الماتى كۇنى قارساڭىندا فرانسيانىڭ رەنن قالاسىمەن باۋىرلاستىقتىڭ 30 جىلدىعى قۇرمەتىنە وراي ۆەلوشەرۋ اياقتالدى
بيىل الماتى قالاسى مەن فرانسيانىڭ برەتان ايماعىنىڭ استاناسى رەنن قالاسى اراسىنداعى باۋىرلاستىققا مەرەيلى 30 جىل تولدى. پاندەميا كەزىندە بىرلەسكەن ساپارلاردىڭ ورنىنا 44 جاستاعى لوران ماە ۆەلوشەرۋ وتكىزدى، دەپ حابارلايدى Almaty-akshamy.kz.
بۇگىن لوران ماە ۆەلوشەرۋدى اياقتاپ، الماتىعا كەلدى، 3،5 اي ىشىندە 9 مىڭ شاقىرىمدى ءجۇرىپ ءوتىپ، 15 ەلدە بولدى. ساياحاتشىنى قالاعا كىرە بەرىستە «Almaty Cycling Team» كونتينەنتالدى كوماندانىڭ ۆەلوسيپەدشىلەرى قارسى الىپ، «قازاقستاننىڭ تاۋەلسىزدىگى» مونۋمەنتىنە الىپ باردى، قوناقتى ول جەردە قالا اكىمشىلىگى جىلى قارسى الدى.
الماتى قالاسى اكىمىنىڭ ورىنباسارى ەرجان باباقۇماروۆ الماتى مەن رەننىڭ اراسىنداعى باۋىرلاستىق تاۋەلسىزدىكتىڭ تاڭىندا، 1991 جىلى باستالعانىن اتاپ ءوتتى. جىلدان-جىلعا ەكىجاقتى قارىم-قاتىناس نىعايا تۇسۋدە. مادەني-گۋمانيتارلىق ىنتىماقتاستىق بەلسەندى تۇردە دامۋدا، ءوزارا مادەنيەت كۇندەرى، كورمەلەر، كونسەرتتەر وتكىزىلۋدە. 20 جىلدان بەرى رەنن مەن الماتىنىڭ وتباسىلارى بىرىنە-بىرى قوناققا بارىپ، ءوزارا ءداستۇر مەن تۇرمىستى كەڭىنەن تانۋدا، قالالار مەكتەپتەرى اراسىندا ىنتىماقتاستىق قالىپتاسۋدا. وسىدان 5 جىل بۇرىن رەنن قالاسىنداعى «الماتى» باعىندا باۋىرلاستىقتىڭ 25 جىلدىعىنا وراي قازاقتىڭ ۇلى فيلوسوفى مەن ويشىلى ابايدىڭ ءبيۋستى اشىلعان ەدى.
ءوز كەزەگىندە ۆەلوساياحاتشى لوران ماە رەنن قالاسىنىڭ مەرى ناتالي اپپەردىڭ حاتىن وقىپ بەردى.
«لوران ماە مىرزانىڭ ادامي جانە سپورتتىق ەرلىگى رەنن مەن الماتى تۇرعىندارى ءۇشىن باتىلدىق پەن دوستىقتىڭ ۇلگىسى بولىپ تابىلادى. «بارشاڭىزدى الماتى كۇنىمەن قۇتتىقتايمىن»، - دەلىنگەن حاتتا».
«رەنن قالاسى الماتىمەن باۋىرلاستىعىنا 30 جىلداي بولعان ىنتىماقتاستىق پەن دوستىقتى ودان ءارى نىعايتۋعا نيەتتى. لوران ماەنىڭ ەرلىگى – وسىنىڭ ايقىن دالەلى. باۋىرلاستىعىمىز، دوستىعىمىز نىعايا بەرسىن!» - دەدى فرانسيانىڭ باس كونسۋلى الەكسيس شاحتاحتينسكيي.
«الماتى-رەنن جانە الەم قالالارى دوستىعى قوعامىنىڭ» ۆيسە-پرەزيدەنتى ايگۇل قاسىمبەك ەكى قالا اراسىنداعى دوستىقتى نىعايتۋ ماقساتىندا قانداي شارالاردىڭ جۇزەگە اسىرىلىپ جاتقانىن ايتتى. مىسالى، الماتى مەكتەپتەرى مەن جوعارى وقۋ ورىندارىندا فرانسۋز ءتىلىن ۇيرەنۋدى دامىتۋ بويىنشا جۇمىستار جۇرگىزىلۋدە.
ايتا كەتەرلىگى، لوران ماە 15 جاسىنان باستاپ ۇلى جىبەك جولىن كورۋدى جانە ونىمەن ءجۇرىپ ءوتۋدى ارمانداعان ەكەن.
«قازاقستانعا كەلگەن بويدا ءبارى جاقسى ءوتىپ جاتىر. مەن شىمكەنت، تاراز، تۇركىستان، شۋ قالالارىندا بولدىم جانە قازاقتاردىڭ مەنى وتە جىلى قارسى العانىن ايتقىم كەلەدى. ەۋروپادا بولعانىمدا، جاڭبىر كوپ جاۋدى، كەيدە قار استىندا قالعان كەزدەرىم بولدى. ءبىراق قازاقستانعا كەلگەننەن كەيىن بارلىق قيىندىقتار مەن قولايسىز اۋا رايى ارتتا قالدى. مەن ۆەلوسيپەدپەن ساياحاتقا شىققان كەزدە ءۇش ماقساتتى الدىما قويدىم: رەنن-الماتى قالالارىنىڭ 30 جىلدىق باۋىرلاستىعىن، قازاقستان رەسپۋبليكاسى تاۋەلسىزدىگىنىڭ 30 جىلدىعىن اتاپ ءوتۋ جانە ءسىزدىڭ ەلدى كورۋ جونىندەگى كوپتەن بەرگى ارمانىمدى ىسكە اسىرۋ. سونىڭ بارلىعى ورىندالدى»، - دەدى لوران ماە.