قابىلداۋ عيماراتى جاڭا سانيتارلىق ەرەجەلەرگە، ترياج ايماعىنىڭ نورمالارىنا سايكەس كەلەدى
بۇگىن №7 قالالىق كلينيكالىق اۋرۋحانادا وپەراسيالىق بولىمشەسى بار قابىلداۋ ءبولىمىنىڭ جاڭا عيماراتى اشىلدى. وعان الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى يران شامەتەكوۆ قاتىستى، دەپ حابارلايدى Almaty-akshamy.kz.
الماتى قالاسى قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتىنىڭ مالىمەتىنشە، جاڭا قابىلداۋ ءبولىمى شامامەن 2 000 شارشى مەتر اۋماقتى قامتيدى (ەسكى قابىلداۋ ءبولىمىنىڭ اۋماعى 1 264 ش.م. بولعان).
«ەگەر ەسكى قابىلداۋ ءبولىمى تاۋلىگىنە 300 ناۋقاس قابىلداسا، ءقازىر بۇل كورسەتكىش 500 ادامعا دەيىن ءوستى. قابىلداۋ ءبولىمىنىڭ قىزمەتكەرلەرى جىلىنا 100 000 ناۋقاسقا تاۋلىك بويى كومەك كورسەتەتىن بولادى. قابىلداۋ ءبولىمى الەمدە قابىلدانعان ەڭ جوعارى زاماناۋي ستاندارتتارعا ساي سالىنىپ، جابدىقتالعان. اتاپ ايتقاندا، زاماناۋي ەمدەۋ-دياگنوستيكالىق قۇرال-جابدىقتارمەن ونىڭ ىشىندە كت، رەنتگەن اپپاراتى، ۋلترادىبىستىق اپپاراتتار، بەينەفيبروگاستروسكوپ، انەستەزيا جانە تىنىس الۋ اپپاراتتارىمەن جانە ت.ب. جابدىقتالعان. ودان بولەك، وپەراسيالىق بولمەلەر، جانساقتاۋ جانە قارقىندى تەراپيا بولىمشەلەرى بار»، - دەيدى يران شامەتەكوۆ.
سونداي-اق مۇندا اۆتونومدى جەلدەتۋ جۇيەسى، باكتەريسيدتىك سۇزگىلەر، وپەراسيالىق بولىمشەگە ارنالعان تاۋەلسىز جەلدەتۋ جۇيەلەرى، جىلىتۋ جانە اۋانى باپتاۋى بار رەانيماسيا بولمەلەرى مەن قارقىندى تەراپيا بولىمدەرى بار.
جاڭا قابىلداۋ بولىمىندە پاسيەنتتەر ءۇشىن ماكسيمالدى ىڭعايلىلىق پەن قۇپيالىلىق ءۇشىن بارلىعى بار.
جەدەل تراۆماتولوگيا بولىمشەسىنە جەكە كىرەبەرىس بار، وندا جول-كولىك وقيعاسى، وندىرىستەگى جازاتايىم وقيعالار جانە ت.ب. سالدارىنان اۋىر جاراقات العان كوپتەگەن ناۋقاسقا ءبىر ۋاقىتتا بىلىكتى كومەك كورسەتىلەدى.
قابىلداۋ عيماراتى جاڭا سانيتارلىق ەرەجەلەرگە، ترياج ايماعىنىڭ نورمالارىنا سايكەس كەلەدى. ترياج جۇيەسىنە سايكەس قابىلداۋ ءبولىمى قىزىل، سارى جانە جاسىل ايماقتارعا بولىنەدى، ولار ءتيىستى ءتۇستى باعىتتاۋىشتارمەن بەلگىلەنگەن.
سونىمەن قاتار، بولىمشە اۋرۋحانانىڭ نەگىزگى كىرەبەرىسىنەن بولەك، نەگىزگى جولعا جاقىن جانە جەدەل جاردەم كولىكتەرىنىڭ ەركىن كىرۋى جانە شىعۋى بار، مۇگەدەكتەر ارباسىنا ارنالعان پاندۋسپەن قامتاماسىز ەتىلگەن وڭاي قولجەتىمدى جەردە ورنالاسقان.
يران مارات ۇلى اتاپ وتكەندەي، جاڭا 2023 جىلى تۇرعىنداردىڭ جاياۋ ءجۇرۋ قاشىقتىعى اياسىندا بىلىكتى مەديسينالىق كومەك الۋى ءۇشىن مەديسينالىق ۇيىمداردىڭ ءبىرقاتار جاڭا نىساندارىن اشۋ جوسپارلانعان. ماسەلەن، جاڭا جىلدىڭ ءبىرىنشى توقسانىندا اۋەزوۆ جانە جەتىسۋ اۋداندارىنداعى «مامىر» جانە «كەمەل» وتباسىلىق دارىگەرلىك امبۋلاتوريالارىن پايدالانۋعا بەرۋ، سونداي-اق الماتى قالاسى بالالار جەدەل مەديسينالىق كومەك كورسەتۋ ورتالىعىنىڭ كەڭەيتىمىن پايدالانۋعا بەرۋ جوسپارلانعان.