الماتىدا "ەۋرازيا" كينوفەستيۆالى وتەدى

اتالمىش شارا ەكى كونكۋرستىق باعدارلامادان تۇرادى.

الماتىدا 12-18 جەلتوقسان ارالىعىندا XVI حالىقارالىق "ەۋرازيا" كينوفەستيۆالى وتەدى، دەپ حابارلايدى Almaty-akshamy.kz Inbusiness.kz سىلتەمە جاساپ.

كينوفەستيۆال ەكى كونكۋرستىق باعدارلامادان تۇرادى:

- حالىقارالىق كونكۋرس – سوڭعى 12 ايدا ەۋرازيا قۇرلىعىندا تۇسىرىلگەن 15 تولىقمەتراجدى فيلم؛

- ۇلتتىق كونكۋرس – 2021-2022 جىلدارى تۇسىرىلگەن 15 وتاندىق تولىقمەتراجدى فيلم.

كونكۋرستان تىس باعدارلاما – "ەرەكشە وقيعادا" ءارتۇرلى ءداۋىر مەن جانرلارداعى تانىمال الەمدىك كينو قايراتكەرلەرىنىڭ فيلمدەرىنىڭ رەتروسپەكتيۆاسى، ونىڭ ىشىندە مەرەيتويلىق فيلمدەر، سونداي-اق فەستيۆالدىڭ اشىلۋى مەن جابىلۋىندا كورسەتىلەتىن فيلمدەر ۇسىنىلماق.

"جاڭا ەسىمدەر" باعدارلاماسى زاماناۋي قىسقامەتراجدى وتاندىق كينوعا ارنالادى. مۇندا 2020-2022 جىلدارى تۇسىرىلگەن جاس رەجيسسەرلەردىڭ ۇزدىك 15 ءفيلمى كورسەتىلەدى.      

جەڭىمپازدار ۇزدىك فيلم، ۇزدىك رەجيسسەرلىك جۇمىس، ۇزدىك ەر ادام ءرولى، ۇزدىك ايەل ادام ءرولى، قازىلار القاسىنىڭ ارنايى جۇلدەسى نوميناسيالار بويىنشا انىقتالاتىن بولادى.

سونىمەن قاتار فەستيۆالدە ازيا كينوسىن ناسيحاتتاۋ جونىندەگى حالىقارالىق ۇيىمنىڭ قازىلار القاسى بولادى. ولار دا ءوز جەڭىمپازىن انىقتاماق.

كينەماتوگرافتىڭ دامۋىنا ەرەكشە ۇلەس قوسقاندارعا ارنايى سىيلىقتار بەرىلەدى.