بۇل تۋرالى الماتى اكىمى ەربولات دوسايەۆ ورتالىق كوممۋنيكاسيالار قىزمەتىندە وتكەن بريفينگتە، قالادا جۇرگىزىلىپ جاتقان سەيسمواۋديتتىڭ ناتيجەلەرى تۋرالى سۇراققا جاۋاپ بەرە وتىرىپ مالىمدەدى، دەپ حابارلايدى aqshamnews.kz
«حالىقارالىق ستاندارتتارعا ساي عيماراتتار مەن قۇرىلىستاردىڭ ناقتى سەيسميكالىق تۇراقتىلىعىن انىقتاۋ ماقساتىندا قالادا 21 441 نىساندى قامتىعان سەيسمواۋديت، ياعني نىسانداردى پاسپورتيزاسيالاۋ جۇرگىزىلدى»، – دەپ اتاپ ءوتتى مەگاپوليس باسشىسى.
ونىڭ ايتۋىنشا، 2017-2018 جىلدارى جۇرگىزىلگەن سەيسمواۋديتتىڭ ناتيجەسىندە 10 525 نىسان زەرتتەلسە، 2023-2024 جىلدارى ەكىنشى كەزەڭ اياسىندا 10 916 نىسان تەكسەرىلگەن.
«كەلەسى جىلدىڭ باسىندا «قازنييسا» اق اتقارىلعان جۇمىستاردىڭ قورىتىندىسى بويىنشا اناليتيكالىق ەسەپ ۇسىنادى. وسىدان كەيىن تۇرعىن ءۇي كەشەندەرى مەن الەۋمەتتىك نىسانداردى سەيسميكالىق كۇشەيتۋ بويىنشا العاشقى كەزەكتەگى شارالار جوسپارى قابىلدانادى. جالپى، ناقتى مالىمەتتەرگە سۇيەنە وتىرىپ جانە اقش، جاپونيا، يزرايل تاجىريبەسىن ەسكەرە وتىرىپ، ءبىز عيماراتتاردى سەيسميكالىق كۇشەيتۋ بويىنشا قالالىق باعدارلامانى ازىرلەيمىز جانە ىسكە قوسامىز»، – دەپ اتاپ ءوتتى ەربولات دوسايەۆ.
سونىمەن قاتار، قالادا مەملەكەتتىك الەۋمەتتىك عيماراتتاردى سەيسميكالىق كۇشەيتۋ جۇمىستارى جىل سايىن جۇرگىزىلۋدە. 2025 جىلى بوستاندىق جانە مەدەۋ اۋداندارىنداعى 3 مەكتەپتىڭ سەيسميكالىق كۇشەيتۋ جۇمىستارى اياقتالادى، ال تۇركسىب اۋدانىنداعى №50 مەكتەپ-ليسەيدىڭ سەيسميكالىق كۇشەيتۋ جۇمىستارى باستالادى. سونداي-اق، اۋەزوۆ، بوستاندىق جانە مەدەۋ اۋداندارىنداعى 7 بالاباقشادا وسىنداي جۇمىستار جۇرگىزىلەدى.