قازاقستان رەسپۋبليكاسىنىڭ ىشكى ىستەر ءمينيسترى ەرجان سادەنوۆ الماتى قالاسىنا جۇمىس ساپارى اياسىندا 2023 جىلى ءىىم باستاماسىمەن قۇرىلعان تالىمگەرلەر كەڭەسىنىڭ مۇشەلەرىمەن كەزدەسۋ وتكىزدى.
ءمينيستردىڭ ايتۋىنشا، بۇل باستاما رەسپۋبليكا كولەمىندە كەڭىنەن قولداۋ تاۋىپ، بۇگىندە ەلىمىزدىڭ ءار وڭىرىندە 65 تالىمگەرلىك كەڭەس تابىستى جۇمىس ىستەۋدە. وتكەن جىلى عانا اۋداندىق كەڭەستەردىڭ 821 وتىرىسى وتكىزىلىپ، ىشكى ىستەر ورگاندارىنىڭ قىزمەتىن جەتىلدىرۋ، ءتارتىپ پەن زاڭدىلىقتى قامتاماسىز ەتۋ ماسەلەلەرى جان-جاقتى تالقىلانعان، دەپ حابارلايدى aqshamnews.kz Polisia.kz-كە سىلتەمە جاساپ.
– 2023 جىل كادر رەسۋرستارىن جاقسارتۋ جىلى بولىپ جاريالانعان ەدى. وسىعان وراي، ءىىم باسشىلىعى ارداگەرلەردى جەكە قۇراممەن تاربيە جۇمىسىنا بەلسەندى تارتۋ مىندەتىن العا قويدى. بۇگىندە الماتى قالاسىندا ءىىم-نىڭ قۇرمەتتى قىزمەتكەرلەرى سانالاتىن 13 ارداگەر پوليسيا دەپارتامەنتىنىڭ بارلىق قىزمەتتەرى مەن بولىمشەلەرىنىڭ كۋراتورلارى رەتىندە بەكىتىلگەن، – دەدى ەرجان سادەنوۆ.
مينيستر تالىمگەرلەر كەڭەسىنىڭ قىزمەتىنە جوعارى باعا بەرە وتىرىپ، ارداگەرلەردىڭ جاس قىزمەتكەرلەرگە ادامگەرشىلىك، پاتريوتتىق جانە كاسىبيلىك باعىتىنداعى تاربيە بەرۋدەگى ماڭىزدى ءرولىن اتاپ ءوتتى.
– قۇرمەتتى ارداگەرلەر! سىزدەر جاس پوليسەيلەرگە وتانعا دەگەن سۇيىسپەنشىلىكتى، ادالدىق پەن جوعارى كاسىبيلىكتى سىڭىرۋدە باعا جەتپەس ۇلەس قوسىپ كەلەسىزدەر. مەملەكەت تاۋەلسىزدىگىنىڭ باستاۋىندا تۇرىپ، قازاقستان پوليسياسىنىڭ قالىپتاسۋىنا اتسالىسقان سىزدەردىڭ ومىرلىك تاجىريبەلەرىڭىز، دانالىقتارىڭىز جانە بىلىكتىلىكتەرىڭىز بۇگىندە جاڭا فورماتتاعى پوليسيا قىزمەتكەرلەرىن تاربيەلەۋ ىسىندە ەرەكشە ماڭىزعا يە، – دەدى مينيستر.