى اسىرماڭىز! ءقاۋىپسىز قاشىقتىقتى ساقتاڭىز! ەگەر قىسقى جۇرگىزۋ ەلەمەنتتەرى تۋرالى تولىعىراق ايتاتىن بولساق، وندا جىلدامدىقتى شامامەن ساعاتىنا 10-15 شاقىرىمعا ازايتۋ كەرەك، ال كولىك اراسىنداعى قاشىقتىق 3-4 اۆتوكولىك بولۋعا ءتيىس. مىنە، وسىنداي ۇساق-تۇيەكتەردىڭ ءوزى جول جاعدايى كۇرت وزگەرگەن كەزدە جۇرگىزۋشىگە دۇرىس شەشىم قابىلداۋعا كومەكتەسەدى"، دەدى ق ر ءىىم اپك ەرەكشە تاپسىرمالار جونىندەگى اعا ينسپەكتورى اقتوتى بورانوۆا
اقتوتى بورانوۆانىڭ ايتۋىنشا، قيىلىستاردا باعدارشامنىڭ جاسىل تۇسىنە جىلدام قوزعالۋ – قىسقى ۋاقىتتا جۇرگىزۋشىلەردىڭ نەگىزگى قاتەلىكتەرىنىڭ ءبىرى.
ول كولىك جۇرگىزۋشىلەرىنە مىناداي كەڭەستەردى بەردى:
جولعا نازار اۋدارىڭىز، كولىك جۇرگىزۋ كەزىندە تەلەفونعا تەلمىرمەڭىز جانە كولىك باسقارۋمەن بايلانىسى جوق نارسەلەرگە الاڭداماڭىز. ەسىڭىزدە بولسىن، كولىكتى كەنەتتەن تەجەۋ باسقارۋ مۇمكىندىگىن جوعالتۋعا اكەپ سوعادى؛
جول ءجۇرىسى قاعيدالارىن، جىلدامدىق رەجيمىن جانە قاشىقتىقتى ساقتاڭىز، كەنەتتەن مانيەۆر جاساۋ مەن باسىپ وزۋدان اۋلاق بولىڭىز، جول بويىنداعى جاياۋ جۇرگىنشىلەرگە وتە مۇقيات بولىڭىز، اينالاڭىزداعى جول جاعدايىن ۇنەمى باقىلاۋدا ۇستاڭىز؛
زاڭناماعا سايكەس قىس مەزگىلىندە (جەلتوقسان، قاڭتار، اقپان) قىسقى شينالارمەن جابدىقتالماعان كولىك قۇرالدارىن پايدالانۋعا تىيىم سالىناتىنىن ەسكە سالامىز. قىسقى شينالار كولىك قۇرالىنىڭ بارلىق دوڭگەلەكتەرىنە ورناتىلۋى قاجەت؛
اۆتوكولىك يەلەرى اۋا رايىنىڭ وزگەرۋىن مۇقيات قاداعالاپ وتىرۋى كەرەك، ەگەر اۋا رايى ناشارلاسا، ەلدى مەكەندەردەن تىس جەرلەرگە شىعۋدى شەكتەگەن دۇرىس؛
جاياۋ جۇرگىنشىلەر قىستا كولىك تەز توقتاي المايتىنىن ەستە ۇستاعاندارى ابزال، سوندىقتان كوشەنى كەسىپ وتكەندە سىزگە جول بەرگەنىنە كوز جەتكىزىپ، سودان كەيىن عانا ءجۇرىستى جالعاستىرىڭىز؛
ساق بولىڭىز، تەلەفونمەن سويلەسۋگە جانە باسقا حابارلامالاردى كورۋگە الاڭداماڭىز.
"ءوز كەزەگىندە پوليسيانىڭ جەكە قۇرامىنا قىزمەت اتقارۋ بارىسىندا قيىن جاعدايعا تاپ بولعان جانداردىڭ بارلىعىنا كومەك كورسەتۋ تاپسىرىلدى. جولدارىڭىز ءقاۋىپسىز بولسىن!"، - دەدى اقتوتى بورانوۆا.