12 ءساۋىر – عىلىم قىزمەتكەرلەرى كۇنى. ءارى قانىش ساتبايەۆتىڭ تۋعانىنا 126 جىل تولۋىنا وراي ساتبايەۆ ۋنيۆەرسيتەتىندە عالىمنىڭ ەسكەرتكىشىنە گۇل شوقتارىن قويۋ ءراسىمى ءوتتى.
شاراعا قانىش يمانتاي ۇلىنىڭ ۇرپاقتارى، ق ر عىلىم جانە جوعارى ءبىلىم ءمينيسترى ساياسات نۇربەك، ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ جانە وزگە دە عالىمدار قاتىستى.
-بۇگىن ءبىز قانىش يمانتاي ۇلىنىڭ ۇلتقا سىڭىرگەن ەڭبەگىن ۇلىقتاپ، تاعزىم ەتۋ ءۇشىن جينالىپ وتىرمىز. بۇل - عىلىمنىڭ عانا ەمەس، تۇتاس ەلدىڭ ورتاق مەرەكەسى. جاقىندا ءبىر ۇلكەن جيىندا اقساقالدارىمىزدىڭ ءبىرى قانىش ساتبايەۆتىڭ ەل ەكونوميكاسىنا قوسقان ۇلەسى تۋرالى ايتتى. ونىڭ ەسەبى بويىنشا، اكادەميكتىڭ باستاماسىمەن اشىلعان پايدالى قازبالار ەلىمىزگە شامامەن 200 ميلليارد دوللار كولەمىندە تابىس اكەلگەن ەكەن”- دەدى عىلىم جانە جوعارى ءبىلىم ءمينيسترى ساياسات نۇربەك.
ول سونىمەن قاتار مەملەكەت باسشىسىنىڭ جوعارى وقۋ ورىندارى نەگىزىندە عىلىمدى دامىتۋ تاپسىرماسى نەگىزىندە جۇزەگە اسىپ جاتقان جۇمىستارمەن قىسقاشا تانىستىردى. ءارى پرەزيدەنت اتاپ وتكەن جوعارى وقۋ ورىندارىن زەرتتەۋشى فورماتقا كوشىرۋ باعىتىندا ساتبايەۆ ۋنيۆەرسيتەتىنىڭ جەمىستى ناتيجەلەرىنە توقتالدى.
ساياسات نۇربەكتىڭ ايتۋىنشا سوڭعى ەكى جىلدا ۋنيۆەرسيتەتتە 20-دان استام جوعارى دەڭگەيلى زەرتحانا اشىلىپ، زەرتتەۋشى مارتەبە بەرىلگەن قوسىمشا 20 ميلليارد تەڭگە كولەمىندە قارجىلاندىرۋ تارتىلعان. ناتيجەسىندە، وسى زەرتحانالار 2،5 ميلليارد تەڭگەگە جۋىق ينۆەستيسيا تارتىلعان. سونىمەن قاتار، 1 ميلليارد تەڭگەدەن استام سوماعا كەلىسىمشارتتار جاسالىپ، جەكە سەكتوردان 1،5 ميلليارد تەڭگە ينۆەستيسيا سالىنعان.
عىلىم جانە جوعارى ءبىلىم ءمينيسترى ساياسات نۇربەك جيىنداعى سوزىندە استانادا ساتبايەۆ ۋنيۆەرسيتەتىنىڭ فيليالى اشىلاتىنىن حابارلادى. بۇل جاڭا وقۋ ورنى ەلىمىزدىڭ تەحنيكالىق ءبىلىم بەرۋ سالاسىن كەڭەيتىپ، جاستارعا ساپالى ءبىلىم الۋعا جول اشپاق.
ءىس-شارالار لەگى اياسىندا عىلىم مەن يننوۆاسيانى بىرىكتىرەتىن ماڭىزدى باستاما جۇزەگە استى. ۋنيۆەرسيتەتتە جەتىلدىرىلگەن فۋنكسيونالدىق ماتەريالدار باعىتىندا حالىقارالىق عىلىمي-زەرتتەۋ ورتالىعى اشىلدى.
«ينجەنەرلىك جانە وندىرىستىك جۇيەلەردەگى جاساندى ينتەللەكت: پروسەستەردى وڭتايلاندىرۋ جانە اۆتوماتتاندىرۋ شەشىمدەرى» تاقىرىبىندا حالىقارالىق Satbayev International Conference 2025 كونفەرەنسيا ءوتتى. اكادەميك ق. ساتبايەۆتىڭ 125 جىلدىعىنا وراي ونىڭ 10 تومدىق عىلىمي ەڭبەكتەرى جيناعىنىڭ تۇساۋى كەسىلدى. پلەنارلىق وتىرىستا وتاندىق عىلىمنىڭ دامۋىنا ۇلەس قوسقان عالىمدار ماراپاتتالدى.
ق ر عىلىم اكادەمياسىنىڭ پرەزيدەنتى اقىلبەك كۇرىشبايەۆ:
“عىلىمدى دامىتپاساق، مەملەكەتتە دە وزگەرىستەر بولمايدى. عىلىم – ءبىر كۇندە ناتيجە بەرەتىن سالا ەمەس، وعان ۋاقىت پەن جۇيە قاجەت. ول ءۇشىن اكادەميا مەن مينيسترلىك تىعىز بايلانىستا جۇمىس ىستەۋى كەرەك. جاقىندا مەملەكەت باسشىسى ءبىرقاتار ارىپتەستەرىمىزدى ماراپاتتادى. سول جيىندا عىلىمي-زەرتتەۋ ۋنيۆەرسيتەتتەرىنىڭ ماڭىزىن اتاپ ءوتتى. ءقازىر قازاقستاندا ون عانا عىلىمي-زەرتتەۋ ۋنيۆەرسيتەتى بار. ساتبايەۆ اتىنداعى تەحنيكالىق ۋنيۆەرسيتەت – عىلىم مەن ءبىلىمنىڭ قارا شاڭىراعى. وسىنداي جوعارى وقۋ ورىندارىنىڭ سانى ارتسا، ەلىمىزدىڭ عىلىمى دا جاڭا دەڭگەيگە كوتەرىلەدى”،-دەدى.
سانا قاناتبەك قىزى، قانىش ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ جەتەكشى عىلىمي قىزمەتكەرى، پروفەسسور:
-جاڭا زەرتحانا — عىلىم مەن ءوندىرىستى بايلانىستىرۋدى ماقسات ەتكەن يننوۆاسيالىق الاڭ. حالىقارالىق مارتەبەسى بار ورتالىقتا الەمنىڭ جەتەكشى عالىمدارىمەن تىعىز ارىپتەستىكتە جۇمىس ىستەيمىز. ماقساتىمىز - زەرتتەۋ جۇمىسىمىزدى وندىرىستىك ونىمگە دەيىن جەكىزۋ. قازاقستان – اۋىل شارۋاشىلىعى دامىعان ەل، سول سەبەپتى كۇنباعىس، كۇرىش، ماقتا سياقتى داقىلداردان قالدىق كوپ شىعادى. ءبىز ورگانيكالىق قالدىقتاردى قايتا وڭدەپ، حيميا وندىرىسىنە، مەديسينا، اۋىل شارۋاشىلىعى جانە ەكولوگيا سالاسىنا قاجەتتى فۋنكسيونالدى ماتەريالدار دايىندايمىز. مىسالى، قۋاڭشىلىق كەزەڭىندە جاڭبىردىڭ سۋىن ءوزىنىڭ بويىنا جيناپ الادى دا، قاجەت كەزىندە بەرەدى. ەكىنشىدەن، جەمىس-جيدەكتەردى قاپتايتىن، جەۋگە جارامدى ەكولوگيالىق تازا پلەنكا ۇلگىلەرى دايىندالۋدا. وسى ءادىس شەتەلدەن كەلەتىن زياندى قوسپالارعا تاۋەلدىلىكتى ازايتادى.