10 ميلليوننان استام قازاقستاندىق ۆاكسينا سالدىرعان.
دەنساۋلىق ساقتاۋ ءمينيسترى اجار عينيات قازاقستاندا كوروناۆيرۋستىڭ تارالۋىنا قاتىستى شەكتەۋ ەنگىزۋ جوسپارى تۋرالى سۇراققا جاۋاپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كوۆيد شەكتەۋلەرى تۋرالى ايتاتىن بولساق، قىتايداعى قازىرگى جاعداي مۇلدەم باسقاشا. پاندەميا باستالعاننان بەرى قىتايدا وتە قاتاڭ شەكتەۋ شارالارى قابىلداندى. وسى ورايدا، ولار ينفەكسيانى وقشاۋلاۋعا قاتىستى شەكتەۋ ءىس-شارالارىنا ەرەكشە ءمان بەردى. ءقازىر قىتايداعى ۇجىمدىق يممۋنيتەت قانداي دەڭگەيدە ەكەنىن ايتا المايمىن. ولاردا اۋرۋ شىققان جەرلەردە شەكتەۋ ءىس-شارالارى قابىلدانادى. بۇعان حالىق ءوز نارازىلىعىن ءبىلدىرىپ جاتقان بولار»، - دەدى ا. عينيات سەناتتاعى ۇكىمەت ساعاتىنان كەيىن تىلشىلەر ساۋالىنا جاۋاپ بەرە وتىرىپ.
«ەلىمىزدە 10 ميلليوننان استام ادام ۆاكسينا سالدىرعانىن، بەس ميلليوننان استام ادامعا قايتا ۆاكسيناسيالاۋ جۇرگىزىلگەنىن، ۇجىمدىق يممۋنيتەت قالىپتاسقانىن، سونداي-اق "وميكروندى" ادامدار جەڭىل ەڭسەرىپ جاتقانىن ەسكەرە وتىرىپ، ەل اۋماعىندا شەكتەۋ ءىس-شارالارىن ەنگىزۋ جوسپارلانباعان»، - دەدى مينيستر.
بۇعان دەيىن حابارلانعانداي، دەنساۋلىق ساقتاۋ ءمينيسترى قازاقستاندا انىقتالعان كوروناۆيرۋستىڭ «سەربەر» شتامىنىڭ ەرەكشەلىكتەرىن ايتتى.