بۇرىن ول جەردە اسكەري گوسپيتال بولعان
مەملەكەتكە 7 جىل بويى پايدالانىلماعان جەر ۋچاسكەسى قايتارىلدى. ول الماتى قالاسىنىڭ مەدەۋ اۋدانىندا نازاربايەۆ داڭعىلى مەن ساتبايەۆ كوشەسىنىڭ قيىلىسىندا ورنالاسقان. اتالعان تەرريتوريا ورتالىق مەملەكەتتىك مۇراجاي عيماراتىنىڭ ماڭىندا بولىپ تابىلادى، دەپ حابارلايدى Almaty-akshamy.kz Zakon.kz-كە سىلتەمە جاساپ.
بۇرىن ول جەردە اسكەري گوسپيتال بولعان. جەر كاداسترىنىڭ سايتىندا كورسەتىلگەندەي، بۇل ۋچاسكە 20-315-021-540 ءنومىرى بويىنشا تىركەلگەن.
جەر تەلىمىنىڭ ماقساتى: "اۆتوپاركينگ جانە حالىققا قىزمەت كورسەتۋ وبەكتىلەرى بار كوپفۋنكسيونالدى اكىمشىلىك-قوناق ءۇي تۇرعىن ءۇي كەشەنى ءۇشىن".
بۇعان دەيىن باس اسكەري پروكۋراتۋرانىڭ باسپا ءسوز قىزمەتى جەر ۋچاسكەسىنىڭ مەملەكەتكە قايتارىلعانى تۋرالى حابارلاعان. 2014 جىلى نارىقتىق قۇنى 6 ملرد تەڭگەدەن اساتىن، جالپى اۋدانى 3،8484 گەكتار بولاتىن جەر ۋچاسكەسى "دوستىق ستروي" قۇرىلىس كومپانياسى" ج ش س مەنشىگىنە وتكەن بولاتىن.