الماتىدا 2025 جىلى ەرەكشە قاجەتتىلىگى بار ازاماتتارعا ارنالعان مادەني باستامالاردىڭ سانى ايتارلىقتاي ارتتى، دەپ حابارلايدى aqshamnews.kz
بۇل تۋرالى قالالىق مادەنيەت باسقارماسى مالىمدەدى.
«الاتاۋ» ءداستۇرلى ونەر تەاترى جانىنداعى كورۋ جانە ەستۋ قابىلەتى بۇزىلعان ازاماتتاردىڭ مادەني دەمالىسىن ۇيىمداستىرۋ ءبولىمى شىعارماشىلىق بەلسەندىلىكتى قولداۋعا جانە قالا تۇرعىندارىنىڭ مادەني ومىرگە قاتىسۋىن كەڭەيتۋگە باعىتتالعان 132 ءىس-شارا وتكىزدى.
ءبولىم جانىندا بىرنەشە شىعارماشىلىق ۇجىم جۇمىسىن جالعاستىرۋدا: «اتامۇرا» حالىق اسپاپتار ءانسامبلى، «ارمانداستار»، «ان-جۇرەك» جانە «دوس» ۆوكالدى-اسپاپتى انسامبلدەرى. جىل بويى ولار «اق قايىڭ»، «سپۋتنيك»، «كوكتەم» شيپاجايلارىندا جانە ۇلى وتان سوعىسىنىڭ ارداگەرلەرىنە ارنالعان رەسپۋبليكالىق گوسپيتالدە كونسەرتتەر قويدى.
زاعيپ جاندارعا ارنالعان مادەنيەت ۇيىندە ءقادىر مىرزالييەۆتىڭ 90 جىلدىعىنا، مۇقاعالي ماقاتايەۆتىڭ تۋعان كۇنىنە، ەسكەندىر حاسانعالييەۆتىڭ 85 جىلدىعىنا جانە نۇرعيسا تىلەندييەۆتىڭ 100 جىلدىعىنا ارنالعان مەرەيتويلىق جانە اعارتۋشىلىق ءىس-شارالار ءوتتى. سونداي-اق ارنۇر ءالىمحانوۆتى ەسكە الۋ كەشى ۇيىمداستىرىلدى.
22 قازاندا كورۋ قابىلەتى بۇزىلعان دۋەتتەر اراسىندا وتكەن «ەكى جۇلدىز» II حالىقارالىق ءان فەستيۆالى ءوتتى. وعان قازاقستان، قىرعىزستان جانە وزبەكستاننان كەلگەن 10 دۋەت قاتىستى.
جىل بويى كونسەرتتەر، بايقاۋلار، كينوكورسەتىلىمدەر، شەبەر ساباقتارى ۇيىمداستىرىلىپ، ءتۇرلى ۇيىرمەلەر مەن شىعارماشىلىق ستۋديالار جۇمىس ىستەدى. كوررەكسيالىق مەكتەپ وقۋشىلارىن قالالىق، رەسپۋبليكالىق جانە حالىقارالىق بايقاۋلارعا دايىنداۋ جۇرگىزىلدى. سونىمەن قاتار ىم ءتىلى جانە اعىلشىن ءتىلى كۋرستارى قولجەتىمدى بولدى.
ماڭىزدى وقيعالاردىڭ ءبىرى – قالا كۇنى مەن جەڭىستىڭ 80 جىلدىعىنا ارنالعان «جەڭىس ءۆالسى» X رەسپۋبليكالىق بي فەستيۆالى بولدى. فەستيۆال ەلىمىزدىڭ توعىز وڭىرىنەن كەلگەن بي ۇجىمدارىن بىرىكتىرىپ، شاكىرتتەردىڭ يننوۆاسيالىق شىعارماشىلىق ورتالىعىندا ءوتتى.
الماتىلىق قاتىسۋشىلار حالىقارالىق دەڭگەيدە دە تابىسقا جەتتى. مينسك قالاسىندا وتكەن ەستۋ قابىلەتى بۇزىلعان ارداگەرلەردىڭ ونەر فەستيۆالىندە ءالىم مەڭدىبايەۆ باس جۇلدە يەلەندى. وزبەكستانداعى ازيا چەمپيوناتىندا ن.ا. جۋكوۆسكايا ەكى ءبىرىنشى ورىندى جەڭىپ الدى. ال دويبى-64 بويىنشا الەم كۋبوگىندە ءا.ج. مەڭدىبايەۆ راپيدتە جەڭىمپاز اتانىپ، كلاسسيكالىق باعدارلامادا ءۇشىنشى ورىنعا يە بولدى.
الماتىدا ينكليۋزيۆتى باعدارلامالاردى دامىتۋ جۇمىستارى جالعاسۋدا. باستى ماقسات – ەرەكشە قاجەتتىلىگى بار ازاماتتاردىڭ قالانىڭ مادەني ومىرىنە كەڭىنەن قاتىسۋ مۇمكىندىگىن ارتتىرۋ.