قازاقستاندا 18 جاسقا دەيىنگى بالالار ءمامس جۇيەسىندە مەملەكەت تاراپىنان ساقتاندىرىلعان.
الماتىدا №2 قالالىق كلينيكالىق بالالار اۋرۋحاناسىندا العاش رەت ەپيلەپسيانىڭ اۋىر تۇرىنە شالدىققان بالالارعا وپەراسيا جاسالدى، دەپ حابارلايدى Almaty-akshamy.kz.
اۋرۋحانانىڭ باسپا ءسوز قىزمەتى ءمالىم ەتكەندەي، 2023 جىلدىڭ 13 قاڭتارى مەن 16 قاڭتارى ارالىعىندا №2 قالالىق كلينيكالىق بالالار اۋرۋحاناسىندا الەمگە ايگىلى نەيروحيرۋرگ، گەرمانيالىق پروفەسسور ۋلريح تومالەنىڭ قاتىسۋىمەن بالالار نەيروحيرۋرگياسى بويىنشا «دارىگە ءتوزىمدى ەپيلەپسيامەن اۋىراتىن بالالارداعى از ءينۆازيۆتى فۋنكسيونالدى گەميسفەروتوميا» اتتى بىرەگەي شەبەرلىك ساباعى ءوتتى.
سونىڭ اياسىندا نەمىس مامانى جەتەكشى قازاقستاندىق نەيروحيرۋرگتەرمەن بىرلەسىپ ەپيلەپسيانىڭ كۇردەلى تۇرىنە بەس وتا جاسادى.
«ءبىزدىڭ بەس كىشكەنتاي بالامىزعا وتا جاسالدى. بەرليندەگى «شاريتە» كلينيكاسىنان كەلگەن قوناعىمىز، پروفەسسور تامالەنىڭ جەتەكشىلىگىمەن شەبەرلىك ساباعى بارىسىندا ەپيلەپسيامەن اۋىراتىن بالالارعا كۇردەلى وپەراسيالار جۇرگىزىلدى. بارلىق وپەراسيا ءساتتى ءوتتى، بالالار ءقازىر نەيروحيرۋرگيا بولىمشەسىندە جاتىر. بۇدان بىلاي مۇنداي بالالارعا ءوز بەتىمىزشە وپەراسيا جاسايمىز دەپ ويلايمىن»،- دەدى №2 قالالىق كلينيكالىق بالالار اۋرۋحاناسىنىڭ باس دارىگەرى مارات راباندياروۆ.
سوڭعى جىلدارى ەپيلەپسيا حيرۋرگياسى بويىنشا جاڭا تەحنولوگيالار ەنگىزىلۋدە. ولار بۇرىن مۇنداي ەمدەلۋ مۇمكىن بولماعان ناۋقاستاردىڭ ساۋىعىپ كەتۋىنە مۇمكىندىك بەرەدى.
پروفەسسور اتاپ وتكەندەي، ميكروحيرۋرگيالىق از ءينۆازيۆتى ادىستەمەنى قولدانۋ بويىنشا وسى حيرۋرگيالىق ارالاسۋلار كەزىندە كومپيۋتەرلىك اسسيستەنسيا مىندەتتى تۇردە قولدانىلادى.
«بەرليندە ءبىز ءوزىمىز بۇل ءادىستى «3D-شىندىق» نەيروناۆيگاسيالىق جۇيەسى ارقىلى ەنگىزۋدى جاقىندا عانا باستادىق. بۇل زاماناۋي تەحنولوگيا وسى قازاقستاندىق كلينيكادا پايدا بولعاندىقتان، ءبىز وسى ءادىستى قازاقستاندا بىرگە ەنگىزۋدى ۇيعاردىق. ايتا كەتۋ كەرەك، بالالار اۋرۋحاناسىنىڭ وپەراسيالىق بولمەسى جوعارى دەڭگەيلى، زاماناۋي مەديسينالىق تەحنيكامەن جابدىقتالعان. ءارى قاراي ۇنەمى دامىپ، تەحنيكانى دا، جاڭا ادىستەردى دە جەتىلدىرۋ وتە ماڭىزدى»، - دەدى نەمىس دارىگەرى.
ايتا كەتەيىك، وتا مىندەتتى الەۋمەتتىك مەديسينالىق ساقتاندىرۋ اياسىندا تەگىن جاسالدى.
ەستەرىڭىزگە سالا كەتەيىك، قازاقستاندا 18 جاسقا دەيىنگى بالالار ءمامس جۇيەسىندە مەملەكەت تاراپىنان ساقتاندىرىلعان.