كەشتە كومپوزيتوردىڭ 20-عا جۋىق ءان، رومانس جانە حور شىعارماسى ورىندالدى
حاسانعالييەۆتىڭ شىعارماشىلىعىنا ارنالعان «اسىل ارمان» اتتى ەسكە الۋ كەشى ءوتتى. كەشتىڭ باستى ەرەكشەلىگى - داڭقتى كومپوزيتوردىڭ 20-عا جۋىق ءان، رومانس جانە حور شىعارماسىن تەاتردىڭ ارتىستەرى ورىنداپ شىقتى، دەپ حابارلايدى Almaty-akshamy.kz Almaty.tv -گە سىلتەمە جاساپ.
«ەسكىرمەگەن ماحاببات» دەپ ەل ەسىندە ەڭسەلى بەينەسى ساقتالعان دارىندى تۇلعانى ەسكە الۋعا كەلگەن ەلدىڭ قاراسى قالىڭ بولدى. اتامەكەنىن انىنە قوسىپ، ماڭدايىنان ەسكەن سامالدى حالقىنىڭ الاقانى دەپ بىلگەن ءبىرتۋار سازگەردىڭ ءاربىر ءانىن جۇرت ەمىرەنە تىڭداپ وتىردى.
«ەسكەندىر اعامىزدىڭ تۋىندىسىنىڭ ەرەكشەلىگى – كەز كەلگەن ءانىن كلاسسيكالىق ۇلگىمەن ورىنداي بەرۋگە بولادى. «ەسكەندىر اعامىزدىڭ ءانى تەك ەستراداعا ارنالعان» دەپ ويلاۋى مۇمكىن. نەگىزىندە ولاي ەمەس. قازاق باردا ەسكەندىر اعامىزدىڭ اتى وشپەيتىنىنە مەن كامىل سەنەمىن»، – دەدى اباي اتىنداعى قازاق ۇلتتىق وپەرا جانە بالەت تەاترىنىڭ ديرەكتورى نۇرباقىت بوكەبايەۆ.
كەشتە XX عاسىردىڭ سوڭىندا ونەرگە ليريكالىق لەپ بەرگەن ەستى اندەر دە ورىندالدى. اسقان جاۋاپكەرشىلىكتى تالاپ ەتەتىن كۇردەلى شىعارمالاردى ۇيىمداستىرۋشىلار ءبىراز ۋاقىتتان بەرى شىڭداعان ەكەن. ونداعى ماقسات – سازگەردىڭ تۋىندىلارىن وسكەلەڭ ۇرپاققا ءسىڭىرۋ.
«كونسەرۆاتوريادا، استاناداعى مۋزىكالىق اكادەميادا ەمتيحاندا، اكاداميالىق كونسەرتتە ەسكەندىر اعامىزدىڭ رومانستارىن قوسىپ ءجۇر. مەملەكەتتىك ەكزامەندە دە ەسكەندىر اعامىزدىڭ اندەرى ورىندالىپ ءجۇر»، – دەدى اباي اتىنداعى قازاق ۇلتتىق وپەرا جانە بالەت تەاترىنىڭ ءانشىسى بولات بوكەنوۆ.
«كەشتى اباي اتىنداعى قازاق ۇلتتىق وپەرا جانە بالەت تەاترى ۇيىمداستىرىپ وتىر. ەسكەندىر حاسانعالييەۆتىڭ بۇرىن ەستىلمەگەن ءان، رومانستارى ورىندالدى. «اتامەكەن» انىمەن اياقتالادى ەكەن، سول فينالدا وپەرالىق انشىلەردى سۇيەمەلدەپ، رويالدا ورىندايتىن بولامىن»، – دەدى ە. حاسانعالييەۆتىڭ ۇلى، ق ر ەڭبەك سىڭىرگەن قايراتكەرى ءبىرجان حاسانعالييەۆ.
ۇلتىنىڭ جانىن تەربەتىپ، سەزىمىن وياتقان اتاقتى كومپوزيتور قازاق، ورىس، تاتار، نەمىس اقىندارىنىڭ ولەڭىنە كوپتەگەن ءان جازعانى بەلگىلى. وسىنداي ەر ەسىمى جىل وتكەن سايىن ەل ەسىندە جاتتالىپ، ماڭگىلىك ءومىر سۇرەرى ءشۇباسىز.