«قارا التىندى» باسقارۋدا جاڭاشىل كوزقاراس، تىڭ يدەيالار كەرەك
الماتىداعى قازاقستان-بريتان تەحنيكالىق ۋنيۆەرسيتەتىندە دۇنيەجۇزىلىك مۇناي كەڭەسىنىڭ VII جاستار فورۋمىنا 29 ەلدەن 700-تەن اسا دەلەگات قاتىستى، دەپ حابارلايدى «حابار 24».
جيىن ناتيجەسىندە الماتى دەكلاراسياسى قابىلداندى. سونىمەن قاتار فورۋمدا قازاقستان-بريتان تەحنيكالىق ۋنيۆەرسيتەتى الەمدەگى تەحنيكالىق ۋنيۆەرسيتەتتەر ءۇشىن ءبىلىم بەرۋ حابىنا اينالادى دەگەن شەشىم قابىلداندى. بولاشاقتا مۇناي-گاز وندىرىسىندە جوعارى تەحنولوگيالاردىڭ ماڭىزدىلىعى بۇگىنگىدەن دە كۇشەيە تۇسەدى. بۇل – ءىت ماماندارعا سۇرانىس ارتادى دەگەن ءسوز. سوندىقتان جاستار سيفرلىق تەحنولوگيالاردى جەتىك مەڭگەرگەنى ابزال. دۇنيەجۇزىلىك مۇناي كەڭەسىنىڭ جاستار فورۋمى دا وسى وزەكتى ماسەلەنى قاۋزادى. جيىنعا قاتىسقان ستۋدەنتتەر مەن جاس ماماندار مۇناي-گاز سالاسىنىڭ كوشباسشىلارىمەن، ساراپشىلارىمەن پىكىر الماسىپ، وي ءبولىستى.
«بۇل كونفەرەنسيانىڭ باستى باعىتى – جاستارعا كوڭىل ءبولۋ. ويتكەنى مۇناي-گاز سالاسىندا جاس مامانداردىڭ الاتىن ورنى ەرەكشە. مۇناي سالاسىنىڭ بولاشاعى ءۇشىن جاستاردىڭ بىلىكتىلىگى وتە ماڭىزدى. «قارا التىندى» باسقارۋدا جاڭاشىل كوزقاراس، تىڭ يدەيالار كەرەك»، - دەيدى دمك كانادا ۇلتتىق كوميتەتىنىڭ ۆيسە-توراعاسى دين تاكەر.
فورۋمعا قاتىسۋشىلار مۇناي-گاز سالاسىنداعى ستراتەگيالىق ماسەلەلەردى شەشۋدەگى تاجىريبەلەرىمەن ءبولىستى. ەڭ وزىق جەتىستىكتەردى تالداپ، ەنەرگەتيكا سالاسىنداعى وزگەرىستەردى جەدەلدەتۋ ءۇشىن تىڭ تاسىلدەر ىزدەۋ قاجەتتىلىگىنە باسىمدىق بەردى. جيىن سوڭىندا دۇنيەجۇزىلىك مۇناي كەڭەسىنىڭ جاڭا ستراتەگياسى قابىلداندى.
«دۇنيەجۇزىلىك مۇناي كەڭەسىنىڭ ستراتەگياسى سوڭعى 40 جىلدا وزگەرگەن جوق. ال بۇگىن كوپجىلدىق قۇجات قايتا قارالىپ، الماتى دەكلاراسياسى قابىلداندى. جاڭا قۇجات – ىنتىماقتاستىقتى دامىتۋعا، جاڭا دەڭگەيدەگى ماماندار دايارلاۋعا، اقپارات الماسۋعا، دوستىق قارىم-قاتىناستى نىعايتۋعا مۇمكىندىك بەرەدى»، - دەيدى قبتۋ رەكتورى ماراتبەك گابدۋللين.
دۇنيەجۇزىلىك مۇناي كەڭەسى – مۇناي-گاز سالاسىنداعى نەگىزگى ماسەلەلەردى تالقىلاۋعا ارنالعان حالىقارالىق فورۋم. ول 1933 جىلى لوندوندا قۇرىلعان. كەڭەسكە الەمنىڭ 70 ەلى كىرەدى.