8 قوقىس ورنى تازارتىلعان
قالاداعى قوقىس پوليگوندارىنىڭ قاتارى ازايعانىمەن، ماسەلەنىڭ اۋقىمى ءالى دە كەڭ. ماماندار جاپان دالا، جول بويىنداعى ۇيىندىلەردىڭ جايىنا الاڭدايدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
الماتى اۋماعىندا رۇقسات ەتىلمەگەن 13 قوقىس ورنى انىقتالىپتى. ولاردىڭ ءارقايسىسى عارىش ساپارى بويىنشا تىركەلگەن. قازىرگى تاڭدا 8 قوقىس ورنى تازارتىلعان.
كۇنى كەشە الماتى – اتىراۋ باعىتىنداعى ۇشاقتىڭ قوزعالتقىشىنا قۇستار كىرىپ كەتكەن ەدى. سالدارىنان كەلەسى رەيس كەشىكتىرىلدى. بۇل جاعداي ءبىرىنشى رەت ەمەس. ال قالدىقتى قورەك قىلعان قۇزعىن-قارعانىڭ جاقىن ماڭداعى ۇيىندىدەن كەلەتىنى دە انىق. ەكولوگتاردىڭ ايتۋىنشا، اينالانى قوقىسقا اينالدىرعان دا ادامنىڭ ءوزى.
«جاقىن ماڭدا ەشقانداي تۇرعىن ءۇي جوق. ءوزىمىزدىڭ حالىق توگىپ كەتىپ جاتادى. كوبىنە تۇنگى ۋاقىتتا، ۇلكەن جۇك ماشينالارىمەن كەلىپ قوقىس توگەدى. وسىنداي جابايى قوقىس، قالدىقتار ورنى سولاي پايدا بولىپ جاتادى. ەندى ونىمەن قولدان كەلگەنشە كۇرەسىپ جاتىرمىز»، – دەدى تۇركسىب اۋدانى ەكولوگيا جانە قورشاعان ورتانى قورعاۋ ءبولىمىنىڭ باسشىسى نۇردان دۇيسەكەيەۆ.
ارنايى تەحنيكا دا جۇمىلدىرىلعان. مۇنداي ورىنداردى انىقتاۋ سپۋتنيكتىك جەلىنىڭ كومەگىمەن ىسكە اساتىنىن ايتا كەتكەن ءجون. ال تۇتىنۋعا كەلەتىن قالدىقتاردى زالالسىزداندىرۋ، ونى كادەگە جاراتۋ – نەگىزگى شارا.
«اۋا ترانسپورت پروكۋراتۋراسى بىزگە حاتتامانى جىبەرگەن بولاتىن. سول بويىنشا ءبىز مونيتورينگكە شىعىپ، جابايى قوقىستى تاپتىق. وسى جەردە تۇركسىب اۋدانى اپپاراتىمەن بىرلەسىپ، تازارتۋ جۇمىستارىن جۇرگىزىپ جاتىرمىز»، – دەدى قالالىق ەكولوگيا دەپارتامەنتىنىڭ مامانى ءادىل نۇرپەيىسوۆ.
ەكولوگتاردىڭ ايتۋىنشا، مامان جۇمىسىن ىستەگەنىمەن، ادام ءوز ارەكەتىن باقىلاۋعا الۋى كەرەك. سوندا عانا ءۇيىندى ازايىپ، قالدىق كادەگە جارايدى.