ۇيىمداسقان قىلمىستىق توپ قۇرامىندا ەسىرتكى بار وسىمدىكتەردى الماتىدا مەن وعان جاقىن اۋدانداردا ءوسىرۋدى جانە وتكىزۋدى جولعا قويعان.
ءىىم ەسىرتكى قىلمىسىنا قارسى ءىس-قيمىل دەپارتامەنتى مەن الماتى قالاسىنىڭ پوليسيا دەپارتامەنتى جىلدام قيمىلدايتىن جانە “ارلان” ارنايى جاساقتارىن تارتا وتىرىپ، قالالىق ۇقكد-مەن بىرلەسىپ، پروكۋراتۋرا ورگاندارىنىڭ ۇيلەستىرۋىمەن ماريحۋانا مەن گاشيشتى اسا ءىرى مولشەردە وسىرۋمەن جانە وتكىزۋمەن اينالىسقان قىلمىستىق توپتىڭ ارەكەتىن توقتاتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
قىلمىستىق ارەكەتتەردى باقىلاۋ جانە تىركەۋ پوليسەيلەر ءۇشىن قيىنعا سوقتى. سەبەبى ەسىرتكى تەكسەرۋدەن وتكەن تاپسىرىس بەرۋشىلەرگە عانا جەتكىزىلگەن.
ارنايى قۇرىلعان جەدەل-تەرگەۋ توپتارى الماتى قالاسى مەن الماتى وبلىسىنىڭ اۋماعىندا 14 ادامدى ۇستادى. ءبىر ۋاقىتتا قىزمەتتىك-ىزدەستىرۋ يتتەرىن تارتا وتىرىپ، ءتىنتۋ جۇرگىزىلدى. ءار ۇيدە ەسىرتكى زاتتارى تابىلىپ، تاركىلەندى. الماتى وبلىسىنىڭ بايتەرەك كەتىندە ۇستالعانداردىڭ بىرىنە تيەسىلى جەكە ءۇيدى ءتىنتۋ كەزىندە قۇرامىندا ەسىرتكى بار وسىمدىكتەردى وسىرۋگە ارنالعان جارىقديودتى شامدار ورناتىلعان قوسالقى ءۇي-جاي تابىلدى. 32 قاراسورا بۇتاسى تاركىلەندى. ەكىنشى زەرتحانا الماتىداعى جەكە ءۇيدىڭ جەرتولەسىندە انىقتالدى. ول جەردەن قۇرامىندا ەسىرتكى بار قاراسورا بۇتالارى، تۇقىمدار، كەپتىرىلگەن ماريحۋانا سالىنعان ورامالار جانە وسىمدىكتەردى وسىرۋگە ارنالعان جابدىقتار تاركىلەندى. ۇستالعان ساتتە قىلمىستىق توپتىڭ مۇشەلەرىنىڭ بارلىعى ەسىرتكىلىك ماساڭ كۇيدە بولعان. وپەراسيا ناتيجەسىندە زاڭسىز اينالىمنان 40 كەلىدەن استام ەسىرتكى زاتتارى تاركىلەندى. قىلمىستىق ىسكە زاتتاي دالەل رەتىندە تاركىلەنگەن قاراسورا تۇقىمى، ونى وسىرۋگە ارنالعان جابدىق، ۇلتتىق جانە شەتەل ۆاليۋتاسىنداعى قاراجات، قىلمىسقا پايدالانىلعان ۇيالى تەلەفوندار دا قوسا تىركەلدى.
«ەسىرتكى بيزنەسىنە قاتىسۋشىلار ەسىرتكىنى ءوسىرۋ مەن زاڭسىز اينالىمىنان باسقا ق ر قك-نىڭ 262-بابى “ۇيىمداسقان توپ، قىلمىستىق ۇيىم قۇرۋ جانە ولارعا باسشىلىق ەتۋ، سول سياقتى ولارعا قاتىسۋ” بويىنشا تەرگەلەتىن بولادى. جازا مۇلكى تاركىلەنىپ، ون ەكى جىلعا دەيىن باس بوستاندىعىنان ايىرۋدى كوزدەيدى»، - دەپ حابارلادى ءىىم.
پوليسيا ەسىرتكى زاتتارىنا بايلانىستى كەز-كەلگەن ىس-ارەكەت ءۇشىن قىلمىستىق جاۋاپكەرشىلىك بار ەكەنىن ەسكەرتەدى. ەگەر سىزگە “وڭاي تابىس تابۋ” تۋرالى ۇسىنىس تۇسسە نەمەسە قىلمىستىڭ كۋاسى بولساڭىز، 102 ارناسىنا دەرەۋ حابارلاۋدى سۇرايمىز.