الماتىدا 27 جاستاعى ەر ادام كوپقاباتتى تۇرعىن ءۇي كەشەنىندە ەسىرتكى زەرتحاناسىن ۇيىمداستىرعان.
سينتەتيكالىق ەسىرتكىنى شىعاراتىن زەرتحانا الماتىنىڭ بوستاندىق اۋدانىندا ورنالاسقان تۇرعىن ءۇي كەشەندەرىنىڭ بىرىندەگى ەكى بولمەلى پاتەردە جۇمىس ىستەپ تۇرعان، دەپ حابارلايدى Almaty-akshamy.kz.
27 جاستاعى ۋ.ەسىمدى ازامات “سينتەتيكا” ءوندىرۋ ءۇشىن تۇرعىن ءۇيدى ارنايى جالعا العاندىعى بەلگىلى بولدى.
– ءتىنتۋ كەزىندە ءبىزدىڭ بولىمشە قىزمەتكەرلەرى مەديسينالىق شپريستەر، قولعاپتار، لاكمۋس قاعازى، جاسىل ءتۇستى يزولەنتا، پرەكۋرسورلار مەن تۇز قىشقىلى بار ىدىستار، ارنايى زەرتحانالىق شىنى ىدىستار، ەلەكتروندى تارازىلار جانە سينتەتيكالىق پسيحوتروپتىق زات مەفەدرون وندىرىسىندە قولدانىلاتىن باسقا دا قۇرالداردى تاركىلەدى. سونداي-اق دايىن ءونىم – كريستالدار تۇرىندەگى اقشىل ءتۇستى زات. ساراپتاما قورىتىندىسىنا سايكەس، بۇل زات جالپى سالماعى 139،57 گرامم الفا-PVP ەسىرتكى زاتى بولىپ تابىلادى. سونىمەن قاتار كوك ءتۇستى يزولەنتاعا ورالعان، اقشىل ۇنتاقتى زات، بولجام بويىنشا مەفەدرون، بولەك ورالعان 15 جانە 6 بەتبەلگى تاركىلەندى. پاتەردەن تابىلعاننىڭ ءبارى: سۇيىقتىق، كريستالدى جانە ۇنتاق كۇيىندە سوت-حيميالىق ساراپتاماعا جىبەرىلدى، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
ايتپاقشى، جاس جىگىتتىڭ بۇرىن مۇلىكتىك قىلمىس جاساعانى ءۇشىن سوتتىلىعى بار. اتالعان دەرەك بويىنشا ق ر قك-نىڭ 297-بابى 2-بولىگىنە سايكەس قىلمىستىق ءىس قوزعالدى. ىسكە قاتىسى بار ازامات ۋاقىتشا ۇستاۋ يزولياتورىنا قامالدى. ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77 بابى 3ء-بولىمى 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.