الماتىدا ءوتىپ جاتقان الەم چەمپيوناتىندا بۇگىن بليس شاحماتتان جارىس باستالدى. كەشە جىلدام شاحمات جارىسى اياقتالعان بولاتىن.
ءۇش كۇنگە سوزىلعان جىلدام شاحماتتىڭ ناتيجەسى بويىنشا جەڭىمپازدار كەشە انىقتالعان. راپيدتەن ەرلەر اراسىندا جارىس ءفاۆوريتى نورۆەگيالىق ماگنۋس كارلسەن جەڭىسكە جەتىپ، ءتورتىنشى رەت چەمپيون بولدى. ول بۇعان دەيىن 2014، 2015، 2019 جىلدارى جىلدام شاحماتتان الەم چەمپيونى اتانعان.
«مەنى توقتاتاتىن ادام شىققان كەزدە عانا مەن مانسابىمدى اياقتايمىن. جالپى تۋرنير دەڭگەيى وتە جوعارى. جەڭىسكە جەتۋ وڭاي بولعان جوق»، – دەپ ءوز جەڭىسىنەن كەيىن ماگنۋس كارلسەن پىكىر ءبىلدىردى.
ايتىلعان جارىس تۇرىنەن 2-ورىن 18 جاستاعى نەمىس گروسسمەيستەرى ۆينسەنت كەيمەرگە بۇيىردى. ال 3-ورىنعا امەريكالىق شاحماتشى فابيانو كارۋانا جايعاستى.
ال ايەلدەر اراسىنداعى جىلدام شاحماتتا وتانداسىمىز دينارا ءسادۋاقاسوۆا شەبەر ونەر كورسەتىپ، الەم چەمپيوناتىنىڭ كۇمىس جۇلدەسىنە يە بولدى. ق ر شاحمات فەدەراسياسىنىڭ اتقارۋشى ديرەكتورى گۇلميرا داۋلەتوۆانىڭ ايتۋىنشا، بۇل - ەلىمىز ءۇشىن وتە جاقسى ناتيجە.
- ءبارىمىز قۋانىشتىمىز. سەبەبى قازاقستان نامىسىن قورعاعان دينارا ءسادۋاقاسوۆا جارىستا ەكىنشى ورىن الدى. بۇل - مەملەكەتىمىز ءۇشىن ۇلكەن جەتىستىك. دينارا ءبىرىنشى ويىن كۇنى ءتورت رەت تەڭ ناتيجە كورسەتتى. ءبىراق ودان كەيىنگى ويىنداردا ءبىرقاتار جەڭىستەرگە جەتىپ، ناتيجەسىندە قىتايلىق تان چجۋنيمەن ۇپايى تەڭ ءتۇستى. جارىس ەرەجەسى بويىنشا ونداي كەزدە شاحماتشىلار تاي-برەيك وينايدى. وكىنىشكە وراي، قىتايلىق قىز باسىم ءتۇستى. دەگەنمەن، بۇل دينارا ءۇشىن جاقسى ناتيجە، ول بۇعان دەيىن مۇنداي جۇلدەلى ورىنعا يە بولماعان ەدى. سونداي-اق، راپيد جارىسىن جانسايا ابدىمالىك 5-ورىندا اياقتادى، – دەدى گ.داۋلەتوۆا.
ق ر شاحمات فەدەراسياسىنىڭ اتقارۋشى ديرەكتورى بۇگىن باستالعان بليس شاحماتتا دا وتاندىق سپورتشىلاردان جۇلدەلى ورىندار كۇتەتىن جاسىرعان جوق.
- راپيد جارىسىندا قازاقستاندىق ەر شاحماتشىلاردان قازىبەك نوگەربەك ەڭ جوعارى ناتيجەنى كورسەتتى. ول جارىستى 38-ورىندا اياقتادى. 18 جاستاعى شاحماتشىمىز وتە جاقسى وينادى. جاقىندا عانا ول 18 جاسقا دەيىنگى جاس ساناتىندا الەم چەمپيونى اتانعان. وسى جولى ەرەسەك اراسىنداعى جارىس ەكەنىنە قاراماي، ءوزىن جاقسى كورسەتە ءبىلدى. ال بۇگىنگى باستالعان بليس تۋرالى ايتساق، ارينە، شاحماتشىلارىمىزدان جەڭىس كۇتەمىز. ءبىزدىڭ قىزدار ءبليستى وتە جاقسى وينايدى. ال ەرلەر اراسىنداعى بليستان قاراشا ايىندا رينات جۇمابايەۆ ازيا چەمپيونى بولدى. سوندىقتان ءۇمىتىمىز ۇلكەن، – دەپ اتاپ ءوتتى گۇلميرا داۋلەتوۆا.
بۇگىن بليس شاحماتتىڭ اشىلۋىنا العاشقى سيمۆولدىق قادامدى جاساعان كەڭەس راقىشيەۆ الماتىدا ءوتىپ جاتقان ءتۋرنيردىڭ پايداسى كوپ ەكەنىن ايتادى.
- مەن ءۇشىن بليستەن جارىستىڭ اشىلۋىندا بولۋ ۇلكەن مارتەبە. وتكەن جىلى مەن شاحمات فەدەراسياسىنىڭ قامقورشىلىق كەڭەسىنە شاقىرتۋ الدىم. ال بيىل الماتى قالاسىنىڭ قامقورشىلىق كەڭەسىنە شاقىرىلدىم. مەن شىن جۇرەكتەن ءبىزدىڭ فەدەراسياعا كومەكتەسۋگە دايىنمىن. قازاقستاندا شاحماتتىڭ مىقتى مەكتەبى قالىپتاسقان، ءبىز ونى ءارى قاراي دامىتقىمىز كەلەدى. مەنىڭ التى جاستاعى قىزىم دا شاحمات وينايدى، ول قازىرگى كۇنى شاحماتتان الماتى قالاسىنىڭ چەمپيونى، – دەدى ك.راقىشيەۆ.
جارىستىڭ ەكى تۋرى وتكەن سوڭ، شاحماتتان قازاقستان قۇراماسىنىڭ مۇشەسى – 22 جاستاعى الىشەر سۇلەيمەنوۆپەن تىلدەسۋدىڭ ءساتى ءتۇستى. ول بليس شاحماتتىڭ العاشقى ويىندارىنان العان اسەرىمەن ءبولىستى.
- العاشقى ويىندار مەن ءۇشىن ءساتسىز بولدى. ءبىراق ءارى قاراي جاقسى ونەر كورسەتۋگە تالپىنامىن. كەشە اياقتالعان راپيد جارىسى مەن ءۇشىن جاقسى ءوتتى. جالپى ۇزدىك جۇزدىكتىڭ ىشىنە كىرىپ، 92-ورىندا اياقتادىم. بۇل جارىس مەن ءۇشىن العاشقى بليس جانە راپيد بويىنشا الەم چەمپيوناتى. مۇندا وتاندىق جانكۇيەرلەردىڭ قولداۋى سەزىلەدى، – دەدى ول.
العاشقى ويىندار وتكەن كەزدە ب ا ق وكىلدەرىنە ارنالعان الاڭدا كوگىلدىر ەكرانعا تەلمىرىپ، ءوز شاكىرتى ءۇشىن تاقىمىن قىسىپ وتىرعان پولشالىق جاتتىقتىرۋشى كاميل ميتوندى كوزىمىز شالدى. شەتەلدىك ماماننان ەلىمىزدەگى جارىستان قانداي اسەر العانىن سۇرادىق.
- مەن ءبىرىنشى رەت قازاقستانعا كەلىپ وتىرمىن. الماتىنىڭ كورىكتى جەرلەرىن ارالاۋعا ءالى ۋاقىتىمىز بولعان جوق. كۇندەلىكتى جارىس ءوتىپ جاتىر. ءبىراق جەرگىلىكتى ادامدار ۇنادى، ءبارى قوناقجاي، جىلى لەبىز تانىتادى. ۇيىمداستىرۋ دەڭگەيى دە وتە جاقسى. جارىس تۋرالى ايتساق، قازاقستاندىق قىزدار وتە جاقسى ونەر كورسەتۋدە. سونداي-اق، 8-10 جاستاعى كىشكەنتاي قىزدار قاتىسىپ جاتقانىن بايقادىم. بۇل ولار ءۇشىن وتە ۇلكەن تاجىريبە. مەن يان كشيشتوف دۋدانىڭ جاتتىقتىرۋشىسىمىن. وسى تۋرنيرگە اسا مۇقياتتىلىقپەن دايىندالدىق. تەك مورالدىق تۇرعىدا ەمەس، فيزيكالىق جاتتىعۋلار دا جاسادىق. سەبەبى مۇنداي جارىستار ادامدى شارشاتادى، – دەدى پولشادان كەلگەن مامان.