وسى جىلدىڭ 1 ناۋرىزىنان باستاپ جەتىم بالالاردى تاربيەلەپ وتىرعان وتباسىلار الماتىدا ءحاوت ءۇشىن قارجىلىق كومەككە ۇمىتكەر بولا الادى، دەپ حابارلايدى almaty-akshamy.kz
2024 جىلعى 1 ساۋىردەن باستاپ حالىقتىڭ الەۋمەتتىك وسال توپتارىنا (ءحاوت) جاتاتىن ازاماتتار ساناتتارى ءۇشىن وتەماقى تولەمى 0،8 اەك، ياعني 2 954 تەڭگەنى قۇرايدى. بۇل تۋرالى الماتى قالاسى ءماسليحاتىنىڭ XV سەسسياسىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ مالىمدەدى.
ءحاوت ساناتتارىن قارجىلىق قولداۋدىڭ ارتۋى كوممۋنالدىق قىزمەتتەر تاريفتەرىنىڭ وسۋىمەن بايلانىستى.
«ءحاوت قوسىمشا قولداۋ شارالارىن كورسەتۋ ءۇشىن قولدانىستاعى الەۋمەتتىك كومەكتىڭ مولشەرىن 2024 جىلعى 1 ناۋرىزدان باستاپ 0،75 اەك – 2769 تەڭگەگە دەيىن ارتتىرۋ ۇسىنىلادى»، – دەپ ناقتىلادى باۋىرجان جاۋباسوۆ.
الماتى ءماسليحاتىنىڭ باستاماسى بويىنشا الەۋمەتتىك كومەك الۋشىلاردىڭ تىزبەسىنە جەتىم بالالار ساناتى ەنگىزىلدى. اعىمداعى جىلدىڭ 1 ناۋرىزىنان باستاپ جەتىم بالانى 18 جاسقا دەيىن قامقورلىققا العان وتباسى كوممۋنالدىق قىزمەتتەرگە تاريفتەردى كوتەرگەنى ءۇشىن وتەماقى تالاپ ەتە الادى.
قازىرگى ۋاقىتتا الماتىدا ءحاوت-قا جاتاتىن 315 مىڭ ازامات تۇرادى، ونىڭ 133 مىڭى وتەماقى كومەگىنە جۇگىندى. ەستەرىڭىزگە سالا كەتەيىك، سۋمەن جابدىقتاۋعا وتەماقى 2023 جىلعى 1 شىلدەدەن باستاپ 0،5 اەك مولشەرىندە جانە 2023 جىلعى 1 قاراشادان باستاپ ەلەكتر ەنەرگياسىنا 0،6 اەك كولەمىندە كورسەتىلۋدە.