الماتى قالاسىندا پاترۋلدىك پوليسيا قىزمەتكەرلەرى ەسىرتكى قۇرالدارىن وتكىزۋمەن اينالىستى دەگەن كۇدىكپەن ەر ادامدى ۇستادى.
تاڭعى ساعات 05:00 شاماسىندا المالى اۋدانىنداعى تۇرعىن ۇيلەردىڭ ءبىرىنىڭ اۋلاسىندا، قاراساي باتىر مەن جاروكوۆ كوشەلەرىنىڭ قيىلىسىنا جاقىن ماڭدا پاترۋلدىك ەكيپاج جاس جىگىتتىڭ كۇماندى ارەكەتىنە نازار اۋدارعان. كۇدىكتىنى ءتىنتۋ بارىسىندا ودان ۇنتاق ءتارىزدى زات سالىنعان ورامالار تابىلدى.
سوت-حيميالىق ساراپتامانىڭ قورىتىندىسىنا سايكەس، تاركىلەنگەن زات سينتەتيكالىق ەسىرتكى بولىپ شىقتى. اتالعان دەرەك بويىنشا المالى اۋداندىق پوليسيا باسقارماسى قىلمىستىق ءىس قوزعادى. 20 جاستاعى كۇدىكتى ۋاقىتشا ۇستاۋ يزولياتورىنا قامالدى.
الدىن الا مالىمەتتەرگە سايكەس، ۇستالعان ازامات ەسىرتكىنى جاسىرىن قويىپ كەتۋشى رەتىندە جۇمىس ىستەگەن. ياعني تاپسىرمالاردى ينتەرنەت ارقىلى الىپ، جاسىرىن ورىنداردىڭ كوورديناتتارىن جانە اقشالاي سىياقىنى ونلاين فورماتتا العان.
قازىرگى ۋاقىتتا جەدەل بولىمشەلەر زاڭسىز ارەكەتتى ۇيىمداستىرعان تۇلعالاردى انىقتاۋ جۇمىستارىن جۇرگىزۋدە. ولار ۇستالىپ، زاڭعا سايكەس جاۋاپكەرشىلىككە تارتىلادى.
"بۇگىندە ەسىرتكى بيزنەسى جاستاردى ينتەرنەت ارقىلى وڭاي اقشا تابۋعا ۋادە بەرىپ، قىلمىستىق ارەكەتكە تارتۋعا تىرىسۋدا. الايدا مۇنىڭ سوڭى ءاردايىم قىلمىستىق جاۋاپكەرشىلىككە اكەلىپ، ادامنىڭ تاعدىرىن ۇزاق جىلدارعا كۇيرەتەدى. بىردە-بىر "تاپسىرىس بەرۋشى" تاسادا قالمايدى — ءبىز بارلىق ۇيىمداستىرۋشىلاردى انىقتاپ، جۇمىستى سوڭىنا دەيىن جەتكىزەمىز"، — دەدى الماتى قالاسى پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇمابايەۆ.
سونداي-اق ول جاستارعا ۇندەۋ جاسادى.
"جىلدام ءارى وڭاي تابىس تۋرالى ۋادەلەرگە سەنبەڭىزدەر. ەسىرتكى تاسىمالداۋشى بولۋ — قوسىمشا تابىس ەمەس، اۋىر قىلمىس. مۇنداي تاڭداۋدىڭ جالعىز ناتيجەسى — باس بوستاندىعىنان ايىرۋ جانە بۇلىنگەن ءومىر. ءوزىڭىزدى جانە بولاشاعىڭىزدى قورعاڭىز"، — دەپ تۇيىندەدى سپيكەر.