الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ وڭىرلىك كوممۋنيكاسيالار قىزمەتىندە وتكەن باسپا ءسوز جيىنىندا ينكليۋزيۆتى قالالىق ورتانى دامىتۋ جانە مۇمكىندىگى شەكتەۋلى ازاماتتاردىڭ ەركىن قوزعالىسىن قامتاماسىز ەتۋ شارالارى تۋرالى ايتتى.
بيىل ينۆاتاكسي قىزمەتىن پايدالانا الاتىن ازاماتتار ءتىزىمى كەڭەيدى. ەندى بۇل قىزمەتتى تەك تىرەك-قيمىل اپپاراتى بۇزىلعان ادامدار عانا ەمەس، سونداي-اق ءوزىن-وزى كۇتۋ مەن مىنەز-قۇلقىن باقىلاۋ قابىلەتى شەكتەۋلى اۋىر پسيحيكالىق اۋىتقۋى بار ازاماتتار دا پايدالانا الادى.
جاڭا ساناتتاردى قامتۋ ءۇشىن جەرگىلىكتى بيۋدجەتتەن قوسىمشا 83 ميلليون تەڭگە ءبولىندى. بۇل ءوز كەزەگىندە قىزمەت كورسەتىلەتىن ادامدار سانىن ارتتىرۋعا مۇمكىندىك بەرەدى.
«ينۆاتاكسي قىزمەتىن كەڭەيتۋ – ءار تۇرعىن ءوز ورنىن قوعامنان تابا الاتىن، ناعىز ينكليۋزيۆتى قالا قۇرۋ جولىنداعى ماڭىزدى قادام»، - دەدى باۋىرجان جاۋباسوۆ.
سونداي-اق ول جاياۋ جۇرگىنشىلەر وتكەلدەرىندەگى ليفتىلەر مەن كوتەرگىشتەردىڭ قولجەتىمدىلىگىنە دە كوڭىل ءبولىنىپ جاتقانىن اتاپ ءوتتى. ءقازىر الماتىداعى 126 وتكەلدىڭ 57-سىندە وسىنداي قۇرىلعىلار ورناتىلعان. ازاماتتار ولارعا جەكە كىلت ارقىلى قول جەتكىزە الادى، ونى اۋدان اكىمدىكتەرى ءوتىنىش نەگىزىندە بەرەدى.
2025 جىلى اۋەزوۆ اۋدانىندا پيلوتتىق تۇردە “وڭاي” جۇيەسى ەنگىزىلدى. ول كوتەرگىشتەر مەن ليفتىلەرگە جەكە كارتا ارقىلى تەگىن قول جەتكىزۋگە مۇمكىندىك بەرەدى. كارتا يەسىنىڭ مارتەبەسىن اۆتوماتتى تۇردە انىقتاپ، پايدالانۋ قۇقىعىن راستاۋ جۇيەسىن قامتاماسىز ەتەدى.
«بۇل جۇيە پروسەستى بارىنشا جەڭىلدەتەدى. “وڭاي” كارتاسىن تەرمينالعا تيگىزۋ جەتكىلىكتى، كوتەرگىش اۆتوماتتى تۇردە ىسكە قوسىلادى»، - دەدى باۋىرجان جاۋباسوۆ.
پيلوتتىق جوبا وڭ ناتيجە كورسەتسە، 2026 جىلى “وڭاي” جۇيەسىن قالا بويىنشا كەڭەيتۋ جوسپارلانۋدا. بۇل مۇمكىندىگى شەكتەۋلى ازاماتتار ءۇشىن قالالىق ينفراقۇرىلىمنىڭ قولجەتىمدىلىگىن ايتارلىقتاي ارتتىرادى.