ناعىز پوليسيا ماماندارى قالا تۇرعىندارىن ساق بولۋعا شاقىردى.
الماتى قالالىق پوليسيا دەپارتامەنتى باستىعىنىڭ ورىنباسارى رۋستام ءابدىراحمانوۆ تۇرعىنداردى ينتەرنەت-الاياقتاردان ساق بولۋعا شاقىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قىلمىسكەرلەر مىنانداي سحەمامەن ارەكەت ەتەدى: ولار ۇيالى تەلەفونعا قوڭىراۋ شالىپ، ءوزىن پوليسيا قىزمەتكەرىمىن دەپ تانىستىرادى. سونىڭ ىشىندە مەنىڭ دە اتىمدى اتاۋى مۇمكىن. سودان كەيىن ءسىزدىڭ اتىڭىزعا نەسيە الماق بولعان الاياقتاردى ۇستاۋ ءۇشىن ءقازىر ارنايى وپەراسيا جۇرگىزىلىپ جاتقانىن ەسكەرتەدى»،- دەپ جازدى رۋستام ءابدىراحمانوۆ ءوزىنىڭ تەلەگرام-كانالىندا.
رۋستام ءابدىراحمانوۆتىڭ ايتۋىنشا، «جالعان پوليسيا قىزمەتكەرلەرى» ءقازىر ق ر ۇلتتىق بانكىمەن بىرلەسىپ جۇمىس ىستەيتىنىن حابارلاپ، ءدال سول كەزدە ولارمەن بايلانىساتىنىن ايتىپ، جەلىدە قالۋدى سۇرايدى. بۇل – الاياقتاردىڭ تاعى ءبىر ارەكەتى.
«ودان كەيىن تەلەفوننىڭ ارعى جاعىنداعى ادام ءسىزدىڭ كارتاڭىزعا رۇقساتسىز اقشا اۋدارۋ ارەكەتتەرى ءجۇرىپ جاتقانىن جانە اقشاڭىزدى ساقتاۋ ءۇشىن بانك شوتىنا نەمەسە ءۇشىنشى تۇلعالاردىڭ شوتىنا بەلگىلى ءبىر سومانى سالۋ كەرەك ەكەنىن ايتىپ، ۇگىتتەيدى»،- دەپ اتاپ ءوتتى پوليسيا وكىلى.
الماتى قالالىق پوليسيا دەپارتامەنتى باستىعىنىڭ ورىنباسارى پوليسيا قىزمەتكەرلەرى ەشقاشان تەلەفون ارقىلى ارنايى وپەراسيالار مەن تەرگەۋ ارەكەتتەرىن جۇرگىزبەيتىنىن ەسكەرتتى.
«مۇنداي جاعدايلاردا تەلەفونمەن سويلەسۋدى توقتاتىپ، بانك كارتاسىندا نەمەسە بانك سايتىندا كورسەتىلگەن سەنىمدى نومىرگە قايتا قوڭىراۋ شالۋ كەرەك. قانداي جاعداي بولماسىن بانك كارتاڭىزدىڭ دەرەكتەرىن، سونىمەن قاتار جەكە باسىڭىزعا قاتىستى مالىمەتتەرىڭىزدى ەشكىمگە ايتپاڭىز، جىبەرمەڭىز»، – دەدى رۋستام ءابدىراحمانوۆ.