الماتى پوليسياسى ەسىرتكى تيەلگەن ەكى كولىكتى توقتاتتى.
ءبىرىنشى جاعدايدا ەسىرتكى قىلمىسىنا كۇدىكتىنىڭ كولىگىن پوليسيا قىزمەتكەرلەرى "اقساي" ىقشاماۋدانىندا تاڭعى جەتىدە توقتاتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل – د. ەسىمدى ازامات باسقارعان Daewoo Nexia كولىگى. جولاۋشى 27 جاستاعى ەر ادام. كولىكتى تەكسەرۋ بارىسىندا قارا جانە كوك ءتۇستى يزولەنتامەن ورالعان 39 پوليەتيلەن بايلامى تابىلدى جانە تاركىلەندى، ونىڭ ىشىندە وزىنە ءتان ءيىسى بار اق ءتۇستى ۇنتاق ءتارىزدى زات بولدى. سوت-حيميالىق ساراپتامانىڭ قورىتىندىسىنا سايكەس، تاركىلەنگەن زاتتار سينتەتيكالىق مەفەدرون ەسىرتكىسى ەكەنى انىقتالدى. جاستار ەسىرتكى قويۋشى رەتىندە قوسىمشا تابىس تاباتىنىن، تاپسىرىس تانىمال مەسسەندجەر ارقىلى قابىلداناتىنىن مويىندادى. ۇستالعانداردىڭ ىس-ارەكەتتەرى تەرگەۋمەن ق ر قك-نىڭ 297-بابى 3-بولىگىنىڭ 5-تارماعى بويىنشا سارالانادى. ولار تۇتقىندالدى. بۇل ەسىرتكى قىلمىسى ءۇشىن 10 جىلدان 15 جىلعا دەيىن باس بوستاندىعىنان ايىرۋ قاراستىرىلعان»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
مەدەۋ اۋدانىندا وسپانوۆ كوشەسىنىڭ بويىندا پوليسيانىڭ ارنايى جاساعى تاعى ءبىر كۇدىكتى كولىكتى توقتاتتى. Toyota Camry كولىگىن 32 جاستاعى ك. ەسىمدى ازامات باسقارىپ كەلە جاتقان.
«كولىكتى تەكسەرۋ بارىسىندا قارا يزولەنتامەن ورالعان 4 پوليەتيلەن بايلامى تابىلدى جانە تاركىلەندى، ونىڭ ىشىندە وزىنە ءتان ءيىسى بار اق ءتۇستى ۇنتاق ءتارىزدى زات بولدى. سوت-حيميالىق ساراپتامانىڭ قورىتىندىسىنا سايكەس، تاركىلەنگەن زاتتار اسا ءىرى سالماقتاعى سينتەتيكالىق مەفەدرون ەسىرتكى زاتى بولىپ شىقتى. ەر ادامنىڭ ەسىرتكىنى قانداي ماقساتتا ساقتاعانىن جانە تاسىمالداعانىن تەرگەۋ انىقتايتىن بولادى. بالكىم، ول ءشوپتى ساتىپ، ودان اقشا تاپقان بولۋى دا مۇمكىن»، – دەدى ە. الماعامبەتوۆ.