بۇگىن الماتىدا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ۇيىمداستىرۋىمەن جانە بىرىككەن ۇلتتار ۇيىمىنىڭ قولداۋىمەن عىلىمداعى ايەلدەر مەن قىزداردىڭ حالىقارالىق كۇنىنە وراي عىلىمي كونفەرەنسيا ءوتتى، دەپ حابارلايدى aqshamnews.kz
ءىس-شارانى QyzPU-دىڭ «تۇراقتى دامۋ» جانە «عىلىم» ستۋدەنتتىك ءوزىن-وزى باسقارۋ ۇيىمدارى ۇيىمداستىردى.
ءىس-شارادا قازاقستان رەسپۋبليكاسى عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اقەركە ابىلايحان عىلىمداعى ايەلدەر مەن قىزداردىڭ حالىقارالىق كۇنىمەن عىلىمعا قىزىعۋشىلىق تانىتقان بارشا ستۋدەنت-جاستاردى قۇتتىقتادى.
«بۇگىن – حالىقارالىق عىلىمداعى ايەلدەر كۇنى. وسى ايتۋلى كۇنمەن بارلىق عىلىمداعى ستۋدەنت-جاستاردى قۇتتىقتايمىن. بۇگىنگى شارادا قازاق ۇلتتىق قىزدار پەداگوگيكالىق ۋنيۆەرسيتەتىنىڭ عىلىممەن اينالىسىپ، زەرتحانالاردا جۇمىس ىستەپ جاتقان جاس عالىمدارىنىڭ كورمەسىمەن تانىستىق. ەلىمىز ءۇشىن، جالپى ينجەنەرلىك-تەحنيكالىق باعىتتاعى عىلىمدى دامىتۋ، سونداي-اق ءوندىرىستى جەتىلدىرۋ – اسا ماڭىزدى. وسى ورايدا، جاستارىمىزدىڭ قولمەن جاساعان سابىن ونىمدەرىن كورىپ، تەحنولوگيالىق پروسەستەردى ءتيىمدى جۇرگىزۋ ارقىلى ونىڭ پايدالى تۇستارىن ارتتىرۋعا ارنالعان زەرتتەۋ جۇمىستارىمەن تانىستىق. جاستارعا، اسىرەسە عىلىم جولىندا جۇرگەن قىزدارىمىزعا ايتارىم – عىلىمدى جالعاستىرۋ قاجەت. باستالعان عىلىمي ىزدەنىستى توقتاتۋعا بولمايدى. سول سەبەپتى باكالاۆرياتتا وقىپ جاتقان ستۋدەنتتەرگە تابىس تىلەيمىن. ولاردىڭ بولاشاقتا ماگيستراتۋرا مەن دوكتورانتۋرادا ءبىلىمىن جالعاستىرىپ، قازاق ۇلتتىق قىزدار پەداگوگيكالىق ۋنيۆەرسيتەتىندە ەلىمىزدىڭ عىلىمي كادرلارىن دايارلاۋ ىسىنە ءوز ۇلەستەرىن قوسا بەرۋلەرىنە تىلەكتەسپىن»، – دەدى قازاقستان رەسپۋبليكاسى عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اقەركە ابىلايحان.
كونفەرەنسياعا ەكولوگيا ماگيسترى، «Ecology Consulting» كومپانياسىنىڭ باسشىسى، ەكو-ەتنو-ديزاينەر، ەكوترەنەر جانە ەكولوگيالىق بەلسەندى بوتاكوز سادىبەكوۆا، Yokogawa Electric Kazakhstan كومپانياسىنىڭ ينجەنەرى دۇيسەنبەك ينكار داۋرەن قىزى، سونداي-اق قازاق ۇلتتىق قىزدار پەداگوگيكالىق ۋنيۆەرسيتەتىنىڭ PhD دوكتورلار قۇرامى ارنايى شاقىرىلدى. سونىمەن قاتار كونفەرەنسيا قوناقتارى رەتىندە ءال-فارابي اتىنداعى قازاق ۇلتتىق ۋنيۆەرسيتەتى، قازاق-بريتان تەحنولوگيالىق ۋنيۆەرسيتەتى، حالىقارالىق اقپاراتتىق تەحنولوگيالار ۋنيۆەرسيتەتى، سپورت جانە تۋريزم اكادەمياسى، م. تىنىشپايەۆ اتىنداعى ALT University ستۋدەنتتەرى قاتىستى.
عىلىم سالاسىنداعى ايەلدەردىڭ ءرولىن دارىپتەۋ جانە جاس عالىمداردى ىنتالاندىرۋ ماقساتىندا وتكەن عىلىمي كونفەرەنسيادا جاراتىلىستانۋ، فيزيكا، ماتەماتيكا جانە سيفرلىق تەحنولوگيالار باعىتتارىندا جۇرگىزىلىپ جاتقان زاماناۋي زەرتتەۋلەر مەن يننوۆاسيالىق جوبالار تالقىلاندى.
«الماتى قالاسىنداعى بىرىككەن ۇلتتار ۇيىمى عيماراتىنا قوش كەلدىڭىزدەر! بۇگىن ءبىز قازاق ۇلتتىق قىزدار پەداگوگيكالىق ۋنيۆەرسيتەتىمەن بىرلەسىپ، عىلىمداعى ايەلدەر مەن قىزداردىڭ حالىقارالىق كۇنىنە وراي ۇلكەن مەرەكەلىك شارا وتكىزىپ وتىرمىز. جاستاردىڭ عىلىمعا دەگەن قىزىعۋشىلىعىن جانە ءوز بىلىمدەرىن تاجىريبەگە اينالدىرا العانىن كورىپ، ەرەكشە قۋانىپ وتىرمىن. وسىنداي ماڭىزدى شارانى بىرلەسىپ ۇيىمداستىرعانىمىزعا وتە قۋانىشتىمىن»، – دەدى بۇۇ جاھاندىق كوممۋنيكاسيالار دەپارتامەنتىنىڭ وكىلى، قازاقستانداعى بۇۇ اقپاراتتىق ورتالىعىنىڭ باسشىسى ۆلاستيميل سامەك.
ءىس-شارا اياسىندا عىلىمي جارمەڭكە ۇيىمداستىرىلىپ، وندا ستۋدەنتتەر وزدەرىنىڭ عىلىمي جوبالارىن تانىستىردى. ءار قاتىسۋشى ءوز زەرتتەۋىنىڭ ماقساتى مەن ناتيجەلەرىن جان-جاقتى ءتۇسىندىرىپ، عىلىمي قاۋىمداستىقپەن پىكىر الماستى.
«ءبىزدىڭ جوبامىزدىڭ اتاۋى – «اقىلدى اۆتوتۇراق». قازىرگى تاڭدا كوپتەگەن ساۋدا جانە ساۋىقتىرۋ ورتالىقتارىندا اۆتوتۇراق ماسەلەسى ءجيى كەزدەسەدى. جۇرگىزۋشىلەردىڭ كولىكتەرىن دۇرىس قويماۋى سالدارىنان باسقا جۇرگىزۋشىلەرگە بوس ورىن تابۋ قيىنعا سوعادى. ءبىزدىڭ جوبامىز ءدال وسى ماسەلەنى شەشۋگە ارنالعان. بولاشاقتا جوبانى دامىتىپ، ونى ىسكە اسىرۋدى ماقسات ەتىپ وتىرمىز»، – دەدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ «ينفورماتيكا جانە روبوتوتەحنيكا» ءبىلىم بەرۋ باعدارلاماسىنىڭ 3 كۋرس ستۋدەنتى جارقىناي باحىتجان.
شارادا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتىك رەكتورات قۇرامى «عىلىمداعى ايەلدەر» تاقىرىبى بويىنشا بايانداما جاسادى. كونفەرەنسيانىڭ نەگىزگى بولىگى عىلىمي جوبالار مەن زەرتتەۋ جۇمىستارىنىڭ قورعالۋىنا ارنالدى. قاتىسۋشىلار ءوز زەرتتەۋلەرىن جان-جاقتى تانىستىرىپ، يننوۆاسيالىق شەشىمدەر ۇسىندى. پانەلدىك پىكىرتالاس بارىسىندا عىلىم مەن تەحنولوگيا سالاسىنداعى وزەكتى ماسەلەلەر تالقىلانىپ، قاتىسۋشىلار ۋنيۆەرسيتەتتىڭ PhD دوكتورلارى قۇرامىنان تىكەلەي جاۋاپ الۋ مۇمكىندىگىنە يە بولدى.
كونفەرەنسيا سوڭىندا بۇۇ جاھاندىق كوممۋنيكاسيالار دەپارتامەنتىنىڭ وكىلى جانە ق ر بۇۇ اقپاراتتىق ورتالىعىنىڭ باسشىسى ۆلاستيميل سامەك جانە عىلىمي جۇمىس جانە حالىقارالىق ىنتىماقتاستىق جونىندەگى پرورەكتور دجۋماكۋلوۆ زاكير دانياروۆيچ بەلسەندى ستۋدەنتتەر مەن قوناقتارعا العىسىن ءبىلدىرىپ، عىلىم مەن بىلىمگە قوسقان ۇلەستەرى ءۇشىن العىس حاتتار تابىستادى.
«بۇگىنگى شارادا ءبىزدىڭ دوكتورانتتارىمىز، ستۋدەنتتەرىمىز جانە زەرتتەۋشىلەرىمىز وزدەرىنىڭ عىلىمي جوبالارىن ۇسىندى. سونىمەن قاتار ايەلدەردىڭ تاريحتاعى جانە قازىرگى عىلىمعا قوسقان ماڭىزدى ۇلەسى تۋرالى دا ايتىلدى. شارانىڭ باستى ماقساتى – ستۋدەنت قىزداردى عىلىمعا تارتۋ»، – دەدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ عىلىمي جۇمىس جانە حالىقارالىق ىنتىماقتاستىق جونىندەگى پرورەكتورى دجۋماكۋلوۆ زاكير دانيار ۇلى.
بۇل ءىس-شارا عىلىم سالاسىنداعى ايەلدەردىڭ ءرولىن ايقىنداپ قانا قويماي، جاس عالىمداردى جاڭا جەتىستىكتەرگە جەتەلەۋگە جانە ولاردىڭ عىلىمي ىزدەنىستەرىن قولداۋعا باعىتتالعان ماڭىزدى قادام بولدى.