مۇراجايدىڭ جالپى ساقتاۋ قورىندا 8 196 ەكسپونات بار.
الماتىدا رەستاۆراسيادان كەيىن دىنمۇحامەد قونايەۆتىڭ ءمۇراجاي-ۇيىنىڭ اشىلۋ ءراسىمى ءوتتى. شاراعا قالا اكىمى ەربولات دوسايەۆ قاتىستى، دەپ حابارلايدى Almaty-akshamy.kz.
ماماندار كورنەكتى مەملەكەت قايراتكەرىنىڭ 110 جىلدىعىن مەرەكەلەۋ اياسىندا مۇراجايدا قالپىنا كەلتىرۋ جۇمىستارىن جۇرگىزدى.
اشىلۋ سالتاناتىنا د.ا.قونايەۆتىڭ حالىقارالىق قوعامدىق قورىنىڭ ءتوراعاسى ەلدار قونايەۆ، د.ا. قونايەۆتىڭ جيەنى ديار قونايەۆ، ونىڭ جەكە دارىگەرى احات مۋليۋكوۆ، دوسى ءارى سەرىكتەسى الەكساندر گويكولوۆ قاتىستى.
رەستاۆراسيا جانە ەكسپوزيسيا پروسەسىنە مۇراجاي جانە مۇراعات ءىسى سالاسىنداعى جەتەكشى ماماندار، ديزاينەرلەر، مۇسىنشىلەر، سۋرەتشىلەر، بەينەينجەنەرلەر جانە ت.ب. تارتىلدى. جۇمىس بارىسىندا د.ا. قونايەۆتىڭ حالىقارالىق قورىمەن كەلىسىلگەن تۇجىرىمداما مەن جوبانىڭ ەسكيزى ازىرلەندى.
رەەكسپوزيسيا تاقىرىبىنىڭ نەگىزىنە ساياساتكەردىڭ ەل ومىرىندەگى ماڭىزدى تاريحي وقيعالارعا دەگەن جەكە كوزقاراسىن سۋرەتتەيتىن د.قونايەۆتىڭ «ستاليننەن گورباچيەۆكە دەيىن» اۆتوبيوگرافيالىق كىتابى ارقاۋ بولدى.
حرونولوگيالىق تارتىپتە ورنالاستىرىلعان مۇراعاتتىق قۇجاتتار، فوتوسۋرەتتەر مەن ەكسپوناتتار دىنمۇحاممەد قونايەۆتىڭ كورنەكتى قوعامدىق-ساياسي قايراتكەر رەتىندەگى الىپ تۇلعاسىن كورسەتەدى. جۇمىس بارىسىندا بارلىق ەكسپوناتتار، سونىڭ ىشىندە دىنمۇحامەد قونايەۆتىڭ جەكە زاتتارى بۇرىنعى قالپىندا ساقتالدى.
قالپىنا كەلتىرۋ جۇمىستارى بارىسىندا مۇراجاي زاماناۋي ساندىق جانە مۋلتيمەديالىق تەحنولوگيالارمەن جابدىقتالدى، كەلۋشىلەر ەندى اۋديو نۇسقاۋلىقتاردى قولدانا الادى. ەرەكشە قاجەتتىلىكتەرى بار ادامدارعا ىڭعايلى بولۋ ءۇشىن ەكىنشى قاباتقا ليفت ورناتىلدى.
ەسكە سالساق، مۇراجاي 2002 جىلى د.قونايەۆتىڭ 90 جىلدىعىنا وراي اشىلعان بولاتىن. ەكسپوزيسيالار 10 جىل بۇرىن سوڭعى رەت جاڭارىپ، 2011 جىلى جاسالعان ەدى. مۇراجايدىڭ جالپى ساقتاۋ قورىندا 8 196 ەكسپونات بار.
