باستى مىندەت – جۇمىسسىزدىققا جول بەرمەۋ.
كارانتين كەزىندە كوپتەگەن قالا تۇرعىندارى جۇمىسقا ورنالاسۋدا قيىندىقتارعا تاپ بولدى. الماتىدا جۇمىسپەن قامتۋ ماسەلەسىن «ەڭبەك» مەملەكەتتىك باعدارلاماسىنىڭ كومەگىمەن شەشەدى. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز ءماسليحاتى بارىسىندا الماتى قالاسى الەۋمەتتىك ءال-اۋقات باسقارماسى باسشىسىنىڭ ورىنباسارى دانيار الكەباي ۇلى ايتتى، دەپ حابارلايدى Almaty-akshamy.kz.
دانيار الكەباي ۇلىنىڭ ايتۋىنشا، حالىقتىڭ وسال توپتارىن قورعاۋ - مەملەكەتتىڭ الەۋمەتتىك ساياساتىنىڭ نەگىزگى فۋنكسيالارىنىڭ ءبىرى. سوندىقتان قالادا «ەڭبەك» مەملەكەتتىك باعدارلاماسى اياسىندا جاڭا جۇمىس ورىندارى قۇرىلۋدا.
«بيىل «ەڭبەك» باعدارلاماسى اياسىندا 13 مىڭعا جۋىق ادامدى جۇمىسپەن قامتۋ شارالارى جوسپارلانۋدا. ونىڭ ىشىندە 800 ادامدى جاستار پراكتيكاسىنا، 960 ادامدى الەۋمەتتىك جۇمىس ورىندارىنا، 6 مىڭ ادامدى قوعامدىق جۇمىستارعا جىبەرەمىز، سونداي-اق مىڭعا جۋىق ادامعا گرانت بەرۋ قاراستىرىلعان، سۇرانىسقا يە ماماندىقتارعا قىسقا مەرزىمدى وقىتۋعا تاعى 1000 ادامدى جىبەرەمىز جانە 115 الماتىلىققا شاعىن نەسيە بەرەمىز ءارى باسقا دا كوپتەگەن قولداۋ شارالارىن ۇسىنامىز»، – دەدى دانيار الكەباي ۇلى.
بۇل رەتتە ۇسىنىلاتىن ماماندىقتار اۋقىمى كەڭ، جوو، كوللەدجدەر، كاسىپتىك ليسەي تۇلەكتەرى دە، زەينەتكەرلىك جاسقا دەيىنگى ازاماتتار دا، ءبىلىمى جوق ادامدار وزدەرىنە ۇنايتىن تۇراقتى جۇمىس تابا الادى.
دانيار الكەباي ۇلىنىڭ ايتۋىنشا، جۇزدەگەن قالا تۇرعىندارى كۇن سايىن ولارعا جۇگىنەدى.
جىل باسىنان بەرى جۇمىسپەن قامتۋ ورتالىعىنا 25 مىڭ ادام ءوتىنىش بەرگەن. جۇمىسپەن قامتۋ شارالارى بويىنشا 17،3 مىڭ قالا تۇرعىنى قامتىلدى. ونىڭ ىشىندە 7،7 مىڭ ادام تۇراقتى جۇمىسقا تۇردى، 8،3 مىڭ ادام ۋاقىتشا جۇمىس ورىندارىنا جىبەرىلدى.
الماتى قالاسى الەۋمەتتىك ءال-اۋقات باسقارماسى باسشىسىنىڭ ورىنباسارى دانيار الكەباي ۇلى قولداۋ شارالارى تۋرالى ايتتى. بيزنەس-يدەيالاردى ىسكە اسىرۋ ماقساتىندا 2021 جىلى ءارقايسىسى 200 اەك-كە دەيىنگى مولشەردە 1 مىڭ گرانت بەرۋ جوسپارلانعان. بۇگىندە بولاشاق كاسىپكەرلەرگە 495 گرانت بەرىلدى.
«باستى مىندەت – جۇمىسسىزدىققا جول بەرمەۋ، سوندىقتان ءبىز قالا تۇرعىندارىن جاڭا سۇرانىسقا يە ماماندىقتارعا وقىتامىز. بۇگىندە 600 الماتىلىق ءبىلىم الۋدا، تاعى دا 1000 جۇمىسسىزدى كۋرستارعا جىبەرۋ جوسپارلاندى»، - دەدى سپيكەر.
سونداي-اق 2021 جىلعى نوۋ-حاۋ «ءبىرىنشى جۇمىس ورنى» جوباسى بولدى. ول جاستاردى جۇمىسقا ورنالاستىرۋعا ءارى ءتيىستى ەڭبەك تاسىلدەرىن ۇيرەتۋگە جانە ءبىرىنشى جۇمىس ورنىندا بەيىمدەلۋگە باعىتتالعان. بۇگىندە وسى جوبا اياسىندا 24 ادام جۇمىس ىستەيدى.
دانيار الكەباي ۇلى «بيزنەستىڭ جول كارتاسى»، «نۇرلى جەر»، يندۋستريالىق-يننوۆاسيالىق دامۋ، اگروونەركاسىپتىك كەشەن، ءبىلىم مەن عىلىمدى دامىتۋ، وڭىرلەردى دامىتۋ، تۋريستىك سالا، «ەڭبەك» جانە باسقا دا باعدارلامالار اياسىندا الماتىدا 15،6 مىڭ جۇمىس ورنى قۇرىلعانىن ايتتى.