1134 ەرەسەك ادام رەسمي تىركەۋدە تۇر
الماتىدا رەسمي ەسەپكە ەسىرتكىگە تاۋەلدى 1134 ەرەسەك ادام مەن 14 بالا تىركەلگەن. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا وتكەن باسپا ءسوز ءماسليحاتىندا "ناركوستوپ" جوباسىنىڭ PR مامانى جانار نۇرسەيىتوۆا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىنگى كۇنى الماتىدا ەسىرتكىگە تاۋەلدى 14 ءجاسوسىپىرىم بار. ودان بولەك، ءۇش بالا توكسيكومان. 1134 ەرەسەك ادام رەسمي تىركەۋدە تۇر. بۇلار دەنساۋلىق ساقتاۋ مەكەمەسىنە ءوز ەركىمەن بارىپ، رەسمي تىركەلگەندەر عانا. ال، ناقتى قارايتىن بولساق، بۇل كورسەتكىش ودان دا كوپ بولۋى مۇمكىن. دۇنيەجۇزىلىك دەنساۋلىق ساقتاۋ ۇيىمى رەسمي ساندى 8-گە كوبەيتۋدى ۇسىنادى. سول كەزدە ەسەپكە الىنباعان ناشاقورلاردىڭ سانى شىعادى ەكەن»، - دەيدى جانار نۇرسەيىتوۆا.
ايتۋىنشا، ەسىركىگە تاۋەلدى بالالاردىڭ اتا-اناسى مەملەكەتتىك مەديسينالىق ورىندارعا بارعىسى كەلمەيدى، ەسەپكە العانىن قالمايدى. سول سەبەپتى جەكە كلينيكالاردى ىزدەيدى.
«جەكە ورتالىقتاردا ەسىرتكىگە تاۋەلدى ادامدى ەمدەۋگە ءبىر ايدا شامامەن 700 مىڭ تەڭگەگە جۋىق قاراجات قاجەت بولادى. ەسىرتكىگە تاۋەلدى ادام قالپىنا كەلىپ، كۇندەلىكتى ومىرگە ورالۋ ءۇشىن 4-6 اي كەرەك. ياعني، ءبىر ادامعا 5 ملن تەڭگە كەتەدى. بۇل سومانى كەز كەلگەن ادامنىڭ قالتاسى كوتەرمەيدى. ءبىزدىڭ جوبا ارقىلى 2021 جىلدان بەرى 13 ادام تەگىن ەم-دوم الدى. بۇل - ءبىز ءۇشىن ۇلكەن جەتىستىك»، - دەيدى سپيكەر.