ءمۇرجاي-ۇيىنىڭ الاڭى 114،6 شارشى مەتردى قۇرايدى.
الماتىدا قازاق ادەبيەتىنىڭ كلاسسيگى عابيت مۇسىرەپوۆتىڭ ءمۇراجاي-ۇيى كۇردەلى جوندەۋدەن ءوتتى. رەەكسپوزيسيا جازۋشىنىڭ 120 جىلدىعى قارساڭىندا ىسكە استى، دەپ حابارلايدى Almaty-akshamy.kz.
كۇردەلى جوندەۋدەن، مودەرنيزاسيادان جانە رەەكسپوزيسيادان كەيىن عابيت مۇسىرەپوۆ مۇراجايى ەلىمىزدەگى العاشقى زاماناۋي مۋلتيمەديالىق ادەبي ورتالىققا اينالادى. رەكونسترۋكسيا جانە رەەكسپوزيسيا بويىنشا جۇرگىزىلگەن كەشەندى جۇمىس جىل سايىن مۇراجايعا كەلۋشىلەر سانىن ەكى ەسەگە – 22 مىڭ ادامعا دەيىن ارتتىرۋعا مۇمكىندىك بەرەدى دەپ جوسپارلانۋدا.
مۇراجايدى جاڭارتۋ جۇمىستارىنا مۋزەي جانە ارحيۆ ءىسى سالاسىنداعى جەتەكشى ماماندار، ديزاينەرلەر، سۋرەتشىلەر، بەينەينجەنەرلەر جانە ت.ب. تارتىلدى.
جوندەۋ بارىسىندا مۇراجاي زاماناۋي قۇرال-جابدىقتارمەن، ونىڭ ىشىندە اقپاراتتىق ستەندتەرمەن، مۋلتيمەديالىق جۇيەمەن، كونتەنتتى سەنسورلىق باسقارۋى بار پروەكسيامەن، مۋلتيمەديالىق تاچ-پانەلدەرمەن جانە ت.ب. جابدىقتالدى. بۇلاردا قۇندى ادەبي دەرەكتەر، مۇراعاتتىق ماتەريالدار، ونىڭ ىشىندە «بەسەۋدىڭ حاتى»، قولجازبالار، فوتوسۋرەتتەر جانە ت.ب. كورسەتىلەدى.
رەەكسپوزيسيا ناتيجەسىندە ادەبي زال قايتا جاساقتالدى. ستەندتەردە جازۋشىنىڭ وتباسى، بالالىق شاعى، ءبىلىمى، ادەبي جولدىڭ باستالۋى جانە ت.ب. تۋرالى مالىمەتتەر كەلتىرىلگەن ءومىرى مەن شىعارماشىلىق جولى ۇسىنىلعان. مۇراجايدا سونداي-اق عابيت مۇسىرەپوۆ جازعان، ونىڭ ىشىندە «امانگەلدى»، «قىز جىبەك»، «ءبىر رەت جانە ءومىر بويى»، «قاۋىن» فيلمدەرىن كورسەتۋ ءۇشىن ارنايى كينوزال اشىلدى.
ەسكە سالساق، عابيت مۇسىرەپوۆتىڭ سوڭعى 18 جىل تۇرعان پاتەرى 1991 جىلى ق ر ورتالىق مەملەكەتتىك مۋزەيىنىڭ ءبىر بولىگى رەتىندە مۇراجايعا اينالعان. 1999 جىلدان باستاپ نىسان س.مۇقانوۆ پەن ع.مۇسىرەپوۆتىڭ مەملەكەتتىك ادەبي-مەموريالدىق مۇراجاي كەشەنى بولىپ قايتا قۇرىلدى. 2015 جىلدان باستاپ مۇراجاي «الماتى قالاسى مۋزەيلەر بىرلەستىگى» كمقك قۇرامىندا.
ع.مۇسىرەپوۆ ءمۇرجاي-ۇيىنىڭ الاڭى 114،6 شارشى مەتردى قۇرايدى. ەكى مەموريالدىق بولمە، ءبىر ادەبي زال بار. مەموريالدىق بولمەدەگى زاتتار (جازۋ ۇستەلى، كىتاپحانا، جەكە تۇتىنۋ زاتتارى، سىيلىق زاتتارى جانە ت.ب.) بۇرىنعى كۇيىندە ساقتالعان.
