ۆاكسينانى قۇيۋ دايىندىقتارى اعىمداعى جىلدىڭ ءساۋىر ايىنان باستاۋ العان.
الماتى وبلىسىندا QazVac ۆاكسيناسىن قۇيا باستايدى، دەپ حابارلايدى Almaty-akshamy.kz.
«قاراساي اۋدانىنا قاراستى اباي اۋىلىنداعى «انتيگەن» ۇكپ ج ش س الاڭىندا “QazVac” ۆاكسيناسىنىڭ 1 ملن. دوزاسىن قۇيۋ جوسپارلانىپ وتىر»، – دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
بۇگىندە يتاليان ءوندىرىسىنىڭ اپپاراتى ءبىر مينۋت ىشىندە 60 قۇتىعا ۆاكسينا قۇيا الادى. ءار قۇتىدا 3 دوزادان. شىلدە ايىنان بەرى 300 مىڭ دوزاسى قۇيىلدى. بۇل جۇمىس بارىسىن جانە قۇرال-جابدىقتاردى تەكسەرۋگە ارنالعان ۆاليداسيالىق سەريا. سونىمەن قاتار وندىرىستىك شىعارىلىم بارلىق تالاپتارعا جانە اسەپتيكالىق ءوندىرىستىڭ سانيتارلىق نورمالارىنا سايكەس كەلەدى. بارلىق قۇرال-جابدىقتار ەۋروپا، امەريكا جانە قىتايدان اكەلىندى. وسىلايشا ساپانىڭ حالىقارالىق ستاندارتتارى كاسىپورىنعا جوعارى تەحنيكالىق دارەجەگە جەتۋگە سەرپىن بەرەدى.
«انتيگەن» جشس-نا "جەتىسۋ" اكك ارقىلى 420 ملن. تەڭگە قارجىعا ليزينگ نەگىزىندە 13 بىرلىك زاماناۋي تەحنيكالىق قۇرال-جابدىق ساتىپ الىندى. اتالعان جوبانىڭ جۇزەگە اسۋى ق ر ۇكىمەتىنىڭ تىكەلەي باقىلاۋىندا. الاڭعا پرەمەر-مينيستردىڭ ورىنباسارى ەرالى توعجانوۆ بىرنەشە رەت كەلىپ، دايىندىق بارىسىن تىكەلەي باقىلاۋدا»، - دەيدى وبلىس اكىمىنىڭ ورىنباسارى باتىرجان بايجۇمانوۆ.
ءوز كەزەگىندە «انتيگەن» ۇكپ ج ش س ديرەكتورى نۇرلان احمەتسادىقوۆ بۇگىنگى كۇنى 300 مىڭ دوزا قۇيىلعان ۆاكسينا بيولوگيالىق قاۋىپسىزدىك ماسەلەلەرى عىلىمي زەرتتەۋ ينستيتۋتىندا ەكەنىن ايتتى.
«زەرتتەۋلەر اياقتالۋعا جاقىن. «انتيگەن» ج ش س الاڭىندا قۇيىلعان ۆاكسينا تەك تولىق تەكسەرىستەن وتكەننەن كەيىن بارىپ قانا قولدانىسقا ەنگىزىلەتىنىن ايتا كەتكەن ءجون»، - دەپ اتاپ ءوتتى ديرەكتور.
ەسكە سالساق، مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، وتاندىق ساپالى QazVac ۆاكسيناسى دايىندالدى. ونەركاسىپتىك ءوندىرىستى ۇيىمداستىرۋ ماقساتىندا پرەمەر-مينيستر اسقار ءماميننىڭ قاداعالاۋىمەن وتكەن جىلدىڭ 12ء-شى ماۋسىمىندا بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى بازاسىندا بيوفارماسيەۆتيكالىق زاۋىتتىڭ قۇرىلىسى باستالدى. «انتيگەن» ۇكپ ج ش س بيوفارماسيەۆتيكالىق زاۋىتتى قوسقاندا بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتىنىڭ بازاسىنداعى ەكىنشى وندىرىستىك الاڭ بولدى.