الماتى قالاسىندا حالىقتى الداپ، جيھاز جاسايمىن دەگەن جەلەۋمەن اقشا تاپقان الاياق ۇستالدى.
"Anti Fraud" جەدەل-ىزدەستىرۋ ءىس-شاراسى بارىسىندا مەدەۋ اۋداندىق پوليسيا باسقارماسىنىڭ قىزمەتكەرلەرى 40 جاستاعى ەر ادامنىڭ قۋلىعىن اشكەرەلەدى، دەپ حابارلايدى aqshamnews.kz Polisia.kz-كە سىلتەمە جاساپ.
ول ءوز قىزمەتىن نارىقتاعى باعادان الدەقايدا تومەن ۇسىنىپ، تاپسىرىستى قىسقا مەرزىمدە ورىندايتىنىن ايتىپ، تۇرعىنداردىڭ سەنىمىنە كىرگەن. الايدا ۋادە ەتىلگەن جيھاز جاسالماي، كليەنتتەردىڭ اقشاسى دا قايتارىلماعان.
— قازىرگى تاڭدا ونىڭ كەمىندە 8 ادامدى الداعانى انىقتالدى. جالپى شىعىن كولەمى شامامەن 5 ميلليون تەڭگەنى قۇرايدى. دەگەنمەن جابىرلەنۋشىلەر سانى بۇدان دا كوپ بولۋى مۇمكىن. ويتكەنى كەيبىر ازاماتتار ءتۇرلى سەبەپتەرمەن پوليسياعا ارىزدانباعان بولۋى ىقتيمال. قالاي بولعاندا دا اتالعان دەرەك بويىنشا سوتقا دەيىنگى تەرگەۋ باستالدى. ۇستالعان ازامات قاماۋعا الىندى. ايتا كەتۋ كەرەك، ول قۇرباندارىن نەگىزىنەن ينتەرنەت ارقىلى تاپقان، — دەيدى مەدەۋ اۋداندىق پوليسيا باسقارماسىنىڭ باستىعى ءىلياس ومىرسەرىكوۆ.
الماتى قالالىق پوليسيا دەپارتامەنتى ازاماتتاردى ساق بولۋعا، تاۋار نەمەسە قىزمەت ءۇشىن الدىن الا تولەم جاساۋدان بۇرىن، ساتۋشىنىڭ سەنىمدىلىگىنە كوز جەتكىزۋگە شاقىرادى. ەگەر ءسىز وسىنداي الاياقتىق ارەكەتتەردىڭ قۇربانى بولساڭىز، دەرەۋ پوليسياعا حابارلاسىڭىز.