ۇلتتىق قاۋىپسىزدىك كوميتەتى پسيحوتروپتى زاتتاردىڭ ماسشتابتى ءوندىرىسىن جويدى.
ۇقك باسپا ءسوز قىزمەتى سينتەتيكالىق ەسىرتكىنىڭ رەكوردتى پارتياسى زاڭسىز اينالىمنان الىنعانىن مالىمدەدى، دەپ حابارلايدى Almaty-akshamy.kz.
«18 قاڭتاردا الماتى قالاسىندا جالعا الىنعان جەكە ۇيدە پسيحوتروپتى زاتتاردى دايىنداۋ پروسەسىندە ەسىرتكى زەرتحاناسىن ۇيىمداستىرۋشى، 1997 جىلى تۋعان قازاقستان ازاماتى قىلمىس ۇستىندە ۇستالدى. ءتىنتۋ كەزىندە 200 كيلوگرامنان استام «مەفەدرون» ەسىرتكىسىنىڭ دايىن ءونىمى جانە 100 ليتر شيكىزاتى الىندى. دايىن ەسىرتكى زاتتارىنىڭ سالماعىنا قاراپ اتالعان زەرتحانانىڭ ەلدەگى ەڭ ءىرى زەرتحانا بولعانىن اڭعارۋعا بولادى»، دەلىنگەن حابارلامادا.
الىنعان «مەفەدرون» كولەمى شامامەن 610 مىڭ ءبىر رەتتىك دوزاعا ەكۆيۆالەنتتى. بۇل رەتتە، ەسىرتكىلەر قازاقستان اۋماعىندا وتكىزۋ ءۇشىن ارنالعان. سوت شەشىمىمەن فيگۋرانتتارعا قاماۋدا ۇستاۋ تۇرىندەگى بۇلتارتپاۋ شاراسى تاعايىندالدى.
قىلمىستىق كودەكستىڭ 297-بابى 3-بولىگى بويىنشا سوتقا دەيىنگى تەرگەپ-تەكسەرۋ ءجۇرىپ جاتىر.