تەگىن ۇيرەتىلەدى
الماتىدا ەلەكترلى ساموكاتتى تەبۋدى ۇيرەتەتىن مەكتەپ اشىلدى. مۇندا كامەلەت جاسىنا تولعان بارلىق ازاماتقا ساموكاتتى قالا جاعدايىندا ءقاۋىپسىز جانە دۇرىس پايدالانۋ تەگىن ۇيرەتىلەدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ەلەكترلى ساموكاتتاردى جالعا بەرۋ قىزمەتىن ۇسىناتىن كومپانيانىڭ سىرتقى بايلانىستار ءبولىمىنىڭ باسشىسى دانييل كاپسانىڭ ايتۋىنشا، قالا تۇرعىندارى ساموكاتتاردى دۇرىس جۇرگىزۋدى جانە تۇراققا قويۋدى ۇيرەنەدى. سونداي-اق جەكە قوزعالىس قۇرىلعىسىن پايدالانۋ ەرەجەلەرىمەن تانىسادى.
«بۇگىنگى كۇنى الەمدە ەلەكترلى ساموكات – جاڭا كولىك ءتۇرى بولىپ سانالادى. ول بارلىق ءىرى مەگاپوليستەردە بار. ادامدار بۇل كولىككە ۇيرەنىپ، ونى قولدانا دا ءبىلۋى قاجەت. اۆتومەكتەپ – قاراپايىم، ءبىراق وتە ماڭىزدى قاۋىپسىزدىك ەرەجەلەرىن ۇيرەتەدى. ءبىز بۇل مەكتەپتە جول ءجۇرۋ ەرەجەسىن كەز كەلگەن ادامعا تۇسىندىرەمىز»، - دەيدى دانييل كاپسان.
ەلەكترلى ساموكاتتاردى جالعا بەرۋ قىزمەتىن ۇسىناتىن كومپانيالار وقىتۋدى اپتا سايىن قالانىڭ ءار بولىگىندە ۇيىمداستىراتىن بولادى. اتالعان شارالار اكىمدىك پەن كومانيالار اراسىندا جاسالعان مەموراندۋم اياسىندا جۇزەگە اسىرىلادى.
وقىتۋ قورىتىندىسى بويىنشا قولدانۋشىلار تەست تاپسىرىپ، تەگىن مينۋتتار الۋعا جانە جىلدامدىقتى 25 كم/ساع جەتكىزۋگە مۇمكىندىك بەرەتىن پرومو-كود الا الادى. جول قوزعالىسىنا قاتىسۋشىلاردىڭ قاۋىپسىزدىگىن قامتاماسىز ەتۋ ماقساتىندا وقىتۋدان وتپەگەن قولدانۋشىلار ءۇشىن ماكسيمالدى جىلدامدىق 20 كم/ساع دەيىن شەكتەلەدى.
دانييل كاپسان ءوزى وكىلدىك ەتەتىن كومپانيا حالىقارالىق ەكەنىن ايتتى. ول الەمنىڭ 45 قالاسىندا جۇمىس ىستەيدى.
«ءبىزدىڭ كومپانيا قىزمەت كورسەتەتىن بارلىق قالادا قاتەلىكتەر قايتالانادى. ولاردىڭ كوپشىلىگى، وكىنىشكە وراي، قايعىلى جاعدايعا اكەلىپ جاتادى. ءبىرىنشى ەرەجە – ساموكاتقا ەكى ادامعا مىنۋگە بولمايدى. ول ۆەلوسيپەد سياقتى، بەلگىلى ءبىر سالماققا ارنالعان. ەكىنشى ءجيى كەزدەسەتىن قاتەلىك – پايدالانۋشىنىڭ ساموكاتپەن جولدى كەسىپ ءوتۋى. جولدى جاياۋ كەسىپ ءوتۋ كەرەك. جاياۋ جۇرگىنشىلەر وتكەلىندە ساموكاتتان تۇسكەن ابزال. بۇل پايدالانۋشىنىڭ ءومىرى مەن دەنساۋلىعى ءۇشىن وتە ماڭىزدى»، - دەدى ول.
سونداي-اق دانييل كاپسان ەلەكترلى ساموكات مەكتەبى ماۋسىمنىڭ سوڭىنا دەيىن – كۇن سۋىتقانعا دەيىن جۇمىس ىستەيتىنىن ايتتى. الماتىدا – جەلتوقسان، ەلوردادا – قاراشا ايىنا دەيىن.