الەمدى جاياۋ ارالاۋعا شىققان ۇلىتاۋلىق اقساقال رەسەي شەكاراسىنا جەتتى
سارسەنباي قاريا جەر جاھاندى جاياۋ ارالاماق. ۇلىتاۋ وبلىسىندا تۇراتىن 73 جاستاعى ساياحاتشى سارسەنباي قوتىراشوۆتىڭ 2 تامىزدا اتىراۋدان جولعا شىققان ەدى، دەپ حابارلايدى Almaty-akshamy.kz.
قازاقپاراتتىڭ جازۋىنشا، ساياحاتشى بۇگىن، 8 تامىزدا قازاقستان-رەسەي شەكاراسىنا جەتتى. بۇل تۋرالى ساياحاتشى ءوزىنىڭ الەۋمەتتىك جەلىدەگى پاراقشاسىندا ءبولىستى.
«مىنە، شەكاراعا جەتتىم. ءبىرىنشى شەكارادان وتكەلى تۇرمىن. اتىراۋدان 300 شاقىرىمنان استام جاياۋ ءجۇردىم. جولدىڭ كەيبىر جەرى ناشار، كەيبىر تۇسى جاقسى. جول سالىنىپ جاتىر. كەلەسى جىلعا دەيىن بىتەتىن شىعار. بۇگىن مىنە، ءبىرىنشى رەت شەكارانى كورىپ، قوبالجىپ تۇرمىن. اللا ءساتىن سالسا، وتەرمىن، ساۋ بولىڭىزدار، قازاقستاندىقتار»، - دەدى سارسەنباي قوتىراشوۆ.
ەگدە جاستاعى ساياحاتشى سارسەنباي قوتىراشوۆ الەمدى جاياۋ ارالاۋ ساپارىنا شىعار الدىندا اتىراۋلىق جاستارمەن كەزدەستى.
«مەنىڭ جاياۋ ساپارىم الەمنىڭ بىرنەشە ەلىن قامتيدى. قازاقستاننان جولعا شىعىپ، رەسەي، گرۋزيا، تۇركيا، بولگاريا، سەربيا، ۆەنگريا، اۆستريا، گەرمانيا، فرانسيا، اقش، جۇڭگو، موڭعوليا ەلدەرىنە بارامىن. كەيىن رەسەي ارقىلى قازاقستانعا ورالۋدى كوزدەپ وتىرمىن. جاياۋ ساپارىم 2 جىلعا سوزىلىپ، 2025 جىلدىڭ تامىزىندا اياقتايمىن دەگەن جوسپارىم بار»، - دەيدى سارسەنباي قوتىراشوۆ.
سارسەنباي قوتىراشوۆ جاياۋ ساپارىن بىرنەشە باعىتقا بولگەن. العاشقى مارشرۋتى – قازاقستان، رەسەي، گرۋزيا، تۇركيا ەلدەرىنە بارۋ. بۇل ەلدەردى ارالاۋ ءۇشىن 3 مىڭ شاقىرىمعا جۋىق جول جۇرەدى. بۇعان 100 كۇن قاجەت.
ەكىنشى باعىتتاعى تۇركيا، فرانسيا، اقش ەلدەرىن 180 كۇندە ارالاۋدى جوسپارلاپ وتىر. بۇل ءۇشىن 9 مىڭ شاقىرىمنان استام جولدى ەڭسەرمەك.
ءۇشىنشى كەزەڭە اقش-تان باستاپ، جۇڭگو، موڭعوليا، رەسەي ارقىلى قازاقستانعا ورالادى. بۇل كەزەڭدە 130 كۇندە 4 مىڭ شاقىرىمنان استام جول جۇرەدى. ول ەكى جىلدا 16 210 شاقىرىمدى باعىندىرماق.