«تازا قازاقستان» رەسپۋبليكالىق باعدارلاماسى اياسىندا الماتىدا ءىرى كولەمدى قوقىستاردى شىعارۋ بويىنشا ءتۇسىندىرۋ جۇمىستارى جۇرگىزىلۋدە
«تازا قازاقستان» رەسپۋبليكالىق باعدارلاماسى اياسىندا الماتى قالاسىنىڭ ەكولوگيا جانە قورشاعان ورتا باسقارماسى پوليسيا دەپارتامەنتىمەن بىرلەسىپ ءىرى كولەمدى قوقىستى شىعارۋ ەرەجەلەرىن ءتۇسىندىرۋ بويىنشا اۋقىمدى جۇمىس جۇرگىزۋدە، دەپ حابارلايدى aqshamnews.kz
قالا اۋماعىن كورىكتەندىرۋ ەرەجەسىن ساقتاۋ ءۇشىن ءىرى كولەمدى قوقىستاردى جينايتىن نەگىزگى ورىنداردا قوسىمشا بەينەباقىلاۋ كامەرالارى ورناتىلدى. سونداي-اق، قالادا تازالىقتى ساقتاۋ قاجەتتىلىگى تۋرالى بەينەروليكتەر كورسەتىلىپ جاتىر، جەكە جانە زاڭدى تۇلعالاردىڭ الماتى قالاسىنىڭ اۋماعىن كورىكتەندىرۋ قاعيداسىنىڭ تالابىن بۇزۋ فاكتىسىن انىقتاۋ جانە تۇرعىنداردىڭ كونتەينەرلىك الاڭعا ءىرى كولەمدى قوقىستى شىعارماۋ بويىنشا رەيدتەر ۇيىمداستىرىلدى.
الماتىدا بۇگىندە تۇرعىنداردىڭ كونتەينەرلىك الاڭنىڭ ىرگەلەس اۋماعىنا تۇرمىستىق تەحنيكا، سانتەحنيكالىق بۇيىمدار جانە باسقا دا ىستەن شىققان ەسكى جيھاز سىندى ءىرى كولەمدى قوقىستاردى تاستاۋ ماسەلەسى بار. سونىمەن قاتار، قوقىس جاشىكتەرىنىڭ جانىندا پليتكا، كىرپىش جانە ت. ب. قۇرىلىس قالدىقتارىن كورۋگە بولادى.
قوقىس شىعاراتىن ماشينالار ءىرى كولەمدەگى قوقىستار مەن قۇرىلىس قالدىقتارىن شىعارا المايدى، ويتكەنى بۇل قوقىس تاسيتىن ماشينالاردىڭ پرەستەۋ اپپاراتىن ىستەن شىعارۋى مۇمكىن.
كوممۋنالدىق قالدىقتاردى باسقارۋ قاعيداسىنا سايكەس جىلجىمايتىن نىسانداردى سالۋدى جانە (نەمەسە) جوندەۋدى جۇزەگە اسىراتىن جەكە جانە زاڭدى تۇلعالار قۇرىلىس جانە ءىرى كولەمدى قالدىقتاردى (جيھاز، تۇرمىستىق تەحنيكا) ارنايى بولىنگەن ورىندارعا وزدەرى اپارۋى كەرەك.
الماتى قالاسىنىڭ اۋماعىن كورىكتەندۋرى ەرەجەسىنە سايكەس ءىرى كولەمدى قوقىستاردى (قالدىقتاردى) شىعارۋدى ءىرى كولەمدى قوقىستاردى شىعارۋ شارتى نەگىزىندە كاسىپورىنداردىڭ، مەكەمەلەردىڭ جانە جەكە تۇلعالاردىڭ وزدەرى نە قوقىس شىعاراتىن كاسىپورىندار جۇرگىزەدى.
وسىلايشا، ۇيىنە جوندەۋ جۇرگىزەتىن تۇرعىندار، سونداي-اق ءىرى كولەمدى قوقىس پايدا بولعان كەزدە مامانداندىرىلعان ۇيىمدارعا حابارلاسىپ، اقىلى تەحنيكانى شاقىرۋى نەمەسە قالدىقتاردى پوليگونعا ءوز بەتىنشە شىعارۋى كەرەك. پوليگوندار الماتى وبلىسىنىڭ ىلە جانە قاراساي اۋداندارىندا ورنالاسقان.
ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 505-بابىندا كورىكتەندۋرى ەرەجەلەرىن بۇزۋ جەكە تۇلعالارعا – جيىرما، شاعىن كاسىپكەرلىك سۋبەكتىلەرىنە نەمەسە كوممەرسيالىق ەمەس ۇيىمدارعا – وتىز، ورتا كاسىپكەرلىك سۋبەكتىلەرىنە – قىرىق، ءىرى كاسىپكەرلىك سۋبەكتىلەرىنە – ءجۇز ايلىق ەسەپتىك كورسەتكىش مولشەرىندە ەسكەرتۋ جاساۋعا نەمەسە ايىپپۇل سالۋعا اكەلەتىنىن ەسكەرۋ قاجەت