الماتىداعى زەردەلى شاعىن اۋدانىندا جاڭا دەنە شىنىقتىرۋ-ساۋىقتىرۋ كەشەنى اشىلادى
بالالاردى سىنىپتان تىس وقۋمەن قامتۋ ءۇشىن بىلتىر نۇركەنت شاعىن اۋدانىندا كوپسالالى يننوۆاسيالىق شىعارماشىلىق ورتالىعى (وقۋشىلار سارايى) اشىلدى. ونداعى 38 ۇيىرمەگە 1200 بالا قاتىسادى. بۇل تۋرالى قالا اكىمى ەربولات دوسايەۆ الاتاۋ اۋدانىنىڭ تۇرعىندارىمەن كەزدەسۋدە ايتتى.
«2024 جىلدىڭ مامىر ايىندا زەردەلى شاعىن اۋدانىندا سپورتتىق جانە ترەناجەرلىق زالدارى، حورەوگرافيا مەن ۇستەل ويىندارى قامتىلعان دەنە شىنىقتىرۋ-ساۋىقتىرۋ كەشەنىن اشۋ جوسپارلانىپ وتىر»، - دەدى قالا باسشىسى.
اۋداندا ەمحانالاردىڭ جەتىسپەۋشىلىگى پروبلەماسىن شەشۋ جانە مەديسينالىق قىزمەتتىڭ ساپاسىن ارتتىرۋ ماقساتىندا سايالى جانە قاراسۋ شاعىن اۋداندارىندا كۇنىنە 200 ادامنان قابىلدايتىن ەكى وتباسىلىق-دارىگەرلىك امبۋلاتوريالارىنىڭ قۇرىلىسى اياقتالىپ كەلەدى. قاراسۋ شاعىن اۋدانىندا قۇرال-جابدىقتارىن مونتاجداۋ جۇمىستارى جۇرگىزىلىپ، وسى جىلدىڭ مامىر ايىندا اشىلادى دەپ كۇتىلۋدە. سايالى شاعىن اۋدانىنداعى امبۋلاتوريانىڭ قۇرىلىسى 2024 جىلدىڭ ماۋسىمىنا دەيىن اياقتالماق.