ءداستۇرلى شارا اياسىندا 50-گە تارتا تۋىندى ساراپقا سالىنادى.
بيىل فەستيۆالعا الەمنىڭ 15 مەملەكەتىنەن انيماتور ماماندار كەلگەن، دەپ حابارلايدى Almaty-akshamy.kz 24.kz-كە سىلتەمە جاساپ.
"ولاردىڭ قاتارىندا «بەكزات»، «باتىر ۇشقىشتار»، «تەنتەكتەر» اتتى وتاندىق انيماسيالىق فيلمدەر دە بار. قازاق انيماسيا ونەرىنىڭ اياقالىسى قۋانتادى، مامانداردىڭ دا الەۋەتى جوعارى"، - دەيدى ساراپشىلار.
فەستيۆال اياسىندا پولشا، فرانسيا، گرۋزيا، يسپانيا، وزبەكستان، جۇڭگو، ءازىربايجان، رەسەي جانە قازاقستاننىڭ انيماتورلارى تۇسىرگەن تۋىندىلاردى كونستانتين برونزيت باسقاراتىن بىلىكتى قازىلار القاسى تارازىلايدى. فەستيۆال مەيىرجان ساندىبايدىڭ «شىراق» قىسقامەتراجدى انيماسيالىق فيلمىمەن اشىلدى.
ايتا كەتەيىك، بيىل قازاق انيماسيا ونەرىنە - 55 جىل. «قارلىعاشتىڭ قۇيرىعى نەگە ايىر؟» اتتى تۇڭعىش قازاق ءمۋلتفيلمى 1967 جىلى ەكرانعا شىققان بولاتىن.
«توعىز نوميناسيا بار. بيىلعى جىلى گران-پريدان باستاپ "ۇزدىك سەناريي"، "ۇزدىك كوركەمدىك شەشىم"، "ۇزدىك فيلم"، "ۇزدىك سەريال"، "ۇزدىك ستۋدەنتتىك جۇمىس" دەگەن سياقتى اتالىمدار بار. ءبىز بيىل ەكى بىردەي جاڭا سىيلىقتى تاعايىندادىق. ول امەن حايداردىڭ اتىنداعى ارنايى سىيلىق جانە وسى فەستيۆالدى ۇيىمداستىرىپ جاتقان قاۋىمداستىقتىڭ ارنايى سىيلىعى»، - دەدى اmen انيماسيالىق فيلمدەر فەستيۆالىنىڭ تەڭ پرەزيدەنتى اداي ابەلدينوۆ.
«تالانتتى جاستار، تالانتتى ستۋديالار بار. امەريكادان، ەۋروپادان زاكاز الىپ ىستەپ جاتقان، جاپونيا، رەسەيدىڭ دە انيماسيالىق فيلمدەرىنىڭ جاسالۋىنا اتسالىسىپ جاتقان تالانتتى جاستاردى جاقسى بىلەمىز. سولاردىڭ ىشىندە ءوزىمنىڭ شاكىرتتەرىم دە، ستۋدەنتتەرىم دە بار. بۇل قازاقستانداعى انيماسيالىق كينو سالاسى ماماندارىنىڭ قابىلەتىنىڭ دە، تالانتىنىڭ دا جەتكىلىكتى ەكەنىن كورسەتەدى»، - دەدى «قازاقانيماسيا» شىعارماشىلىق بىرلەستىگىنىڭ جەتەكشىسى جانىبەك ورازالى.