الماتىدا ەكىقاباتتى ءۇي ورتەندى

200 شارشى مەتر اۋماق ورتەنگەن.

الماتىدا ەكىقاباتتى تۇرعىن ۇيدە الاپات ءورت بولدى، دەپ حابارلايدى Almaty-akshamy.kz قالالىق تجد مەكەمەسىنە سىلتەمە جاساپ.

الماتىدا بايتۇرسىنوۆ كوشەسىنىڭ قوس تاراپى، اتاپ ايتقاندا اباي مەن ساتپايەۆ كوشەلەرى قياتىن بولىگى جابىلدى. وعان سەبەپ - ەكى قاباتتى تۇرعىن ۇيدەن شىققان ءورت.

14 ناۋرىزدا ساعات 20:24-تە الماتى قالاسى تجد كۇشتەرى مەن قۇرالدارى بوستاندىق اۋدانى، بايتۇرسىنوۆ كوشەسى مەكەنجايىنا اتتاندى.

«وقيعا ورنىنا ساعات 20:32-دە جەتكەن № 1 ءموسب العاشقى بولىمشەلەرى ەكى قاباتتى عيماراتتىڭ ەكىنشى قاباتىنداعى پاتەردىڭ ورتەنىپ جاتقانىن انىقتادى. ارالاس ءۇي-جايلاردى قورعاپ، ءورتتى سوندىرۋگە ءورت وقپاندارى ازىرلەندى، ءورت اۆتوسيستەرنالارى سۋ كوزدەرىنە جەدەل ورناتىلدى، سۋدى ۇزدىكسىز بەرۋ قامتاماسىز ەتىلدى. عيماراتتىڭ وتقا توزىمدىلىگى تومەن ساناتىنا جاتاتىنى، قابىرعالار مەن توبە جابىندارىندا جاسىرىن بوس ورىنداردىڭ بولۋى ءورت ءسوندىرۋ جۇمىستارىن قيىنداتتى. قابىلدانعان شارالاردىڭ ارقاسىندا ءورت ساعات 21.43-تە وقشاۋلاندى. ءورت سوندىرۋشىلەردىڭ ۇيلەسىمدى ىس-ارەكەتتەرىنىڭ ارقاسىندا ءورت ىرگەلەس ورنالاسقان ۇيلەرگە تارالعان جوق»، دەلىنگەن تجد باسپا ءسوز قىزمەتى تاراتقان حابارلامادا.