بۇل تۋرالى الماتى ءماسليحاتىنىڭ كەزەكتى سەسسياسى بارىسىندا قالالىق قارجى باسقارماسىنىڭ باسشىسى قانات سۋحامبەكوۆ مالىمدەدى.
الماتىنىڭ 98 ملرد تەڭگە سوماسىنا جەرگىلىكتى بيۋدجەتىن ناقتىلاۋ وتكەن جىلدان بەرگى بوس قالدىقتاردى پايدالانۋ جانە بيۋدجەتتىك باعدارلامالار اكىمشىلەرى اراسىندا بيۋدجەت قاراجاتىن ىشكى قايتا ءبولۋ ەسەبىنەن جۇرگىزىلەدى، دەپ حابارلايدى Almaty-akshamy.kz
سونداي-اق، الماتى اكىمى ەربولات دوسايەۆتىڭ تاپسىرماسى بويىنشا فەستيۆالدار، فورۋمدار مەن ءتۇرلى يميدجدىك ءىس-شارالاردى وتكىزۋگە شىعىندار قىسقارتىلدى.
«الەۋمەتتىك سالاعا 2024 جىلعى بيۋدجەت شىعىستارىنىڭ 31% - ى باعىتتالۋدا-بۇل 30،4 ملرد تەڭگە. ءبىلىم بەرۋ سالاسىنا 20،8 ملرد تەڭگە قاراستىرىلعان، ول 13 مەكتەپكە ينجەنەرلىك-كوممۋنيكاسيالىق ينفراقۇرىلىم مەن تالشىقتى-وپتيكالىق بايلانىس جەلىلەرىن سالۋعا، شۇعىلا ش/ا تۋبەركۋلەزدىڭ بەلسەندى ەمەس تۇرىمەن اۋىراتىن بالالارعا ارنالعان ساناتوريي ۇلگىسىندەگى جاتاقحاناسى بار 340 ورىندىق جاڭا مەكتەپ سالۋعا، الماتى تەلەكوممۋنيكاسيا جانە ماشينا جاساۋ كوللەدجىن جاڭارتۋعا، سونداي-اق №58، 73، 83 مەكتەپتەردى جانە رەسپۋبليكالىق فيزيكا - ماتەماتيكا مەكتەبىنىڭ عيماراتىن رەكونسترۋكسيالاۋعا ارنالعان»، - دەپ قوستى قانات سۋحامبەكوۆ.
بۇدان باسقا، اعىمداعى جىلى المالى، بوستاندىق، الاتاۋ جانە مەدەۋ اۋداندارىنداعى 5 مەكتەپتى كۇردەلى جوندەۋمەن سەيسميكالىق كۇشەيتۋگە قوسىمشا 2،7 ملرد تەڭگە كوزدەلەتىن بولادى. ناۋرىزباي اۋدانىنداعى شۇعىلا، قۇرامىس شاعىن اۋداندارىندا ءارقايسىسى 320 ورىندىق 2 بالاباقشا قۇرىلىسى جالعاسادى.
«دەنساۋلىق ساقتاۋ سالاسىندا ۇزاق ۋاقىت ىشىندە العاش رەت 11 نىسانعا كۇردەلى جوندەۋ جۇرگىزىلەتىن بولادى. بۇل ماقساتتارعا بيۋدجەتتەن 5،6 ملرد تەڭگە قاراستىرىلعان. مادەنيەت جانە سپورت سالاسىن دامىتۋعا 3،3 ملرد تەڭگە قاراستىرىلعان.»، - دەپ تۇيىندەدى ءسوزىن الماتى قالاسى قارجى باسقارماسىنىڭ باسشىسى.