ۇلتتىق ۆاليۋتا 1،7%-عا نىعايدى.
قازان ايىنىڭ قورىتىندىسى بويىنشا، تەڭگە باعامى 1 اقش دوللارى ءۇشىن 468،23 تەڭگەگە دەيىن 1،7%-عا نىعايدى، دەپ حابارلايدى Almaty-akshamy.kz Baq.kz سىلتەمە جاساپ.
قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى ءبىر ايدا 91 ملن اقش دوللارىنان 121 ملن اقش دوللارىنا دەيىن ۇلعايدى. ساۋدا-ساتتىقتىڭ جالپى كولەمى 2،4 ملرد اقش دوللارىن قۇرادى.
كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى وتكەن ايدا شامامەن 528،6 ملن اقش دوللارىن قۇرادى. كۆازيمەملەكەتتىك سەكتور كومپانيالارى ەكىنشى دەڭگەيلى بانكتەر ارقىلى ۆاليۋتا نارىعىندا ساتۋدى ءوز بەتىنشە جۇزەگە اسىرادى.
ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتا ساتۋ قازاندا 362 ملن اقش دوللارىن قۇرادى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 15%-ىن جانە كۇنىنە 30 ملن اقش دوللارىنان اسپايتىن مولشەردى قۇرادى.
ۇلتتىق قوردان ۆاليۋتانى ساتۋ جونىندەگى وپەراسيالاردى جۇزەگە اسىرۋ كەزىندە ۇلتتىق بانك نارىقتىق ترەندتى قالىپتاستىرۋعا ارالاسپاۋ قاعيداتىن ۇستانىپ، «price-taker» قالپىندا قالاتىنىن اتاپ وتكەن ءجون. وسىلايشا، ۆاليۋتا نارىعىنداعى قازىرگى جاعدايلاردى ساقتاۋ ماقساتىندا ۇلتتىق بانك ۆاليۋتانى ساتۋعا ءوز وتىنىمدەرىن بەرمەگەنمەن، نارىققا قاتىسۋشىلار بەرگەن بۇرىننان بار وتىنىمدەردى قاناعاتتاندىرادى. بۇل تاجىريبە ۇلتتىق قوردان ۆاليۋتا نارىعىنا وپەراسيالاردىڭ تيگىزەتىن اسەرىن بارىنشا ازايتۋعا مۇمكىندىك بەرەدى.
قازان ايىندا ۇلتتىق بانك ۆاليۋتالىق ينتەرۆەنسيالار جۇرگىزبەدى، سونداي-اق بجزق زەينەتاقى اكتيۆتەرى مەن سەنىمگەرلىك باسقارۋداعى باسقا قورلار ءۇشىن شەتەل ۆاليۋتاسىن ساتىپ الۋ نەمەسە ساتۋ بويىنشا وپەراسيالاردى جۇزەگە اسىرمادى.
قىسقا مەرزىمدى پەرسپەكتيۆادا تەڭگەنىڭ قۇبىلمالىلىعى گەوساياسي جاعدايدىڭ وزگەرۋىنە، ىشكى قاتىسۋشىلاردىڭ كۇتۋلەرىنە جانە الەمدىك نارىقتارداعى احۋالعا بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانۋدى جالعاستىرادى.