حالىقارالىق جاستار كۇنىنە وراي ءبىرقاتار ارنايى اكسيالار جوسپارلانعان. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى جاستار ساياساتى باسقارماسى باسشىسىنىڭ مىندەتىن اتقارۋشى ازيز كاجدەنبەك مالىمدەدى، دەپ حابارلايدى aqshamnews.kz
الماتى – جاستار قالاسى، مۇندا 14 پەن 35 جاس ارالىعىنداعى 695،6 مىڭ جاس تۇرادى.
«1999 جىلدان باستاپ بۇكىل الەمدە 12 تامىزدا حالىقارالىق جاستار كۇنى اتاپ وتىلەدى. بۇل جاستارعا، ولاردىڭ جەتىستىكتەرى مەن الەۋەتىنە ارنالعان ەرەكشە كۇن. ءبىز قارقىندى وزگەرىستەر مەن جاھاندىق سىن-قاتەرلەر داۋىرىندە ءومىر ءسۇرىپ جاتىرمىز. جاستار باتىلدىق پەن شىعارماشىلىقتىڭ ۇلگىسىن كورسەتە وتىرىپ، وسى پروسەستەردىڭ الدىڭعى قاتارىندا. ءبىزدىڭ مىندەتىمىز – ساپالى ءبىلىم الۋعا، دەنساۋلىق ساقتاۋعا جانە جۇمىسقا ورنالاسۋ مۇمكىندىكتەرىنە قول جەتكىزۋدى قامتاماسىز ەتە وتىرىپ، ولاردىڭ دامۋى ءۇشىن قولايلى جاعدايلار جاساۋ»، - دەدى ازيز كاجدەنبەك.
بۇل كۇنى قالا كاسىپكەرلەرىمەن بىرلەسىپ 14 پەن 35 جاس ارالىعىنداعى جاستارعا ارنالعان «Jas Almaty» اۋقىمدى اكسياسىن وتكىزۋ جوسپارلانۋدا، ونىڭ شەڭبەرىندە قوعامدىق تاماقتانۋ، پايدالى دەمالىس سالاسىندا جەڭىلدىكتەر جاسالادى.
3-12 تامىز ارالىعىندا «Taza Qazaqstan»، «Jas kelse. Iske!» سياقتى 10 باعىت بويىنشا 60-تان استام سپورتتىق، مادەني جانە زياتكەرلىك ءىس-شارالار وتەدى. «Densaulyk – zor bailyk»، «Gylym tappai maqtanba»، «Meyirimdilik mekeni»، «Adal Azamat»، «Enbek barin de jenbek»، «Ystyq qairat. Nurly aqyl. Jyly jurek»، «Qorgan-24»، «Jasratmen birge» ءىس-شارالارى جاستار اراسىندا شىعارماشىلىق الەۋەت پەن سالاۋاتتى ءومىر سالتىن دامىتۋعا ىقپال ەتەدى.
ءىس-شارالارعا جاستار قوزعالىسىنىڭ وكىلدەرى، قوعامدىق پىكىر كوشباسشىلارى، جاس بلوگەرلەر مەن قازاقستاندىق شوۋ-بيزنەس جۇلدىزدارى قاتىسادى.
وكق سپيكەرى الماتىدا جاستاردىڭ الەۋەتىن تولىق ىسكە اسىرۋ، سونداي-اق جاستارعا اتاۋلى كومەك كورسەتۋ ماقساتىندا وتكەن جىلى 8 جاستار كوميۋنيتي ورتالىقتارىنىڭ ىسكە قوسىلعانىن اتاپ ءوتتى. ورتالىقتاردىڭ سانى 2025 جىلعا دەيىن 16-عا دەيىن ارتادى. جالپى، 2024 جىلدىڭ باسىنان بەرى 750-دەن استام ءىس-شارا وتكىزىلىپ، وعان جالپى سانى 53 مىڭنان استام جاس قاتىستى.